CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Joan-Marc Leclercq

Dimars, 15.12.2015 03h00

Perqué èi pas votat dimenge


Comentaris 24 comentaris    
Dolent Fluix Bo Molt bo Fabulós (13 vòtes)
carregant En cargament


Los escrutins deus dimenges passats an causat una grana charradissa, sustot pr’amor de la resulta deu Front National. Entre los dus torns, la pression estoc fòrta ende convéncer lo monde de se n’anar votar contra lo partit de Marion Le Pen (E òc, son nom vertadèr es Marion, Marine es pas que son nom “d’empont”). Jo, èi pas votat, e expliqui perqué.
 
Purmèr, se tornam a la definicion de la Democracia, es aquesta: “Los ciutadans vòtan las leis.”
 
Dens lo cas de l’eleccion passada, s’agissèva un còp de mès d’elegir quauqu’un qu’anère decidir a nòsta plaça. Es un renonç de poder.
 
De mès, aquestas eleccions son doblament antidemocraticas, pr’amor que balhan lo poder absolut a un partit qu’a pas obtengut la majoritat de las votzes.
 
Aquestes escrutins, doncas, son pas solament un desviament de la legitima volontat populara, mès presentan tanben un dangèr. Lo dangèr de balhar lo poder absolut a un grop que representaré pas la majoritat. Lo hèit qu’aqueste grop podèva estar lo Front National a pervocat una reaccion drin tardiva deus “dehensors de la democracia” qu’èran pas genats au davant per aquesta irregularitat.
 
Plan sovent, los comentaris imputavan a l’abstencion la pujada deu partit de dreta extrèma. Aquò dessús, las chifras son capborrudas. Un article deu Monde muishèc clarament que los abstencionistas, estossen obligats de votar, balharén lor votz aus partits dambe una reparticion comparadera que non pas los votants. E sufís pas que de comparar las duas eleccions regionalas de 2009 e 20015 ende véser que la participacion (46,33 % - 49,91 %) e lo vòte Front National (11,42 % - 27,73 %) an creishut totis dus.
 
Podèm pas comparar un purmèr torn dambe un dusau e la pèrda deu FN en percentatges es devuda sustot au hèit que las listas an mudat (aliganças, retrèits) entre los torns, levat las deu partit de dreta extrèma que doncas beneficia pas de resèrva de votzes.
 
Lo monde qu’aperavan a anar votar ende hèr empach au FN disèvan sovent: “Se votatz pas, ajudatz lo Front Nationau.” Vaquí una soscadissa de las estranhas. Atau, quauqu’un que bota lo dit dempuèi bèra pausa sus la dangerositat qu’aquestes escrutins, seré responsable de la victòria d’un partit fascistejaire pr’amor que participèc pas au jòc dangerós que recusa, lavetz que los que permeten qu’aqueste jòc se debane, au contra, ne serén pas responsables.
 
D’un punt deu centralisme e deu jacobinisme, aquestas eleccions èran la resulta d’una refòrma de la carta administrativa francesa realizada dens l’embrolh, l’autoritarisme descomplexat e lo mesprètz auturós de las populacions.
 
La refòrme territoriala estoc hèita en petit comitat, un bèth ser dens un burèu parisenc, entre uns ministres en concertacion telefonica dambe lors amics presidents de regions deu medish partit. Lo maucontentèr deus Alsacians (85 % contra lo cambiament, numerosas manifestacions de carrèra) estoc mespresat, atau que lo debat sus la reunificacion de Bretanha, parat guastat d’aver enfin una charradissa sus la question.
 
Ara, peus politicians deus partits “de govèrn”, sembla que la tempèsta sia passada e que tot va plan. Solide qu’an “ausit los electors”, coma a cada còp, quitament se, solide, tot tornarà coma abans.



publicitat
BANER1-2-3: DGPL AN LAFONT



Comentaris

18 de decembre 13.34h

#11 A bon? Qu'avèvatz la possibilitat de votar per Patric Roux shens votar peu PS a vòste?

A noste que i avè ua sola lista PS - Front de Gauche -EELV - POC...

Donc a mensh que los buletins estossen diferents dens los diferents burèus, que'm sembla qu'as votat peu PS en fèit...

O lavetz i a quauq'arren qui n'èi pas comprés.

E en 2002, com n'i avè pas de buletin "Pas Le Pen, mercés plan", que votèi Chirac. Après Chirac que prenó Sarkozy a l'interior e que realisè quauquas prome... Legir la seguida


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

18 de decembre 13.18h

#6 A... Vertat qu'en Migjorn-Rossilhon, ne m'inquietavi pas tant. Que'm digoi que, despuish lo temps que lo FN serveish d'espavent entaus socialistas e entà la "dreta republicana" tà'ns har votar peus lors politicians professionaus, que fonccionaré un còp de mei...

E donc n'anèi pas votar. Lheu i serí anat s'aví credut au "risc-FN"


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de decembre 21.21h

#21 Sèm fotuts entremièg lo martèl universalista abstrach d'un costat e l'enclutge identitaro-focalizat de l'autre. Ont son las gents de las anilisis finas dins la societat ? Cal sortir dels discorses abstraches mas pas degun per o far o als quals balhan la paraula publicament. La paraula es confiscada per los politics, lo show-biz e los mèdias "autorizats". Cal trobar d'autres biaisses de se far ausir. Es pas ganhat.
Benlèu s'inspirar de las luchas dels moviments negres (?)


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

17 de decembre 16.02h

Lo jacobino-nacionalisme francés a capitat dins las darrièras eleccions (FN + partits francimands «republicans»). N'i a pas cap d'alternativas, lo FN contamina tot lo païsatge politic. Los Verds tanben qui son aliats dab partits regionalistas denóncian un retrèit identitari…de los regionalistas (http://aquitaine.eelv.fr/2014/05/12/eelv-bearn-il-faut-creer-une-identite-europeenne/). Los politicians professionals hèn compte sonque de las idèas qui pòdon lor balhar de vòtes. Se'n truf... Legir la seguida


Valora aquest comentari:   votar positiu 6   votar negatiu 3
Respondre comentari replica Comentari inadequat   Formulari d'abús de comentari

16 de decembre 11.05h

#18 Segur que sosqui, soscam totes a un sistèma melhor! Mas anar pas votar es pas una soscadissa, es una accion e una accion de favoriza lo sistèma pièger (lo faicista, s'entend)!


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

16 de decembre 11.05h

#18 Segur que sosqui, soscam totes a un sistèma melhor! Mas anar pas votar es pas una soscadissa, es una accion e una accion de favoriza lo sistèma pièger (lo faicista, s'entend)!


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

16 de decembre 08.29h

Soi curiós de véser que los que vòtan (an lo dret) saben plan que lo sistèma es pas bon mes volon pas soscar a un sistèma milhor e enfin democratic, çò qu'es fin finala lo subjècte màger.


Valora aquest comentari:   votar positiu 2   votar negatiu 3
Respondre comentari replica Comentari inadequat   Formulari d'abús de comentari

15 de decembre 23.16h

#16 Pensi qu'al moment ont pòdes escriure dins un jornal en lenga d'òc es la pròva que i a al mens un pauc de democracia. E qu'aquel tròç merita d'èsser defendut.

Cal levar lo drech d'escriure e parlar en òc benlèu ...


Valora aquest comentari:   votar positiu 4   votar negatiu 3
Respondre comentari replica Comentari inadequat   Formulari d'abús de comentari

15 de decembre 22.50h

#15 Atz pas comprés. Vole ren aver a far emb quela mascarada sembla-democratica. Los partits en plaça son larjament responsables de la montada de l'FN tot coma los colhons que los elegissen (que ne'n fuguei). Que chamnhan de politica prumier, que 'restan de favorizar lo monde dau fric. FN o pas, quela societat es pas democratica : http://www.bastamag.net/Manifestation-d... Legir la seguida


Valora aquest comentari:   votar positiu 5   votar negatiu 4
Respondre comentari replica Comentari inadequat   Formulari d'abús de comentari

15 de decembre 21.44h

#14 Perque pensas que lo FN un còp al poder demorarà pas qu'un mandat e que puèi s'en anarà plan planet ... ? :)


Òc-ben, daissar la tèrra occitana al FN per aprèp dire "l'occitània m'en foti m'en vau", segur qu'es un rasonament digne.


De tot biais, quand es per votar per un candidat occitanista, al PNO, i a degun. Mas quand es pel "Testet", an aquel moment, li agrada plan de se far colhonar pel PS.






Valora aquest comentari:   votar positiu 3   votar negatiu 4
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions