CAPÇALERA2: IEA-AALO

Jornalet, gaseta occitana d'informacions

Dimècres, 21 de novembre

Joan-Marc Leclercq

Dimars, 11.9.2018 03h00

Sénher Hulot se n’es anat


Comentaris Un comentari    
Dolent Fluix Bo Molt bo Fabulós (2 vòtes)
carregant En cargament


Soi pas complètament segur que lo president se dobtava per avança d’aqueste partir drin sobte que l’a solide guastat la dintrada. Se la ministra deus espòrts estoc aisida de remplaçar (en una nueit), a calgut una setmana de las bonas ende trobar quauqu’un que posca hèr un ministre de la transicion ecologica de capatge e a la hauçada mediatica deu Nicolas.
 
Dens cada movement politic, culturau o filosofic qu’ensaja de cambiar lo cors de las causas, i a tostemps duas tendéncias que s’acaran: d’un costat los que dison que cau pas nat compromés e que sola la luta s’i escaderà, e d’un aute los que pensan que cau cambiar la situacion de l’endehens en tot s’aligar dambe monde qu’an pas forçadament les medishas idèias. Semblaré que n’i aja pas de règla absoluda e cada situacion es diferenta.
 
Los ecologistas an pas jamès escapat ad aqueste debat d’idèias e las duas linhas se son sovent pelejadas dinc a, ça’m sembla, la victòria deus mens negociadors dens lo partit deus Verds. Los autes son partits e … an vendut lor etiqueta verda contra plaças caudas de las bonas.
 
Las primàrias deu partit EELV de 2011 es una bona illustracion d’aqueste batèsta, quan un Stéphane Lhomme se proclama “candidat anti-Hulot” e que l’ancian presentador de TF1 es l’objècte d’atacas fòrtas e constantas dinc a la causida d’Eva Joly, que hascoc un pichon 2,31% a la presidenciala.
 
Sèm aquí dens un paradòxe totau, lo de la victòria deus “anti-cara-populara” dens un jòc on ganha la cara la mès populara. 
 
Se que non, de qué nos ensenhèc la demission de Sénher Hulot?
 
L’ensenhament màger es que capitalisme liberau e sauvaguarda de la planeta son pas brica compatibles. La pausicion de Hulot es ara sense d’arcast possible, lavetz que’ns sèm demandat longtemps çò que hasèva dens un govèrn que semblava meslèu pauc portat sus l’ecologia mes qu’ac vol-èva balhar l’impression.
 
Adara, pòt díser: “Averí ensajat”. Hulot s’i escad de botar d’acòrdi (enfin, en teoria, quan coneishètz los tipes …) los tenents de las duas linhas, los “s’i cau acarar au sistèma” dambe los “cau botar las mans dens l’untís”. La responsa es fòrça clara: “Èi ensajat e soi plan plaçat ende’vs díser que’s pas possible”.
 
Demòran pas qu’uns plan plaçats au caud ende contunhar d’ensajar de hèr créser que “la politica de las pichonas camadas va marchar”.
 
Jo qu’èi fòrça dobtat de çò que volèva vertadièrament lo Sénher Hulot (un animator de TF1 qu’es patron d’una firma de cosmetics pas brica biò e qu’es sostengut per granas companhias deu CAC 40), me lo cau uei mercejar d’aver explicat au “petit pòble” estremat de las decisions deus poderoses que cau pas escotar çò que ditz lo govèrn sus sa “determinacion d’agir de cap a la transicion ecologica (sic)”.
 
Ara qu’ac sabèm qu’es pas que fotiròla. Mercés Sénher Hulot.
 
 
 
 


abonar los amics de Jornalet
 



publicitat
BANER1: IEA-AALO



Comentaris

11 de setembre 08.55h

Ecologisme d'opinion e Ecologisme de competència
L'ecologisme es un fait social que se prend en compte politicament d'un grad variable, mais que necessita de competèncias realas.
La participacion de gents competents a un govèrn es indispensibla, emai que sia o semble a l'un-còp una caucion o un sostèn politician.
Es de bona causa de jogar le jòc d'una collaboracion tecnica, dinc a un limit que subrepasse çò d'acceptable.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions