Bandièra01 1180x150: Comuna de Tolosa

Opinion

Los burèus d'abstencion

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Vaquí quicòm de navèth dens la vita politica. I aurà, ac sabètz, lo 23 d’abriu e lo 7 de mai l’eleccion presidenciala de l’Estat francés. De costuma, aquesta eleccion es la mès seguida peu public e es aquiu que l’abstencion es la mès baisha.
 
Se sap dempuèi bèra pausa que l’abstencion creish regularament e que lo divòrci entre la poblacion e lo monde politic es plan entamenat. Ende jo, es aquò una apreciacion personala, lo famós discors deu Bourget de François Hollande (22 de genièr de 2012), mentre lo quau digoc solemnament que “son adversari es la finança” abans de nomejar secretari generau de la presidencia, puèi ministre de las Finanças un banquièr recentament arribat de Rothschild, toquèc un som dens lo mesprès deus candidats de cap a sons electors, que qualifiquère mès tard de “sens de dents” abans de’us getar per carrèras gràcias a la lei dita “Trabalh”.
 
Peu monde que considèra que lo sistèma es de cambiar sancèrament pr’amor qu’es complètament desconnectat de las aspiracions deu pòble (qu’a fòrça evoluat, me sembla, dempuèi 1791), l’abstencion es una de las possibilitat. Solide, se pòt balhar sa votz au “mens pièger”, mes aquò fin finala neurís lo sistèma e representa l’assegurança que ren cambiarà pas jamès.
 
Lo problème de l’abstencion, es que los comentaires de la vita politica ne parlan gaireben pas, e la chifra es anonciada lèu lèu en debuta de serada electorala suu finestron, puèi es pas analizada. Generalament, l’abstencion es considerada com un “desbromb” deus electors qu’aurén preferit se n’anar a la pesca.
 
Doncas i a totjorn una mena de frustracion per l’abstencionista de véser que son accion, se s’i escad de neurir pas lo sistèma, es pas presa en compte.
 
I a tanben lo vòte blanc. Mes tanben, èra, dinc a pas guaire comptabilizat dambe los vòtes nuls e pas espiat coma un vòte de protestacion. Los votaires blancs, eth, saben plan se lor gèste èra o pas un signe de mesfisança de cap au monde politic, mes los analistas ac pensan pas.
 
D’un costat, se ditz que lo tipe qu’a votat blanc s’es desplaçat, çò que muisha qu’es un ciutadan concernit que’s vòu exprémer au lòc d’anar a la pesca, mes d’un aute costat, se ditz tanben qu’accèpta lo sistèma sens de trobar “per aqueste còp”, un candidat que l’agrada.
 
Caleré un vòte d’una auta color (rotge, négre), que seré plan clarament classificat coma vòte de protèsta, mes sus aquò podèm plan nos seitar e esperar bèra pausa.
 
Vaquí quicòm que pòt cambiar lo dar. Sus internèt (encara, solide!) se son daubèrtas paginas d’organizacion de burèus d’abstencion. Podètz trobar lo ligam dambe lo tèxte fondator aquí: https://www.facebook.com/notes/bureau-dabstention-2017/texte-fondateur-de-laction-bureaux-dabstention-2017/186417405178053.
 
La frasa màger de la debuta deu tèxte ditz: “L’abstencion assumida es un gèste ciutadan, un gèste politic fòrt, pòt pas estar interpretada coma una indiferéncia o una pana de civisme.”
 
En resumit, i aurà un pauc de pertot burèus d’abstencion on poderàn se retrobar monde que volon cambiar lo sistèma de cap a mès de democracia, de cap a un sistèma on lo “dret de vòte” es pas estat remplaçat per un “dret d’elegir”. Se tròban darrèr associacion ciutadanas de totas qu’an un projècte participatiu.
 
Peu monde que cranhen la pujada deu FN e qu’es aquò lor motivacion, cau saber que lo vòte ende la Marion (alias Marine) es màgerment un vòte de protestacion, e doncas perpausar una gèste protestatari diferent pòt desen·hlar l’escòre de la candidata de dreta extrèma.
 
Cresi que l’escaduda d’aqueste projècte serà pas immediata, vist lo pauc de temps que demòra e la participacion qu’es sovent fòrta per las presidencialas, mes se’s renavèla regularament, pòt aver una cèrta resulta, au mens psicologica, sus un escrutin mens frequentat.
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

fabre mureth
3.

Bonjorn,
E ben ieu , après lectura del programa dels insomès al primièr torn , m'agradi de votar per aquel programa, que volonta de nos sortir de l'UE , de l'OTAN de la 5ème republica, e de l'eurò .E que podrià titolar : las 4 sortidas. Cal èsser clar, disi sonque que vau votar per elses, per de que fau fisança als òmes e a las femnas que pòrtan lo programa , que l'an bastit,e que tot compte fach e rebatut , non pòdi me fisar a un òme providencial tot sol, coma o fan dins los autres partits . Mas soi lucid. Vesèm plan que totes los "presidenciables" son quitament de la mena jacobinaire, mas que n'i a pas qu'un que ten un programa clar tant pel nucleari, que per l'agricultura, per la santat , l'escòla ece.....E que me pareis plan enquadrat pels insomès justament .
Sabi que me soi fach engarçat per "l'enemic de la finança", un còp èra, mas cresi qu'aqueste còp , lo PS a acabat d'enganar lo paure monde. De tot biais, al segond torn, que se tròbe, anarai pas votar per sauvar la "republica" coma nos faguèrem amb lo carnaval Chirac-Jospin , sens oblidar que la pèsca serà dubèrta!!!!!

  • 1
  • 2
Bernat MM Tarba Bigòrra
2.

Adishats / Aloha !
A jo tambès, aqueras eleccions que me pesauien. Sustot eth prumèr torn, que me hè perder era hèsta de Sant Jordi en Catalunya...
Ben ! Auants de disnar, coma caijer cada dia, qu'èi lhegit eth madeish article en VilaWeb. Quin bon aire mos ven deth aute cap deth monde ! Cap mès besonh de causir enter tempesta e periglada :
Oscar Manutahi TEMARU qu'a auüt uas 511 signaduras e alavètz se presenta. Un polinesian clarament independentista entà secodir era França jacobina.
Demòri que totis eths votants entà eths drets deths pòbles e culturas e lengas de França prenguen conciença qu'auèm ara eth nòste candidat !!!!!!

  • 1
  • 0
9-N
1.

Me preparava a votar blanc a las presidencialas venentas. En efièch coma força electors, n'ai un sadol dels politicians professionals que n'an mai trebalhat seriosament de lor vida ( Hamon, Fillon, Melanchon, Le Pen) e mai, d'unes que son los representants de la finança internacionala (Macron).
E òc, soi un vertadièr populista !
Mas, o ai vist, uèi, sus Vilaweb, : l'Oscar Temaru, independentista polinesian, capitèt a recaptar 500 signaturas d'elegits e se presentarà . Doncas, quin astre de poder votar per un candidat fòra del circ politic exagonal.

  • 3
  • 0

Escriu un comentari sus aqueste article