CAPÇALERA2: IEA-AALO

Jornalet, gaseta occitana d'informacions

Dimècres, 21 de novembre

Joan-Marc Leclercq

Dimars, 19.6.2018 03h00

Lo Claudi Sicre e mai 68


Comentaris 21 comentaris    
Dolent Fluix Bo Molt bo Fabulós (5 vòtes)
carregant En cargament


Lo Claudi es pas mès de presentar. Lo “doctor Caishon” a dejà daishat una pedada de las bèras dens lo maine culturau e musicau dambe unas bravas escadudas coma los Fabulous Trobadors, lo concèpte de Linha Imaginòt, lo Cairehorc Naut-Bernat, los repaishes de barri e lo Forom de las Lengas. Escrivoc i a pas guaire un tèxte (en francés) sus son vejaire de mai 68 au parat deu cinquantau anniversari, que podètz legir aicí: http://fabrica.occitanica.eu/lab/19526
 
Tre la debuta, anóncia que va prénguer a contrapeu tot lo monde, e aquò, pensatz, es pas hèit ende’m desagradar. La tòca deu tèxte es de des·henlar a l’encòp l’originalitat e las consequéncias deus eveniments d’aquera annada, o, benlèu de’n balhar un espiar mens idillic o mens fantasmat.
 
Soslinha lo hèit qu’idèias ditas “de mai 68” existissèvan abans o son arribadas mès tard.
 
Lo dusau punt que vòu ensenhar es la manca tarribla d’imaginacion que marquèc aqueste període, en contra de tot çò que podèm pensar, e au contra l’ahortiment deu “provincialisme” que l’acompanhèc.
 
Los acòrds de Grenelle marcaràn solide la fin de la “revolucion” deus estudiants venguts de mitans sociaus meslèu privilegiats e permeteràn aus obrèrs “d’acabar de s’emborgesir”.
 
Mes çò que va interessar mès un legedor deu Jornalet es solide lo darrèr paragrafe suu movement occitan, entitolat estranhament “Enfin revelada LA SOLA EPOPÈIA, etc, (véser introduccion)”.
 
E aquí, entram dens un biaish de pensar interessant, ric e pleat de referéncias, mes, ac cau díser totun, pas tròp clar. Çò que podèm aperar “lo castanisme” (en tot estar segur de s’enganar coma es aisit de s’enganar en evocar un -isme) estoc tostemps ende jo, e benlèu pas sonque jo, una filosofia fòrça interessanta (pr’amor que luenh de tot arrebotit) mes tanben fòrça complèxa e los devises qu’i hèn referéncia son tostemps basats sus preaquesits suu subjècte que son, fin finala, absents.
 
Vos tradusissi un tròç en exemple: La complexitat de la question occitana es tan grana que desfisava, e desfisa totjorn, l’intelligéncia (tot simplament pr’amor qu’es lo malhon copat, o absent, de la cadena de pensada que permet la compreneson de l’istòria de las idèias en França) (e aquò’s tostemps d’aquesta cadena estant que totis comprenèm lo monde) (pausi atau amassa tota l’umilitat e tota la grandor de nòsta tasca) (mes sol Ècho respon a la votz) (non pas, lo ríser deus dius d’Omèr me hè a còps uns signes, e m’assabenti de çò que Tocqueville, Jaurés, Mendés e de Gaulle an purmèrs començat d’examinar las tèsis, aquiu on son).
 
Gausissi, pr’amor qu’èi pas jamès paur de passar per un colhon, díser qu’èi pas comprés. E pas sonque pr’amor de las cinc parentèsis que’s seguissen.
 
Lo castanisme (perdonatz un còp de mès aquesta facilitat de lengatge) me sembla tanben ténguer una pausicion originala e fòrta sus la question de l’organizacion de l’Estat, mes aquesta pausicion es sovent de mau sasir pr’amor que los tèxtes que’n parlan son basats, coma disèvi mès haut, suu hèit que’n devèm conéisher los principis fondators, çò qu’es pas sovent lo cas. Diserí que manca un drin de pedagogia.
 
Una frasa coma aquesta: (es haut o baish dejà hèit adara, levat en çò d’uns rares intellectuaus) (que parlan d’exili ende la mobilitat geografica interiora, que parlan tanben de colonialisme interior e d’escambi inegal, etc., sense aver pagerat totis los apòrts de la centralizacion) se pòt prénguer a mès d’un nivèu, segon que descobrissètz peu purmèr còp lo que la formula o pas, sustot suu “apòrts de la centralizacion” que demanda d’estar desvolopat.
 
Es pr’aquò que’vs convida de léser aqueste tèxte fòrça ric en interessant qu’estoc escrit ende hèr reagir lo monde (vos convida doncas tanben a reagir), que balha a l’encòp un espiar navèth e interessant en tot  restablir unas vertats sus un periòde que hè ara dejà part de l’istòria.
 
 
 


abonar los amics de Jornalet
 



publicitat
BANER1: IEA-AALO



Comentaris

30 de junh 13.09h

#1 #10 #16 #18 #20 E constatarètz que luòga de s'explicar lo S...s'acontenta de trafegar las règlas en cliquejant de "negatius" coma una monaca tamborinaira.


Valora aquest comentari:   votar positiu 11   votar negatiu 5
Respondre comentari replica Comentari inadequat   Formulari d'abús de comentari

29 de junh 18.14h

#19 Oc, lo problèma es que aqui ont l'actuala presidenta de l'OPLO es pas brica occitanofona (e om pot legitimament se demandar de que fai a-n-aquel poste, mas aquo son figas d'autra canastela) Sicre l'es e seria capable d'escriure sas dichas en occitan mas o-fai pas VOLONTARIAMENT. Perdeque ? Soi pas dins son sicap, mas per aver costejat lo tipe ai agut tot lèser de constatar qu'èra pas de tot a son aise dins una convèrsa sostenguda en occitan. Al cap d'unas minutas passa lèu al francès ... Legir la seguida


Valora aquest comentari:   votar positiu 33   votar negatiu 13
Respondre comentari replica Comentari inadequat   Formulari d'abús de comentari

27 de junh 23.40h

Que brembi au monde que s'estona de véder lo Claudi Sicre escríver en francés qu'avem tanben l'escadença d'aver ua presidenta de l'OPLO que ne parla pas un mot d'occitan, quitament quan deu har un discórs au parat d'ua manifestacion publica...


Valora aquest comentari:   votar positiu 16   votar negatiu 10
Respondre comentari replica Comentari inadequat   Formulari d'abús de comentari

27 de junh 19.06h

#17 La "pensada sicrenca" (!!) coma disètz considèra que quand cal parlar de causas seriosas al sicut de l'oc o-cal far en francès puslèu qu'en occitan. Quand parlatz occitan (coma dins Jornalet, diari entièrament redigit en occitan) vos impausa l'us del francès , ço qu'es una plan curiosa concepcion de la defensa de la lenga nostra. Manas Roquetianas a tras que rason de dire qu'om imaginaria pas un Lluis LLach respondre sistematicament en espanhol a de medias catalanofons. Sens caure d... Legir la seguida


Valora aquest comentari:   votar positiu 35   votar negatiu 24
Respondre comentari replica Comentari inadequat   Formulari d'abús de comentari

26 de junh 21.24h

Lo contengut d'aqueste comentari es ocult perque es estat considerat inadeqüat pels legeires de Jornalet
Mostra'l


Valora aquest comentari:   votar positiu 0   votar negatiu 32
Respondre comentari replica Comentari inadequat   Formulari d'abús de comentari

25 de junh 09.15h

#13 Lo vielh Sicre, un Pessamessa de mai ? Perque pas, se consent a escriure en occitan. Om se demanda contra qui fai de provocacion en s'entestardisant a francimandejar tre qu'escriu al Jornalet. Una postura a la Pessamessa, estèrla e patetica. S'aquo li ajuda a viure, pecaire...E clica que clicaràs ! Tssss....


Valora aquest comentari:   votar positiu 41   votar negatiu 34
Respondre comentari replica Comentari inadequat   Formulari d'abús de comentari

22 de junh 15.43h

#7 #10 #14 Fai un vintenat d'annadas, un colèga meu èra anat faire son pelegrinatge a Arnaud Bernard (celebrissim barri tolosan) per vistalhar la "star occitana" d'alara, un cert Claudi Sicre e charrar una orèta amb aquel. Tornat al nòstre nos afortiguèt qu'aquel "fabulous" èra pas qu'un impostur. Sul còp ne'n foguèri espantat e i volguèri pas creire. Puèi feniguèri per compréne. Coma maites. Benvenguts al club !


Valora aquest comentari:   votar positiu 81   votar negatiu 68
Respondre comentari replica Comentari inadequat   Formulari d'abús de comentari

22 de junh 10.37h

#8 E parlar occitan, as totjorn pas apres dempuei lo temps, luoga de nos conflar de teoria ?


Valora aquest comentari:   votar positiu 90   votar negatiu 65
Respondre comentari replica Comentari inadequat   Formulari d'abús de comentari

20 de junh 22.43h

Fa mestièr una preséncia mai granda del Sicre sul Jornalet, coma opiniaire.


Valora aquest comentari:   votar positiu 62   votar negatiu 70
Respondre comentari replica Comentari inadequat   Formulari d'abús de comentari

20 de junh 21.49h

#10
Segur, qu'ei de non pas créder. Los Fabulós Troubadours que son au demiei deu monde qui'm balhèn enveja d'apréner l'occitan...


Valora aquest comentari:   votar positiu 39   votar negatiu 9
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions