CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Diluns, 26 d'agost

Joan-Marc Leclercq

Dimars, 4.4.2017 03h00

La campanha incresibla


Comentaris 4 comentaris    
Dolent Fluix Bo Molt bo Fabulós (2 vòtes)
carregant En cargament


N’èi coneishudas, campanhas de totas, mes cau díser aquesta es pas banala. Sèm quitament davant una situacion complètament navèra que pòt pas que’ns entercalhar.
 
Dempuèi las accions combinadas d’En Chirac e d’En Jospin qu’an instituït un regime presidenciau (redusida deu mandat a cinc ans e inversion deu calendari electorau), l’eleccion dirècte deu president a superat las eleccions legislativas com pas endacòm mès dens los paises comparaders.
 
Podèm citar que, au Reiaume Unit, en Belgica, aus Païses Basses, en Alemanha, en Italia, en Espanha, en hèit totis los vesins de l’Estat francés, son los escrutins peu parlament (sovent a la proporcionala) que ritman la vida politica. Dens l’exagòne, son estats redusits a gaireben ren, e un candidat que recep 50% + 1 votz deus sufragis exprimits (quitament dambe una abstencion de 99,99%) recep tanben los “plens poders”. Cau aver hitge end’ aperar aquò Democracia, mes bon …
 
Per çò de la campanha d’ongan, am atenhuts los soms de la fantasia.
 
Un còp èra, lo sistèma èra lo bipartisme. Puèi lo Front National se vengoc hèr una plaça importanta, en nombre de votzes mes pas en resultas estrategicas: dus deputats e nada region ganhada. Gràcias a son isolament e a sa marrida reputacion, lo “plafon de veire” sembla encara solide.
 
Ara sèm dens la situacion on divèrses elements inedits s’encontran:
 

— I a pas candidat “sortent”. Lo futur ancian president a pas volgut se tornar presentar dabans sons administrats. Benlèu sons petits 6% d’opinion favorabla l’an ajudats a demorar suau. E nat pretendent se reïnvindica pas de la politica miada dens las cinc darrèras annadas. Una nautat.
 
— Per consequéncia, totis los candidats se disen “antisistèma”, quitament los qu’estón elegits deputats en 1981 puèi ministre e capministre, los qu’estón cap de burèu deu ministèri de l’Economia en 1991, los qu’estón banquèrs d’ahars en çò de Rothschild, los ministres delegats a l’ensenhament professionnau en 2000 e senators dempuèi 1986, enfin, ende tot díser, se sentís plan que los “sistèma” es en dangèr dambe totis aquestes enemics declarats.
 
— Pas nat candidat deus partits “classics” de govèrn semblan en posicion de’s qualificar endeu dusau torn. Lo candidat naturau de la dreta es en·honsat per ahars deus grèus qu’es lo sol de trobar pas grèus. Eth qu’avèva apujat sa campanha sus la probitat, es plan colhonat. Se cau totun brembar qu’èra gratificat de 8% abans la primària deu partit e que vençoc per la fin. Dejà una situacion pas tròp banala en se medish.
 
— Lo candidat deu partit d’esquèrra qu’es au poder adara se retròba en cinquau posicion (!) de las intencions de vòte, deishat per una bona part deus sòcis deu partit, deus quaus ministres e un capministre.
 
— Lo candidat favorit, lo que deu ganhar se cresèm los sondatges au jorn d’uei, es un OVNI politic. A creat son movement i a un an tot escàs. Se ditz “ni de dreta, ni d’esquèrra” e a amassat una fortuna en tot trabalhar quate ans en çò de la banca Rothschild. S’es retrobat au som de las intencions de vòtes còp sec, lavetz qu’avèva pas presentat lo quite trocet de programma e monde tan diferents qu’Alain Madelin (ex dreta extrèma puèi dreta ultraliberala) e Robert Hue (ex Partit Comunista) l’an rejunhut.
 
— L’abstencion pòt plan aténher recòrds. Es anonciada a l’entorn deus 30%, çò qu’es dejà fòrça. E, de mès, au demiei deus que van (benlèu) votar, paucs saben ende qui. Pas jamès lo desenlusiment de cap aus politicians a tan senhorejat. Semblaré una presa de consciéncia deu pòble que “i a quicòm que truca” au Reiaume de França.
 
A situacion inedita, resulta inedita. Podèm pas pervéser çò que’s va debanar, mes sabi pas perqué, sentissi pas quicòm de bon sortir de tot aquò.
 
 


abonar los amics de Jornalet
 




 
 



publicitat
BANER1-2-3: DGPL AN LAFONT



Comentaris

4 d'abril 14.12h

Podrem pas votar Troadec o Temaru
Lo Partit de la Nacion Occitana (PNO) vos recomanda una solucion :
Lo vòte NUL en tot lisar dins l'urna un butletin "Occitània Liura" o çò que voldrètz que rapelarà que sèm occitans.

http://lo.lugarn-pno.over-blog.org/2017/04/presidentielles-2017-position-du-parti-de-la-nation-occitane-pno.html


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

4 d'abril 11.06h

Si los partis politics an pus d'influença sur los electors,. qui vai esser fondamental per ganhar : la prestança d'Asselineau o lo planh de Poton que dich : "si los medias me balhavan la paraula, segur que faria mai de votz".
Quò es los medias que fan la politica. Degun pòd emergear si a pas lo sosten daus medias oficiaus e tots los medias oficiaus an las mesmas ideias. Alaidonc l'òm pòd dire que los medias son pas liures e qu'obeissan a una dictatura que se cata. Coma un pòple liure ... Legir la seguida


Valora aquest comentari:   votar positiu 2   votar negatiu 3
Respondre comentari replica Comentari inadequat   Formulari d'abús de comentari

4 d'abril 08.56h

Res de bon ne sortirà? Mas sèm acostumats! Res de bon es pas jamai sortit de la vida politica de l'estat colonial!

Tenèm la causida entre doas vias: siá contunhar de venir encara mai capbords en gaitar los "divertissements" de la TV coloniala, siá anar far de politica dins lo sol endreit ont lo pòble encara es ausit: las carrièras.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

4 d'abril 05.23h

L'amusant es que per aventura ièr a la cadèna TV FR3 an difusida una biografía favorabla de Giscard. Giscard Macron una semblança aristocratica qu' anoncia un monarca ? Chirac/Jopin o lo cofrage del cor de la republica avant lo colar de betum ? L'amusant es que avans de vos legir me desvelhèri en pensar après una chauchavièlha sens rapòrt dambe las eleccions que fin finala lo primièr partit en Francia n'aviá ni eslogan ni tropas fanatizadas ni cap orgulhós, amor es lo PN Partit Nihil... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions