CAPÇALERA2: Entèsta drecha, convergéncia occitana-fixa

Jornalet, gaseta occitana d'informacions

Dissabte, 16 de decembre

Joan-Marc Leclercq

Dimars, 21.11.2017 03h00

L'estranh sénher Mélenchon


Comentaris 9 comentaris    
Dolent Fluix Bo Molt bo Fabulós (6 vòtes)
carregant En cargament


Avèvi l’idèa d’escríver aqueste article dejà dempuèi bèra pausa, e tot sobte vaquí que l’actualitat m’a despassat. Parli de l’ahar qu’opausa ara lo deputat Jean-Lun Mélenchon au magazine l’Express, polemica que comentarèi pas que’ns sèm pas benlèu qu’a la debuta e que, fin finala, aurà benlèu pas un rapòrt dirècte dambe çò que vòli díser.
 
Sèm en 2016. Lo govèrn d’Emmanuel Valls e lo Partit Socialista son venguts fòrça impopulars au uelhs de son electorat d’esquèrra pr’amor de lor politica economica e sociala que hascoc devarar lo monde per carrèras. Las eleccions venentas pòrtan l’auburi de la des·hèita. D’un costat Emmanuel Macron s’avia, de l’aute a man esquèrra, un baloard es dubèrt. Lo petit pòble d’esquèrra vòu votar end’un corrent progressiu e desbrembar las marridas annadas Hollande. A dreta, François Fillon hè paur dambe son devís fòrça dretista, lo Front National, solide, tanben.
 
Ende ganhar, sufís pas que de’s juntar. Impossible. Jean-Luc Mélenchon se presenta purmèr en tot tuar tota espèr d’union d’esquèrra a la quala la victòria poderé aparar los braces. Lo candidat ecologista, Yannick Jaddot, se desistirà au profieit de Benoît Hamon, lo candidat socialista vencedor de Valls, mes lo camp progressista demorarà dividit. Sabèm ara qu’estosse l’union estada possibla, lo candidat d’esquèrra seré estat qualificat peu dusau torn e seré sens de dobte elegit president. Las chifras ac dison.
 
Jean-Luc Mélenchon hascoc tot çò de possible end’empachar l’esquèrra de ganhar las eleccions, es a díser que pausèc las duas condicions: 1/ atirar un elector d’esquèrra, sustot joen, peu programa mès interessant, novator e marcat ad esquèrra 2/ isolar aqueste electorat d’una possibla union dambe fòrças mès centristas.
 
Lo nom de la formacion France Insoumise, n’es l’exemple mès evident. Es pas brica amassaire. Lo logotipe de la letra grèca Φ que’s sembla fòrtament quauqu’un que hè la higa n’es un aute. Lo discors, plan hèit (lo tipe es professor de literatura e parla fòrça plan), s’emplegarà de sedusir los joens esquerrista en tot hòragetar los sociaudemocratas mès tradicionaus.
 
Error de comunicacion? S’assegurar que l’amassada deu bon pòble d’esquèrra se hasca pas au moment d’una eleccion que’s pòt ganhar es, ende jo, pas brica una error end’un vièlh reinard de la politica coma lo Mélenchon. Cresi qu’es una volontat.
 
Me brembi plan deu Jean-Luc au ser deu 21 d’abriu 2002, quan lo Lionel Jospin estoc eliminat de l’eleccion presidenciala, hòu de ràbia, qu’arcastava aus electors d’esquèrra d’aver virat l’esquina au PS pr’amor de “petits detalhs qu’agradavan pas au lòc de jogar l’union contra la dreta”. Èra benlèu una analisi de las bonas que hascoc lo senator de l’epòca, mes lavetz, pr’amor hèr tot lo contrari adara?
 
Aquí que tròbi tres solucions:
 

— Lo Jean-Luc Mélenchon es, coma totis los politicians en vista, plen de si medish au punt de’s promòver en defavor deu ben comun.
 
— Lo Jean-Luc Mélenchon es un colhon e un marrit estratègue.
 
— Lo Jean-Luc Mélenchon jòga lo ròtle de l’òmi d’esquèrra mes es missionat ende torpilhar tota possibilitat d’escaduda d’un corrent sociau e progressista.
 
Soi solide qu’atz dejà optat ende la purmèra solucion, mes vos demandi de regetar pas tròp lèu la tresau.
 
Ma teoria: los 1% (biais mès brac de parlar deus que possedissen la majoritat de las riquessas) an pas enveja de jogar lor fortuna a cada eleccion, es tròp riscat. Lor cau s’assegurar que l’òmi que serà elegit (abans i avèvan duas possibilitats: presidencialas e legislativas, ara n’i pas mès qu’una, mercés sénher Chirac e Jospin) agirà dens lo sens de lors interèsses. Sufís pas lavetz de causir una personalitat que posca s’encuentar de l’electorat “anti-rics”. Es pas tròp complicat quan atz los mejans.
 
Jean-Luc Mélenchon a lo perhiu. Intelligent, orator talentuós, mès pròche de la fin de la carrièra que non pas de la debuta, reganha pas au con·hòrt e possedís una petita fortuna estimada a mès d’un million (dinc a dus segon una sorgas). Un cas de corrupcion?
 
Se cau pas enganar, la question pòrta pas sus Mélenchon eth medish, mes la possibilitat deus 1% de’s “crompar” politicians.
 
 
 
 


abonar los amics de Jornalet
 



publicitat



Comentaris

30 de novembre 07.19h

Vesi qu'es de plus bèl clicar sul roje, que d'argumentar!
Cal ajuxtar l'abstencion fòrta als segondes torns demest les rengs d'esquèrra, per fin de sostèner pas la falsa esquèrra. Es un periòde de recomposicion. Parièr amb les sindicats...
Amb aquò, ai pas vist fòrça monde a las manifestacions, que déven se sènter pas tocats.
Sèm entornats d'una massa d'individualistas despolitisats, e cal nadar al mitan de tot aquò, mès cal pas plànher ni ajudar degun, se non qu'es d'esquèrra... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

22 de novembre 23.56h

Èri acostumat amb JM Leclerc a d'articles de qualitat, mès aquel passa la talha.
Per tant que se pòsque planher la desunion de l'esquèrra francesa, s'en pòt pas mai personalizar una responsabilitat, quand las decisions de programas e d'aliganças son collectivas en democracia.
Amb aquò, n'i a pas gaire de marge de manòbra social e ecologic a l'esquèrra, en economia dubèrta a la concurréncia salvatja del liberalisme mondializat, se s'exclutz d'en sortir mai o mens, denonciant les pacte... Legir la seguida


Valora aquest comentari:   votar positiu 0   votar negatiu 4
Respondre comentari replica Comentari inadequat   Formulari d'abús de comentari

22 de novembre 07.15h

#3 En tot cas, mai que non pas basco, Miguelito de mi corazon.


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

21 de novembre 21.07h

Plan vist.
E se pòt exactament çò meteis pels "progre" de Podemos/Podem de l'autra caire dels Pirinèus.
Quand es que los occitanistas se van bolegar lo tafanari per formar dins l'exagòn una esquèrra vertadièrament d'esquèrra?


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

21 de novembre 11.43h

Mancaria mas pus que Mélenchon faguessa eligir dau monde coma Olande, Vals, Hamon que son au servici de las multinacionalas sos la crubertura de democrate. E l'òm auria pus elegir DSK au nom de l'esquerre a las eleccions d'i a 5ans; DSK que balha dau conselh a Macron per far la mesma politica.

Lo monde que se disan d'esquerre e que pensa mas a determinar lo qual daus dirigeants es lo melhor, pusleu que s'interessar au contegut e a las consequenças de lòr programme e discors. commençan ... Legir la seguida


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

21 de novembre 10.55h

1) Estant son comportament davant los partit comunista a las darrièras eleccions, considèri ieu la tresena possibilitat (Lo Jean-Luc Mélenchon jòga lo ròtle de l’òmi d’esquèrra mes es missionat ende torpilhar tota possibilitat d’escaduda d’un corrent sociau e progressista) coma la mai evidenta.

2) Un òme que considèra pas las lengas e los pòbles coma egals entre eles non es un òme d'esquèrra : es un colonialista de dreita, qué que ne crega.


Valora aquest comentari:   votar positiu 9   votar negatiu 0
Respondre comentari replica Comentari inadequat   Formulari d'abús de comentari

21 de novembre 10.53h

#1 Mentre que Manolito Valls, si que o es ?


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

21 de novembre 07.23h

Pro d'aquel conard !!!


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

21 de novembre 06.51h

Cau raperar tanben Melechon es pas catalan.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions