CAPÇALERA2: IEA-AALO

Jornalet, gaseta occitana d'informacions

Dimenge, 16 de decembre

Joan-Marc Leclercq

Dimars, 31.7.2018 03h00

Climat: soi pessimista


Comentaris 11 comentaris    
Dolent Fluix Bo Molt bo Fabulós (7 vòtes)
carregant En cargament


Vaquí un subjècte deu quau totis parlan, e a l’encòp degun parla pas. S’agís deu recauhament climatic deu quau patís la planeta. Çò que’s debana es fòrça curiós. Es un tèma que torna regularament dens los mèdias, mes sonque ende hèr la constatacion de çò que la situacion se guasta cada annada, cada mes, diserí cada jorn, e pas jamès vertadièrament ende perpausar aplicacion de çò que caleré hèr, levat previsions de creish deu “mercat de la veitura electrica”, que triga. Es justament aquò que truca: tot vira a l’entorn de l’economic.
 
Se passa lo medish fenomène qu’ende l’alcòl au volant. A cada sopar drin avinat, se parla tostemps de s’avisar aus policièrs que poderén gaitar en camin, e non pas jamès (disi pas “gaireben jamès” mes vertadièrament “jamès”) deu risc d’accident. Se recentament un amic de vòstes a crompat una veitura, l’atz ausit parlar deu taus d’emission de CO2 o meslèu deu prètz, deu con·hòrt, de l’equipament e de la consomacion de carburant? Lo recauhament chepica benlèu lo monde, mes degun sembla pas pertocat a títou personau.
 
Mon chepic en resumit: nòsta societat fonciona suu creish de las activitats umanas (s’apèra justament “la creishença” e sense d’era es “la recession”, que causa caumatge e praubetat) e las activitats umanas causan lo recauhament climatic, lo qu’aurà (qu’a dejà) contracòps que seràn lèu dramatics.
 
Sèm doncas dabans una causida, ça’m par: cambiar de sistèma o s’aborrir encara mès dinc a l’extincion de l’espècia umana. Pr’amor qu’es plan d’aquò que se tracta, sovent disèm que cau “preservar la planeta” mes la planeta se’n fot, s’ac va virar plan, era, son los umans que son aperats a desaparéisher, segon uns scientifics.
 
I a partisans d’una descreishença (e un quite jornau que s’apèra atau) mes son encara tròp inaudibles au par de çò que representa los poders economics.
 
Ça digoc lo climatològue deu CNRS Robert Vautard (NDLR: que jamès), poderam pas tornar au climat qu’am coneishut avant. Es dejà irreversible. Quitament se ns’i escadèm de baishar nòstas emissions de CO2, es tròp tard, la temperatura demorarà hauta e contunharà de pujar. Pujar, aquò vòu díser aténher los 50° a l’èst de França per exemple. Hè pas que confirmar çò que digoc Jean Jouzel, climatològue e vici-president deu GIEC.
 
La sèrp se nhaca la còda: la temperatura puja e doncas lo monde compran sistèmas de climatizacion. En 2030, 700 milions seràn en servici segon lo laboratòri nacionau de Berkeley, sia un crompat cada 10 segondas (!).
 
Los climatizors utilisan “fluides frigorigèns” que son hidrofluocarburs, deus quaus lo poder de recauhament es superior 1300 còp a lo deu CO2. Atz plan legit: 1300 còps. En 2040, es pervist que los besonhs en climatizacion de China seràn mès importants que non pas la consomacion electrica actuala deu Japon.
 
Me brembi pas mès deu nom deu scientific que disèva que las emissions de CO2 causan un creish de temperatura, que causa a son torn emissions de CO2. Aquò s’apèra pas un cerc viciós? Quin aquò se pòt estancar? Aqueste scientific acabava en tot díser qu’aquò s’èra debanat sus Vènus (planeta “bessona” de la Tèrra per sas caracteristicas fisicas) dinc a aténher la temperatura de 400°. Sèm beròis …
 
Solide tot aquò son pas que dadas, importantas benlèu, mes son pas totas la dadas de la problematica deu climat. Se pòt tanben debanar causas qu’am pas pervistas a l’ora d’ara e que poderén cambiar tot.
 
Mes se que non, am pas lo … climat … sortit deus romècs.
 
 



abonar los amics de Jornalet
 



publicitat



Comentaris

4 d'agost 21.37h

*climat> CLIMA


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

1 d'agost 01.52h

#5 Quiò, This too shall pass, Memento mori, etc.: desparéisher que vam. Mes ací ne pàrlam pas de la medisha escala de temps se pòt. Que m’interèssi sustot a la “collapsologie” (segon lo mot de Servigne et al.), pas tant a l’escatologia (la qui tracta de fins finaus, pas la qui hè cagar)…
Per tant qui la tèrra non vadi un desèrt usclat e/o un cafarnaum radioactiu ostil a tota vita (hòra las cucas e los escrepis), probable qu’ei l’umanitat ne siim pas suu punt de ns’esca... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

31 de julh 20.49h

#6 Òc, benleu, çò que ieu ne'n dise tanben, qu'es que me fai tròp ren que l'espécia umana dispareisse mas sei quauqu'un pauc triste d'imatginar que sián los mai paubres que patiràn de las chausidas egoïstas de los qu'an lo poder economic. Après, que los umans roinen dins lor chasuda lo monde viu me fai fòrça degreu, quau manca de responsabilitat! Aitanben, me fau dire que tròbe plan cinics e egotics los que te disen que lo monde uman vai s'esbolhar e que te fan ren per chamnhar lors... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

31 de julh 17.42h

Demèst las responsabilitats umanas que contribúan al rescalfament climatique i a, de segur, la creissença economica, que los riches ne son responsables, d'aquò gaireben tot lo monde es d'acòrdi, mas i a tanben la creissença demografica dels paures que s'en parla pas gaire (es pas politicament "corrècte") e coma aquels paures sómian pas per lors mainatges que d'una creissença economica de riches... I a de qué èsser pessimista, en efèct.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

31 de julh 17.07h

Pensi en " Consí les rics destrusen la planeta" (Hervé Kempf), çò's consí le póder de crompa es destruseire de la planeta, e en la "rivalitat ostentatòria" (Thorstein Veblen) que devalla dinc à las siscas popularas de per mimetisme. Le mécanisme dels pretzes jòga pas le seu ròtle de regula, qu'intègra ren que le temps cort. La demografia i apond le seu esfièit en sus.
Amb'aquò, salvar aquell monde que se destrutz naturalament, se se pòt pas cambiar... Mudaràn ò partiràn totes... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

31 de julh 14.55h

#5 Ni los catars nimai ieu sèm pas segur qu'aquò siá necessàriament una novèla de las mai marridas…


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

31 de julh 14.09h

#4 Ba, ma fe, si-es ben que l'espécia umana 'chabará que dispareitrá, fau pas creire que se'n tirará totjorn de sas conarias, afen, coma tota espécia dispareitrá qué. Çò que me fai lo mai suar, qu'es que qu'es totjorn los mai paubres que patiràn prumier de las consequéncias de las accions nosiblas (refugiats climatics...), dau temps dich que los mai riches se'n tiraràn un temps. Mas çò que los umans 'basissen e auràn 'basit avant de disparéisser, qu'a metut daus milions d'annada... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

31 de julh 12.52h

N’ei pas de créder qu’a lhèu ueit miliards e pénsim enqüèra que l’escantida umana e sii lo màger risc, quan lo problèma ei precisament la suberpopulacion. L’espècia umana qu’a passat per estrangladers demografics plan pro pégers que çò de crànher ací. Botam que càdim de 87% en quauque decenni. I seram enqüèra un miliard de bipèdes esvitècs (autant com en 1800).
N’ei pas l’espècia com tau qui patirà, qu’ei la civilizacion pòstindustriau, e plan solide los ind... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

31 de julh 09.04h

#1 Mercés Joan-Marc per aquel article que, me tanben, te segue plan dins ton pessimisme, crese que qu'es tròp tard. Dises que qu'es question de la subrevida de l'espécia umana, que la planeta s'en fot, òc, segur la planeta s'en fot, puei qu'es pas un èsser viu, la planeta, mas totparier, l'espécia umana aurá contribuit en pauc de temps a la 6esma extincion massiva de las espécias sus la planeta, quò d'aquí, veses, me fai fòrça degreu de saber que l'espécia, que ne'n fau partida, se... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

31 de julh 09.04h

#1 Mercés Joan-Marc per aquel article que, me tanben, te segue plan dins ton pessimisme, crese que qu'es tròp tard. Dises que qu'es question de la subrevida de l'espécia umana, que la planeta s'en fot, òc, segur la planeta s'en fot, puei qu'es pas un èsser viu, la planeta, mas totparier, l'espécia umana aurá contribuit en pauc de temps a la 6esma extincion massiva de las espécias sus la planeta, quò d'aquí, veses, me fai fòrça degreu de saber que l'espécia, que ne'n fau partida, se... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: IEO Label ÒC

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions