Bandièra01 1180x150: Comuna de Tolosa

Opinion

Com faussar un reportatge

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Dens lo debat: “ Vau milhor l’informacion sus la telaranha o au finestron?”, cau saber una causa. Sus internèt, l’informacion pòt estar faussa, es a díser raportar una hèita imaginària que se’s pas brica debanada, apujada sus un imatge qu’a pas ren de véser. Per contra, gràcias au hialat mondiau, atz accès a informacions qu’auretz se que non pas jamès coneishudas. 
 
A la television, i a fòrça rarament quicòm de faus o de pas verificat. Per contra, l’informacion pòt estar desformada, parciala, amagada, e de tot biaish es tostemps subjectiva. N’èi aquí un exemple recent. 
 
Se passa sus la cadena Numero 23, dens lo magazine Révélations presentat per Yasmine Oughlis cada diluns a 20:45. Lo tèma un còp èra lo veganisme, mès lo tèma es pas important, auré podut estar quicòm mès, sol lo biaish dambe lo quau los jornalistas trabalhan compta. 
 
Cau saber qu’una còla de television qu’arriba en quauque lòc (dempuèi París sovent) ende rodejar un subjècte sap dejà çò qu’es venguda filmar. An dejà lo montatge prèst dens lo cap. L’èi viscut jo un còp, vos ac condarèi un jorn. 
 
Doncas nòsta còla desbarca en çò d’un pair que viu sol dambe son hilhòt de cinc ans de cap a dètz oras deu matin. Decidís que vòu filmar un dejunar. Lo problèma es que lo nenet a dejà dejunat e qu’a pas tròp hami. Lo pair decidís doncas de’u balhar sas coquetas preferidas. Mes es pas possible, la marca se vei tròp e seré una reclama a gràtis. Los jornalistas demandan d’aprestir quicòm de mès neutre. Serà lavetz una lesca de pan dambe confitura. Mes au moment de balhar la margarina, lo dròlle, qu’a pas hami, ditz: “Aimi pas la margarina”. E lo pair sap plan qu’es pas vertat e le balha totun suu pan. 
 
Resulta: au finestron, comentari deu jornalista: lo praube dròlle es obligat per son pair de minjar a l’esdejunar quicòm qu’aima pas. Mes i a piéger. 
 
La còla vòu filmar lo tipe quan hè las crompas. Re-problèma: podon pas rodejar aquiu on crompa de costuma per rasons d’autorizacion. Causissen un autre endret, on nòste pair vegan va pas jamès pr’amor qu’es fòrça tròp car. Lo jornalista ditz qu’aquò rai, çò de màger es de filmar l’accion de crompar, lo cadre serà pro sarrat ende pas véser lo lòc vertadèrament. 
 
Lo pair crompa, es filmat, mes la camera preng de près los prètzes e lo comentari serà au telon: la viòca vegana es cara, es pas balhat a totis de’s poder neurir atau. 
 
Resulta de tot aquò: pas nada analisi, pas nada informacion sus çò qu’es lo veganisme, sas rasons, la patida animala, l’especisme, l’impacte environamentau, la santat, l’espleitacion de las tèrras arablas en Africa, etc ...
 
Sonque una impression anecdotica d’un pair drin bobo qu’obliga son hilh de minjar causas qu’aima pas pr’amor d’una tintèina personala inexplicada.
 
 

abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi!
1.

Bon article plan emparat.
La farlabica se flaira mès que mès quant tot es a carga, mès es de mal demonstrar e provar.
Dins aqueste cas, les faits son vertadièrs, e le reportatge n'es pas fals.
Le reportaire piètga e manipula de faits; aquò's farlabicar un reportatge.

  • 0
  • 0

Escriu un comentari sus aqueste article