Bandièra01 1180x150: Comuna de Tolosa

Opinion

Drapèu francés: quin simbèu?

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
M’a semblat evident qu’au miei deu movement deus Gilets Jaunes, lo simbèu mès sovent vist es lo drapèu francés. A còps, un drapèu breton, norman o quitament occitan veng esgaudir aquesta praubetat tematica. Un objècte coma un drapèu es un simbèu, mes coma totis los simbèus, cadun i vei çò que vòu.
 
Lo movement deus Gilets Jaunes a fòrça evoluat dempuèi la debuta, e la reivindicacion suu prètz deus carburants s’es estremada ende daishar lo davant de l’empont a una demanda de mès de democracia capvath lo Referéndum d’Iniciativa Ciutadana. Mes lo simbèu mès present suus giratòris seré pas en contradiccion damb’aquesta requista?
 
Cau saber que las colors deu drapèu estatau de França vengon de la juxtaposicion de las duas colors de la vila de París, lo rotge e lo blau (e doncas deu club de butabala deu Paris-Saint-Germain) dambe lo blanc deu rei de França. Mon professor d’istòria avèva mascarada la realitat en tot díser que lo blau e lo rotge èran “las colors deu pòble”, mes quitament a l’escòla estant m’èri dejà mauhisat d’aqueste explic que’m semblava dobtós.
 
Sèm doncas davant un simbèu reiau e centralizator. Solide, tot a evoluat e ara daubuns vesen dens çò qu’aperan “lo drapèu tricolòre” (lavetz qu’es lo cas de la majoritat deus drapèus deu monde) lo simbèu de la libertat, de l’egalitat … e tot aquò.
 
Cadun i pòt véser çò que vòu, e doncas aquesta bandèra pòt tanben simbolizar lo nacionalisme qu’a encausat lo masèl de 1914, lo colonialisme e sas victimas, tanvau la guèrra d’exterminacion miada contra las lengas e culturas de l’Estat.
 
Am tanben monde qu’an vist dens l’Arc de Triomfe de París un “simbèu de la Republica” lavetz qu’es pas qu’una bastida en l’aunor de l’Empiri inaugurat devath la reiautat. Mes bon, botèm …
 
Doncas volerí jo soslinhar la contradiccion entre lo simbèu tricolòre e la demanda de mès de Democracia. Au demiei deus autes Estats europencs, França fonciona dambe un regime presidenciau. Lo parlament a pas nat poder, son calendari es decidit per president eth medish. Lo drapèu francés pòt estar doncas considerat coma lo deu país mens democratic de l’Union Europenca.
 
A cada còp que parlatz de Democracia dirècta, i a tostemps un tipe ende’vs díser: “Es pas possible d’aver una democracia dirècta a 66 milions d’estatjants”. Lo tipe a pas tòrt. Sèm doncas davant una causida.
 
Se cau brembar de çò que Jean-acques Rousseau disèva que mès la Democracia es representativa, mens es democratica. Se lo hèit d’estar 66 million es un empach a mès de Democracia, la causida es simpla:
 
Cau renonciar a mès de Democracia.
 
Cau pas estar 66 milions, mes una entitat fòrça mès pichona.
 
Se comparam los paises qu’an un regime d’eleccions liuras, pareish evident que los mès pichons son los mès democratics. La Democracia fonciona mès plan en Andòrra (una de las mès vielhas d’Euròpa)  que non pas en Rùssia, mès plan en Soïssa que non pas aus quites USA, on un president es estat elegit dambe mens de votzes que non pas sa concurrenta. Lo hèit qu’un país pichon es mès democratic que non pas un gran es evidentament matematic.
 
L’Estat francés es una trava a mès de Democracia, ac caleré díser aus Gilets Jaunes que brandissen son simbèu. Sustot que Macron, que volen desméter, es francés tanben.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi ! 31
9.

Bandièira
Se sòrte tostemps la bandièira per s'accampar contra un adversari.
Es accampadís als unes e escampadís als altres demais.

  • 0
  • 0
Emmanuèl Isopet
8.

#7#6#5 De çò que ne sabi, La Faieta conta efectivament dins sos memòris qu'es el que presenta al rei la cocarda tricolòra qu'unís las colors "del pòble de París" (s'ai bona memòria) e del rei (lo blanc es efectivament la color del rei a las armadas, mas lo blau es tanben la color de son mantèl de sacre... passem). Ara, totes los istorians son d'acòrdi per dire que l'explicacion (posteriora) de La Faieta es pas reala. Pastoureau (L'Especialista!) o ditz plan. A notat que las tres colors èran ja "a la gaia" (a la mòda) abans 1789 e apeladas "las colors de la libertat" en referéncia a la revolucion americana. Lo mai probable es donc que las colors "de la libertat" ajan agut un succès dins aqueste moment "revolucionari" en referéncia a la revolicion americana, e que simplament l'occitan La Faieta pofiechèt se sa notorietat, de sa posicion a costat del rei e del succès de sos memòris per fa creire que n'èra l'iniciator.
Pel demai de l'article, soi pas segur que la talha (o la demografia) d'un país siá una empacha a la democracia. Se sembla mai simpla una democracia de la dimension d'un vilatge (es la tèsi de Rousseau cresi) pensi que se pòt imaginar de formas a una autra escala. O alara cal imaginar que prendre una decision democratica al nivèl mondial es impossibla. D'un autre costat, lo pes de las estructuras, de las costumas al nivèl local pòt empachar una vertadièra democracia (sabètz, las "baronias" de divèrses partits politics!).
Al delà del nombre, l'informacion reala e la capacitat a debatre del ciutadan es fondamentala.

  • 3
  • 0
Franck
7.

#5 (Je tente en occitan limousin, en espérant ne pas trop maltraiter la langue.) Òc, es çò que ditz Pastoureau, mas me recorde pas que explica/balha l'origina dau roge e brun per Paris au segle XVIII... (Se pòt que m'entraupe.) De cherchar, coma disetz...

  • 2
  • 0
Pierre Terral
6.

#4 Ai ajut legit aquò ieu tanben. Seriá Lafayette qu'auriá proposadas aquelas tres colors que son las del drapèu dels USA que eles las avian empruntada a lor anciana patria, la Granda-Bretanha. Las colors de la Republica francesas serián donc las de la monarquia anglesa.

  • 0
  • 0
Joan-Marc LECLERCQ
5.

#4 Adishatz ! A la debuta avèvi escrit dens l'article que lo marqués de Lafaieta, tornat d'America, avèva tanben influençat la causida de las tres colors pr'amor quèran las de la revolucion americana. Puèi avèvi quitat una causas, que lo tèxte èra tròp long.

Per las colors de la vila de parís, soi susprés pr'amor que son totjorn lo rotge e lo blau. De cercar ...

  • 3
  • 0

Escriu un comentari sus aqueste article