Bandièra01 1180x150: Comuna de Tolosa

Opinion

Subervivoi lo Woodstock polonés!

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Lo hestenau mès coneishut de Polonha s’apèra Przystanek Woodstock (Estanc Woodstock). Bohava ongan sas 23-aus candelas e se pòrta meslèu plan. A haut o baish la medisha edat que non pas Gouel an Erer Kozh bretonas (Los vielhs brabants), mes la capacitat es pas de comparar. Se lo hestenau de Karaez pòt recéber unas 280.000 personas, lo de Kostrzyn n’arcuelha 500.000.

Coma la vila organizatritz se tròba a la quita frontièra polono-alemana, se pòt pensar qu’es un rendètz-ve meslèu internacionau. E ben, pas brica. Solide lo trin Berlin-Kostrzyn carreja pialats de punks alemans uglaires e embierats, mes los estrangèrs son lèu negats dens la horrèra e se remercan pas. Tot es escrit sonque en polonés e los devises son pas revirats.

Los desagradiments costumièrs son los d’un hestenau de ròck: brut la nueit sancèra, impossible de clucar, hanga quan plau, posca quan hè bèth temps, frequéncias bassas que’vs desarriga lo cap a cada moment, cordèras ende la docha, los pishadors, crompar de qué minjar, de qué béver, etc ...

Mes un hestenau polonés a solide trèits de caractèr pro inabituaus que podon susprénguer l’estrangèr.

Purmèr, los Poloneses son fòrça “zen”. Un miei milion de piris, cervesa a sadorada e pas nat problèma. Cau díser qu’an la mestresa deu subjècte. Quitament se las cordèras d’espèra a la docha per exemple hèn 200 mètres, veseratz pas degun romegar. A comptar d’una cèrta ora, s’i pòt anar dochar sens aténguer, mes eths i preferiscon anar totis amassa e s’estar devath lo sorelh los geina pas. Son zen e la jògan collectiu.

Un parçan deu hestenau, aperat Akademia Sztuk Pięknych (Acadèmia de las Bèras Arts), es consacrat a associacions de totas qu’agisson per una causa: contra la patida de las bèstias, contra l’omofobia, end’arcuélher los refugiats, contra l’autisme, etc ...

S’i tròba un empont daubèrt aus debats on se pòt escotar un curat, un generau d’armada o lo Robert Biedroń, lo conse de la vila de Słupsk, coneishut end’estar un politician que declarèc daubèrtament son omosexualitat. Es curiós que Polonha es pas forçadament avançada per çò qu’es deu subjècte, levat dens la classa politica. Cau pas doblidar que los Poloneses mandèn un deputat transsexuau au parlament.

Puèi, se trobatz tre l’entrada tendas d’informacion end’ajudar a lutar contra l’adiccion, trobaratz tanben Przystanek Jesus, dambe son empont e sa programacion particulara. Curats e monjas se passejan en tot batalar dambe punks a cresta ende’us tornar brembar que Jesus los aima.

Sens de dobte arriban a la conclusion que Yeshoah ben Yosip èra plan lo purmèr punk de son epòca, çò qu’es pas complètament faus.
 
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrgi Lourdil Sent Gaudenç
2.

'Yeshoah ben Yosip èra plan lo purmèr punk de son epòca, çò qu’es pas complètament faus'.. Pas complètament vertat tanpòc, se disiá pas ben Yosip, ja que son paire èra pas lo Yosef, èra l'Esperit Sant, doncas lo filh se sonava meilèu bar Maryam (filh de Maria en aramean). Urosament que sa maire s'apèrava pas Tabac, remarca.. E son petit nom, au drollet, èra Jesús, un petit nom tipicament espanhòl en sovenir del grand (del costat de la la maire) qu'èra supausadament d'aqueste país (en realitat èra de Lorda e s'aperava Sans-Lop mès bon, com èran en Palestina, avián lo dret de confondre). Urosament que i a de lectors serioses per rectificar un bricalhon las assercions que legissèm dins aquesta revista.

  • 1
  • 0
Lo raiòu Cevenas
1.

Siái pas un afecionat de ròck. Mès dinc lo ròck, diriái qu'aqueles de las annadas 50 e 80 son los que mai m'agradan. Aquò's la curiositat que m'a menat a lo legir l'article. E finalament, o regrète pas !

  • 0
  • 0

Escriu un comentari sus aqueste article