CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 21 d'agost

Joan-Marc Leclercq

Dimars, 18.12.2018 03h00

Referendum d’Iniciativa Ciutadana


Comentaris 4 comentaris    
Dolent Fluix Bo Molt bo Fabulós (7 vòtes)
carregant En cargament


Ac cau díser, a la debuta me soi pas sentit concernit peu movement deus Gilets Jaunes. Bloquejar l’economia ende protestar contra lo prètz deus carburants, aquò m’a pas aperat de tira.
 
Puèi la situacion a evoluat, après episòdis meslèu hastioses (actes racistes, afronts omofòbes, denonciacion de migrants) e meslèu encoratjants (refús de’s deishar recuperar per partits politics o per pòrtavotzes autoproclamats), lo movement sembla totun ara plan diferent de çò qu’èra lo 17 de noveme. Un sondatge recent les balhèc tres còps mès de simpatizants de l’esquèrra extrèma que non pas de dreta extrèma, benlèu que dambe lo temps, los que son acostumats a las lutas de totas demòran mès mobilizats.
 
Ende jo, lo darrèr element que vengoc completar aquesta saga jauna, es l’arribada en fòrça au miei de las reivindicacions, e diserí meslèu au davant, de la volontat d’instaurar un Referéndum d’Iniciativa Ciutadana. Qu’es aquò?
 
Inspirat per la constitucion soïssa, es la possibilitat peu pòble de demandar un referéndum sus quin subjècte que sia a partir deu moment quan aquò es volgut per 700 000 personas. En Soïssa es 100 000, e atau lo percentatge deu còs electorau es respectat.
 
Estoi estrambordat de véser qu’aquesta perpausicion neishoc au bèth miei deus giratòris aucupats peus Gilets Jaunes, abans que quin partit que sia i aja pensat. Una iniciativa populara endeu pòble.
 
N’èi discutit dambe monde a l’entorn de jo. Solide, n’i a que son en contra. Lor argument màger es de díser que, dambe un R.I.C., los migrants serén secutats, lo maridatge ende totis seré abandonat e la pena de mòrt seré restablida.
 
Cresi que l’avantatge immense d’aquesta possibilitat pòt pas estar combatut unicament per suposicions de las negativas. Pensi pas que lo pòble sia tan reaccionari qu’aquò. De tot biaish, la Democracia es lo govèrn deu pòble, e doncas dobtar de sas facultats de comprénguer lo monde es dobtar de la Democracia era medish.
 
Dusau, pensar aquò es drin curiós ende quauqu’un que s’estima democrata. Aquò voleré díser qui a leis a las qualas sèm favorables, mes que son passadas contra la volontat de la majoritat e doncas gausissèm d’una mena de "dictatura" a nòsta favor. Aquò me sembla estranh.
 
Çò que motiva tanben los Gilets Jaunes, es de saber que quin avantatge que sia balhat uei lo dia per un poder aflaquit, pòt estar représ un bèth dia per un aute.
 
Au mens, lo R.I.C. balha au pòble un levader end’agir sus son destin. Lo mès bon seré d’aver un R.I.C. au nivèu de la region, deu departament e tanben de la comuna. Vaquí una reivindicacion de las bonas!
 
 




abonar los amics de Jornalet
 



publicitat
BANER1-2-3: DGPL DICTADES



Comentaris

18 de decembre 20.16h

Çai un petiòt documentari de vint menutas sobre aquelh referendòm ciutadan tau coma es practicat chas nòstes vesins de Soïssa → https://www.youtube.com/watch?v=nROeE2gI97c


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

18 de decembre 15.46h

Eleitisme # populisme
Question: Se se pot accomodar l'eleitisme, çò's la pensada dominanta dels elegits, d'un populisme, fosquèsse temperat. L'eleitisme oligarquista se ditz liberalisme...?


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

18 de decembre 15.22h

"gausissèm d’una mena de "dictatura" a nòsta favor." Aqui una constatacion onèsta que i sèm pas acostumats ! Sèm ben en dictatura (sens verguetas) emai siague mòla. Mas la pus granda partida del pòble pòt pas dire "gausissèm" mas "subissèm".
Lo R.I.C. pòt èsser una idèia interessanta mas : Quantas de signaturas caldrà per l'obténer ? E tanben " mais pas sur n'importe quel sujet " a prevengut lo primièr ministre. Aurem drech de votar sus la circonferença dels fromatjons ?
Vò... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

18 de decembre 11.16h

Lo RIC es pas una miraudia, mas dins aquela societat ente lo parlement jòga pas son ròtle de contròl dau governament es una solucion mobilisatritz. Tot lo monde se rend ben compte que los poderos fan çò que volan e que paian daus impòts e de las taxas sens saber ente vai l'argent.
Quò es un revers de la democracia. La 5ème republica a tot fach per muselar lo parlement sens que los partis politics s'i siajan opausats. Es pas estonant que lo mecontatament cercha de novelas pòrtas pe... Legir la seguida


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions