Bandièra01 1180x150: Comuna de Tolosa

Opinion

Lo nom de la region, un còp de mès

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Benlèu n’atz dejà una hartèra d’aqueste debat e me’n desencusa. Mes volerí avant tot vos díser mon sentit sus la debatuda era medish.
 
Estoi desagradablament susprés de véser que, un còp de mès, duas parts se son entrafrontadas dens un ambient drin hastiau. Pauques escambis, mes una volontat de destrusir l’adversari “sintaxicament” peu pes deus mòts. Lèds noms an circulat qu’an pas hèit progressar la causa de l’occitan (levat se disi sovent que’s pelejar dens la lenga es dejà una victòria). Cadun de cada costat es convençut d’aver rason e de s’acarar a troperadas fascistas que volon tuar la lenga e la cultura. Caricaturi drin, mes pas tròp.
 
L’enjòc es gran e s’amerita un pauc de calma, de soscadissa e d’escota deus autes. Solide, seré pas tròp constructiu de criticar lo debat sens de balhar son sicut personau. Nomejar la navèra region Occitanie a avantatges e inconvenients, mes cau totun causir.
 
Es pr’aquò que començarèi per la frasa que cadun deveré emplegar: “BENLÈU QUE M’ENGANI, MES PENSI QUE …”
 
Òc, pensi que los avantatges de balhar lo nom Occitanie son mès numeroses que non pas los inconvenients, que caleré totun pas negligir e que son reaus.
 
L’inconvenient màger es de redusir Occitània a una region que n’es pas qu’una part. Es vertat, podèm pas díser lo contrari. L’argument invèrse es que redusissèm quicòm qu’existís pas que dens nòstes caps e que, a l’encòp, le balham neishença oficialament de cap au monde. Mes benlèu que m’engani …
 
Un aute inconvenient es de balhar arguments aus adversaris que dison lo provençau o lo bearnés es pas occitan. Vertat tamben, es pas de negligir. Mes aquò se passa dens un microcòsme occitanista que compreng un 0,1 % deus estatjants. Aqueste monde, totun, pòt influenciar poderoses qu’an la man sus la politica lingüistica de lor region. L’avís de las institucions lingüisticas scientificas pòt benlèu contrabalançar lor accion. Disi plan “benlèu”.
 
Díser que la lenga, en dehòra d’Occitània (la region), seré pas mès l’occitan hè paur, mes s’espiam la situacion de l’anglés, de l’espanhòu o deu portugués, i a pauc de dobte suu nom de la lenga lavetz que son “nucli” es fòrça redusit sus la mapa deu monde. Lo Quebequeses dison que parlan francés, lavetz que parlan quebequés e francés. Se restacar a un territòri qu’existís lor balha la fòrça qu’auré pas la reïvendicacion deu parlar jouale solet.
 
Existís una teoria que ditz lo nom Occitania es la version latina de Lengadòc. Ací parlam pas de lenga mes d’entitat territoriala. Dens aqueth cas, sèm dejà dens la situacion d’una lenga parlada fòrça en dehòra de son territòri reconegut que pòrta lo nom.
 
Se seguissi l’exemple de Polonha, dus còps dens l’istòria estoc tornada bastir dens frontèras qu’èran pas naturalas, dambe regions non-polonesas a l’endehens e regions polonesas a l’endehòra. An pas refusat çaquelà de nomejar aquò “Polonha” e benlèu qu’an avut rason, me sembla.
 
Çò d’important es l’identificacion deus estatjants per rapòrt a lor region. Es per aquò que vau milhor un nom dambe un gentilé, es a díser un adjectiu que posca qualificar los qu’i demòran. Dambe “Midi-Pyrénées”, pas degun a pas jamès dit “Soi midipirenenc”. Los praubes flamencs, artesians e picards an vist lor region nomejada Hauts de France e atau se poderàn pas mès qualificar, se que non dambe lo trufandèc hautains. E es benlèu pr’amor d’aquò que lo monde de la region en dehòra deu movement occitanista sembla aver una vertadièra enveja deu nom Occitanie.
 
Pr’amor que benlèu la clau es aicí. Carole Delga a balhat lo parat au pòble de s’exprimir. Vesi pas una solucion milhora qu’aquò e me plegarèi de bon grat a la causida populara. Sèm pas nosautes occitanistas que vam impausar qué que sia, purmèr pr’amor que seré pas fòrça democratic, e puèi pr’amor que n’am pas lo poder d’ac hèr.
 
L’argument ultim que’m soi hèit, es lo seguent: se hèm pas ren, la lenga es mòrta. Podèm pas guardar la situacion com es uei lo dia. Lavetz l’oficialiazacion deu nom pòt ajudar. Se m’engani pas.
 
En resumit, cau guardar lo cap fred e escambiar tranquillament. L’ahuegament endeu nom passa largament nòste movement, doncas nos cau pensar que nòstes debats van pas influenciar la resulta.
 
Es l’avénguer que nos diserà s’èm enganats. O pas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat Gasconha
21.

"Es evident qu'amb una region sonada "Occitanie", aquò anarà pas en se melhorant..."
Òc, mes que haré tant de gai a uns quans occitanistas tolosencs! Lo sentiment d'aver hèit quauqu'arren de la loa vita. Aver hicat lo mot "Occitanie" sus ua mapa de França! Quitament en n'estremar 60 % deu territòri e en fóter dens la merda los occitanistas de Gasconha e de Provença.
Que'n soi hèra esmaliciat...

  • 13
  • 7
Matieu Castel Marselha
20.

Per informacion, pres sus lo blòg de Viure al País, vaicí la situacion au Conseu Generau de Naut Pirenèus.
Viam ben que l'epuracion deis subvencions devèrs leis associacions de sensibilitat occitanista comencèt ailà. E tot aquò sènsa baissa de budgècte per la lenga....çò que vòu dire mecanicament qu'aquestei sòus son anats devèrs d'associacions puslèu "bearnistas". (Fau creire que la preséncia d'un "Òc" dins lo nom de l'associacion es estat v'un dei critèris per lei demesir la subvencion...)

Es evident qu'amb una region sonada "Occitanie", aquò anarà pas en se melhorant...

Sòrga : http://france3-regions.blog.francetvinfo.fr/le-blog-de-viure-al-pais-france3/2016/05/31/politique-linguistique-dans-les-pyrenees-atlantiques-oui-au-basque-non-a-loccitan.html

Collectif Ça’i : -25.000 € (subvention supprimée !)
CAP’Òc : -25.000 €
Calandreta : -21 000 €
Ràdio País : -12.000€
CFPÒC : -6.700€
InÒc : -6.000€
Lo Congrès : -5.000€
Letras d’Òc : -3.000€
Hart Brut : -2.000€
FIMÒC : -1500€
ÒcBi : -1.400€
Rien ne bouge pour le Carnaval Bearnés.

Pour les hausses :
Accents du Sud : +10.000€
Institut Béarnais Gascon : +10.000€
La Voix du Béarn : +6.500€
Ostau Bearnés : +4.000€
Conta’m : +500€

  • 10
  • 0
ltrobat Gasconha
19.

Hilh de puta, que'vs haré pelar lo cuu d'aperar la vòsta region "Occitanie Centrale" meilèu que "Occitanie"?
Que hè annadas qu'avem de's pelejar dab los separatistes linguistics de "l'Enstitut Bearnés e Gascoû". Dab las vòstas connerias que van poder convéncer hèra de monde que lo biarnés n'ei pas un dialecte occitan mes ua lenga distincta e que Biarn n'ei pas en Occitania...

  • 13
  • 3
Joan-Marc LECLERCQ
17.

#13 As cent còps rason, las regions francesas son pseudo-regions, lor budgècte e lors poders an ren de véser dambe las regions d'Alemanha o de l'Estat espanhòu (De memòria 20 còps mès bèths).
Empacha pas la question deu nom d'estar importanta en mestior d'imatge, tà jo.

  • 5
  • 0

Escriu un comentari sus aqueste article