Bandièra01 1180x150: Comuna de Tolosa

Opinion

França: bonapartisme’s not dead

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
França serà pas jamès benlèu una democracia vertadèra. Pr’amor? La rason es simpla: lo Franceses, de per l’educacion que receben, foncionan dambe dus concèptes encapejats deus quaus se pòdon pas desbarrassar, que son lo prestigi nacionau e l’idèa deu “gran òmi”.
 
Es aquò qu’apèri “bonapartisme”, es l’idèa qu’òm pòt roganhar suus drets democratics en escambi d’un prestigi de l’Estat (aperat “Nacion”). Aqueste prestigi, de mès, pòt estar simplament teoric e recàder pas que dens lo país eth medish. Sufís pas que díser aus Franceses que “la Tèrra sancèra les enveja per lor qualitat de vida, lors vins e lors fromatges” e haut, ne hètz çò que volètz.
 
I a agut recentament dus avatars de çò qu’apèri bonapartisme, dus trufandisas deu bon pòble (nòstes vesins dison foutage de gueule) cobèrts deu veu blau-blanc-rotge de la fiertat, la que vos hè tot engolir. 
 
Purmèr lo viatge de la delegacion deu comitat olimpic francés a Lima, capduelh deu Peró. En resumit, lo Comitat Internacionau Olimpic organizèc la ceremonia d’anóncia de las vilas organizatritz deus jòcs de 2024 e 2028. Cau saber que vilas concurrentas coma Hamborg, Boston o Budapest an, eras, tengut compte de l’avís de lor populacion dambe, per la vila de Hamborg, quitement un referéndum lo 29 de noveme de 2015 on lo “non” ganhèc (en març, un sondatge avèva balhat 64% de “òc”). En França, lo país sancèr èra a 120% a favor deus Jòcs … segon la consa màger de París.
 
Demoravan pas que duas vilas per dus jòcs e se sabèva dejà que seré París per 2024 e Los Angeles per 2028. Pas nat suspens doncas. Se la delegacion de Los Angeles comprenguèva un trentenat de personas, la de París èra formada de “entre 250 e 320”, vist quela chifra precisa es pas coneishuda.
 
Un avion especiau naulejat, totis estón lotjat a Swissôtel, una ostalaria de 5 estelas. Mes calèva la serada de victòria sia au nivèu de l’eveniment, e totis sopèn dens un deus mès prestigioses  restaurants deu monde (Astrid e Gaston), arren qu’aquò. Una hèsta a tot petar tota la nueit, es normau, es lo contribuidor francés que paga l’aunor de recéber los Jòcs en çò son.
 
Cau saber tanben que la ceremonia pervesèva pas que 60 plaças peus delegats e que doncas lo demès la seguissèn a l’ostalaria au finestron.
 
Mediapart avancèc la soma de 1,5 milions d’euros ende la pichona benalèja. Tony Estanguet (dambe un tau nom!...), president deu comitat parisenc, expliquèc totun qu’aquesta chifra e pas pagada qu’a mieja per l’Estat e compreng tanben lo rodatge deus filmes de propaganda remeses au sòcis de comitat internacionau, mes nos assabentèm mès tard que s’agissèva en hèit de las retòcas de vièlhs films qu’existissèvan dejà.
 
Segon lo Canard Enchaîné, lo quite ministèra de las Finanças se chepica de “salaris deu comitat d’organizacion que pausan problèma”, coma lo deu president Estanguet de 450.000 per an, e deus “prèmis de succès” (entre 4.500 e 34.500 euros) balhats a un sessantenat deus participants au petit viatge a Lima.
 
Mes bon, qu’es aquò a costat deu prestigi de recéber los Jòcs Olimpics a París? Cau estar un pisha-vinagre de purmèra ende romegar sus la moneda.
 
Lo dusau avatar deu bonapartisme se tròba dens los 440 000 euros (mens que T.Estanguet!) per an que seràn investits dens la mission de representacion nacionala de Brigitte Macron, hemna deu president. Sus 5 ans, despassam los 2 milions d’euros.
 
Sus aquò, ren de díser, cau pas criticar abans de véser, sèm pas qu’a la debuta, sabèm pas çò que va s’en seguir d’aquesta “representacion nacionala”, benlèu que lo caumatge e lo taus de CO2 dens l’atmosfèra van baishar.
 
De seguir doncas …
 
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Victor Uc Sant Circ
1.

Bonaparte, o mala parte ? Corta e clara, l'analisi. M'agrada plan.

  • 6
  • 0

Escriu un comentari sus aqueste article