Bandièra01 1180x150: Comuna de Tolosa

Opinion

Brexit e mèdias franceses

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Vòli pas jutjar lo Brexit. Es lo pòble deu Reiaume Unit qu’a causit, es fòrça mauaisit de díser dejà quinas seràn las consequéncias, e la decision aparteng pas qu’aus ciutadans britanics.
 
Non, çò que’m hascoc meslèu reagir es la pausicion estranha deus mèdias franceses. Am avut l’impression que hasèvan tanben campanha, com se lors legedors e escotadors èran tanben aperats a votar e que’us calèva convéncer a tota fòrça.
 
Un twitaire trufandèc escrivoc l’endeman deu vòte: “De pas créser, los electors britanics an pas seguit los conselhs deus cronicaires franceses!”
 
Pr’amor que, cau díser, la dusau estranhetat de l’eveniment estoc que la premsa exagonala, escrita o parlada, a hèit campanha a 100% ende que lo Reiaume Unit demorèsse dens l’Union Europenca. Se son totis ligats contra lo Brexit, çò que rebat pas brica lo sentit popular de l’Estat francés on, segon un sondatge recent, 60% de la poblacion vòu demorar dens l’Union lavetz qu’aquò puja a 100% dens los mèdias màgers. Me poderí trufar en dìser que puja quitament a mès de 100%.
 
Tresau estranhetat remercada: aquesta campanha s’estanquèc pas un còp las resultas sabudas. Au contrari, s’es descabestrade ende muishar que lo Brexit es forçadament una maishanta causa. Es logic: cau atupar lèu tota enveja de deishar l’Union de la part deus ciutadans de l’Estat francés.
 
Un reportatge “exemplari” de France Info m’amusèc fòrça. Un jornalista s’angoc dens un parçan on avèvan votat a 56% peu Brexit, e trobèc pas d’entrevistar sonque personas que n’an lo degrèu o qu’an votat contra.
 
Pas jamès dempuèi bèra pausa am pas vists autan d’articles redigits au futur-condicionau, ende descríver ço que’s va forçadament debanar, las mauescadudas piéger que podon arribar a un sol país, de la caduda de la borsa au besonh d’obténguer un visa ende viatjar suu continent.
 
La resulta d’aquesta campanha pòst-votacion n’es que los qu’an votat de òc au referéndum:
 
— son racistas
— son vielhs
— son pauc educats
— son deu campèstre
— an pas ren comprés a l’enjòc
— an regretat lor causida tra l’endeman.
 
Solide, aquò´s pas una mentida, com de costuma, mes pas qu’una focalizacion sus una part de l’electorat. Jamès lo Brexit auré pas obtengut la majoritat sens lo vòte de l’esquèrra deu Partir Trabalhista, e aquò joguèc un ròtle fòrça important, que nòstes jornalistas exagonaus an desbrombat.
 
Lo tèma màger de la campanha estoc pas l’immigracion, com nòstes mèdias volon hèr créser, mes lo hèit que las decisions politicas son presas en dehòra deu país e sustot per commisaris non-elegits, lavetz que lo parlament, un sembla-parlament qu’a pas lo poder de perpausar las leis, es la mira permanenta de grops de pression qu’an quitament lor burèu dens la medisha bastida.
 
L’aluenhamant deu poder deus ciutadans dens l’Union Europenca es un problèma vertadièr que cau préguer en consideracion pr’amor que pausa un problèma de democracia. L’ignorar e ne parlar pas hè pas que retardar una auta crisi democratica dens un aute país.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

manjacostel Murèth
6.

Polit article que mòstra plan lo gras d'enveirinament del "mainstream" franchimand. L'ENA, Sciénças Pò e HEC (Paris de segur) comprenon pas lo vòte britanic , coma comprenguèt pas lo vòte de 2005 sus la constitucion euròpenca e Mastricht . Milhor tenon en çò nòstre lo poder de mudar un non en òc . Autra diferéncia importanta, un anglés demissiona quand es batut, pas un elegit francés, jamai, meteis en preson, e que t'explica per de qué te sias enganat , e as mal votat !
Es coma aquò que la constitucion de la V èna permes ambe lo 49-3 de far passar un lei, quitament se seissenta del cent de la populacion es contra. França es pas une democracia a mai es una republica bananièra . La republica dels gròs fromatges "republicans" qué!

  • 4
  • 0
comtessa de Dia
5.

pòdi qu'aprovar un tal article e lo completar amb un autrte element de propaganda de la premsa e dei mediàos franchimands que l'immigracion a-tota-zuerta es benefica per nòstre pais e que lei novèlas populacions feniràn per beure lo pastis, jugar a la petanca e participar a la gay-pride"

  • 5
  • 8
Cafi
4.

#3 Pr'aquò i a ja de paradis fiscals en europa.
Aqui çai-jos lo taus d'imposicion sus las sociétats en Europa. (l'IS)

França : 36,1%
Belgica : 34%
Portugal 31,5%
Espanha : 30%
Alemanha : 29,8
Italià : 27,5
reialme unit : 23%
Irlanda : 12,5%

Mejana per l'U.E 27 paisses : 23,5

Atal totes los paisses aprèp França son de paradis fiscals.... e se compren que los investissor se n'anguent e que las societats fugisson França...!

  • 2
  • 0
Panamondin Tolosa
3.

Aquo va plan! Se seguissem la darrieras declaracions. Francia va perseguir l'accordi de cooperacion en materia de defensa nucleara amb un estat que vol aprep lo Brexit devenir un paradis fiscal!
Avem caçat nostre rei per finançar lo del veisin. Quina vergonha...

  • 2
  • 3
Cafi
2.

Ah n'i a que començon de comprener...! Val mai legir la premsa anglo-saxona!
E aquel Brexit que devia èsser la fin del mond al dire de la premsa frachimanda, de que ne vira !
Gaireben aprèp una setmana lo Footsie (indici borsièr de londres a ganhat 2,6% rapòrt a la velha del Brexit... Lo Dax (Frankfòrt e lo CAC 40 Paris qu'avian cabussat mai que lo Footsie demoran a -5% rapòrt a la velha del Brexit e patissan de tornar pujar...!
La liure esterling a demenesit de 9% rapòrt a l'Eurò çò que fa que los produches Anglès, son mai competitius que los d'europa suls mercats internacionals.!
Ara inglaterra demensis los imòts sus la societats de 20% van passar devèrs los 15% benlèu mens. D'aqui inglaterra serva tot çò atractiu.
Mentre aquel temps lo sèti de Tecnip quita Paris per Londres, Lo nSèti d'Alcatel muda los cimècs cap a Finladía, Lo Sèti de Lafargue-Holeim va en Suissa, lo Sèti d'Alsthom va als USA !

  • 7
  • 1

Escriu un comentari sus aqueste article