Bandièra01 1180x150: Comuna de Tolosa

Opinion

Mon telefonet apreng l’occitan!!!

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Mon telefonet se moriscoc recentament sens de pervénguer, e me’n caloc crompar un aute. Vos estauvi lo moment quan n’èi comandat un sus la telaranha mes que’m calèva picar lo còdi que devèvi recéber … per sms. Ren que de fòrça banau, fin finala, levat qu’èi cambiat de sistèma, èi escambiat una pometa contra un HuaWei (huá wéi 华为, que vòu díser haut o baish “trabalh plan hèit”), una marca chinesa, basada a Shenzhen (va plan, qu’i soi anat un còp) a l’accionariat salariat.
 
A mon edat, se retrobar dambe un sistèma navèth suu tindarèu, me hascoc me sentir com un monard qu’auré trobat un relòtge deishat dens la seuva per exploradors. Tot es contectat, i a imatges qu’apareishen còp sec atau sens que sàpias pr’amor o çò qu’es exactament.
 
M’a calgut un drin de temps ende m’acostumar. I a sustot quicòm qu’avèvi pas abans, es un clavèr Google dambe corrector d’ortografia que’t perpausa tres mots tanlèu qu’as començat de picar las purmèras letras. A la debuta pòt estar risolièr, mes après te corregís çò qu’escrives sens qu’ac volhas e aquò pòt vénguer francament peniu. Te bota un accent sus la “a” ende’t hèr un “à” franchimand sens de’t demanar l’autorizacion. Solide lo sistèma a pervist qu’escrivas en francés. E totun ...
 
Dedins aquesta maquina, i a un algoritme. E un algoritme, es quicòm de tarrible, mon praube. Au cap d’un moment, benlèu cinc jorns, quan escrivèvi “a”, comencèc de’m perpausar “lèu”. Cau avoar que n’avoi una estrèita. Quan escrivoi “ad”, me perpausèc còp sec “adiu”, puèi “l’amic” en seguida.
 
Calèva plan comprénguer que lo telefonet apreng çò qu’escrivi, e doncas apreng l’occitan. L’algoritme enregistra los mots mès sovent utilizats e te’us bota en haut de la lista. E un telefonet chinés, aquò apreng lèu lèu, pr’amor qu’un telefonet chinés, es pas con. Me cambia de mon tractament de tèxte qu’eth, sap pas çò qu’es l’occitan gascon, que deu estar un jacobinàs.
 
Mes i a pas qu’aquò. Èi descobèrt tanben lo reconeishença vocala, es a díser qu’as pas mès besonh de picar çò que cèrcas sus Google, sufís pas que’u demandar cortesament en tot parlar. Fonciona plan, mes es limitat. En francés i a pas nat problèma. Mes quan èi dit “lo jornalet”, a comprés “le journal est” e m’a perpausats sitis de gasetas, en purmèr Les dernières Nouvelles d’Alsace.
 
“Lo Congrès” estoc pas comprés tanpauc, qu’a escrit Loukoum Grèce e m’a perpausat d’ensajar dambe l’ortografia Loukoum Grec, puèi m’a muishat una pagine de recèptas e la fica Wikipedia suu locom.
 
“La Setmana” a balhat La Saint Manon! Benlèu es un aparelh a trobar jòcs de mots ...
 
Èi ensajat Gazeta Wyborcza, lo diari màger polonés, e mon Google a plan comprés çò que calèva.
 
La filosofia de tot aquò? En tot seguir la cultura occitana, Google es dens la civilizacion de l’escrit mes pas de l’orau.
 
 
 




abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi! 31
6.

#5 aconselhi la conjugason gascona, la qu'emplega lo Joan Marc, qu'es la mai regulara.
Parlar => parlava, aver => aveva...

  • 0
  • 0
Pèir
5.

#1 Lo vèrbe PARLAR fa ParlAVA a l'imperfait....

  • 1
  • 1
pèir
4.

Lo clavièr predictiu Swiftkey per telefònes e tabletas (tauletas?) disponible per Android e Iphone, suggerís fins a 5 lengas a l'encòp dont l'occitan.

  • 0
  • 0
Emmanuel Macron Palais de l\'Elisi
3.

Polit article.
Aquò me fa pensar qu'ai lo cervel predictiu tanben, que me fa díser en public, çò que disi a l'ostal amb la macrona.
Que me lapsi la lenga, que fau de pecas!
Lo darrièr còp, ai anonçat la fin de l'estat de dreit..., e mon papagai de Collomb parièr darrièr!
Paréis que los occitans lapsan sens o vóler d'expression en patés, que son indesparasitables!

  • 0
  • 0
Joan-Marc LECLERCQ
2.

#1 Vesi totun una diferéncia. Quan èi picat "nom d'utilizator", m'estona pas que l'aja enregistrat.
Mes quan piquèi "adiu" e que'm perpausèc "l'amic", estoc una suspresa. Es una mena d'anticipacion de çò que vas díser.
De tot biais, soi pas un afogat d'informatica (se vei) e l'article es meslèu ende los ninòis en informatica coma jo. Èi exprimit çò qu'ei ressentit davant aqueste sistèma que coneishèvi pas.

  • 2
  • 0

Escriu un comentari sus aqueste article