CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Dijòus, 14 de novembre

Joan-Marc Leclercq

Dimars, 26.2.2019 03h00

Ahar Finkielkraut


Comentaris 9 comentaris    
Dolent Fluix Bo Molt bo Fabulós (14 vòtes)
carregant En cargament


Ende quauqu’un que s’interèssa aus mèdias, l’ahar Finkielkraut presenta un polit exemple d’isteria mediatica com i avoc pas dempuèi bèra pausa, on la soscadissa estoc remplaçada per sentits emocionaus descabestrats.
 
Uns dias abans caden las chifras tesicantas d’un creish de 74% deus actes antisemitas suu territòri de l’Estat francés. Solide aquò’s fòrça marrit, mes s’espiam la corba sus unas annadas, vesèm clarament qu’es pas tan inquietant qu’aquò per çò qu’es de l’evolucion. En 2014 èran comptablizats uns 851 cases (!), en 2015: 808, en 2017: 311, çò qu’es una caduda fòrta, puèi en 2018: 541. Un creish doncas per rapòrt a 2017, mes dens una linha de devara.
 
La dusau causa de díser aquò dessús, es que l’òrre crimi d’Ilan Halimi es comptabilizat deu medish biaish qu’una crotz gammada mercada per un colhon tot solet. Seré meslèu bon de hèr una cèrta diferéncia.
 
Vaquí doncas per çò qu’es deu contèxte. Lo dissabte 16 de heurèr, l’academician Alain Finkielkraut es insultat en marge d’una manifestacion deus Gilets Jaunes. Los imatges an hèit lo torn de la telaranha es sustot deus hinestrons. Vaquí que comença l’ahar e totis los mèdias se descabestran.
 
Segon eths, es evident que s’agís d’una agression antisemita. France Info assegura qu’estoc atacat “pr’amor qu’es jusiu” e Benjamin Griveaux, pòrtavotz deu govèrn, escriu sus Tweeter que l’an cridat “sale juif”, lavetz que l’interessat eth medish digoc clarament qu’avèva pas ausit aquesta frasa. Après verificacion, Griveaux a mentavudament mentit.
 
L’insulta que hascoc mès parlar d’era es “sale sioniste”, lançat per quauqu’un que Finkielkraut qualifiquèc de “pas un petit blanc”, lavetz que s’agís plan en hèit d’un petit blanc mes convertit a l’islam e tanhent deus mitans salafistas segon la polícia.
 
La vertat es qu’Alain Finkielkraut es eth medish percebut per daubuns com un racista. Disi “per daubuns” pr’amor que coneishi pas pro lo personatge end’ac díser jo. Tot çò que sabi es qu’es quauqu’un de controversat, que perd pas una ocasion de denonciar l’immigracion, lo “dangèr musulman” e de glorificar lo colonialisme o l’accion de l’armada israeliana dens la benda de Gaza.
 
Hascoc la medisha remèrca que Jean-Marie Le Pen que la còla de França de butabala es “black-black-black” e qu’a l’entèrrament de Johnny Halliday i avèva pas nat “non-souchien”, es a díser pas nat Francés “pas-de-soca” (Arabe o Néguer), en tot utilizar un vocabulari clarament de dreta extrèma, coma ac muisha lo nom de la pagina internèt Français de souche.
 
Es passat ideologicament deu maoïsme de son joenèr a una posicion de supremacista blanc. A lo dret de pensar aquò se vòu, mes cresi qu’estoc insultat sustot pr’amor qu’es Alain Finkielkraut e non pas pr’amor qu’es jusiu. Pensi qu’estosse lo Jean-Jacques Goldman (personalitat preferida deus Franceses dempuèi unas annadas) que seré passat au ras de la manifestacion, seré estat meslèu aplaudit que non pas insultat.
 
Lo grop qu’uglava l’aperèn tanben “racista”, “fascista” o quitament “antisemita”.
 
Lo medish dia, Ingrid Levavasseur, qui avèva pensat un moment miar una lista Gilets Jaunes a la eleccions europenca, estoc a son torn insultada d’un biaish a còps fòrça sexista, mes las reaccions deus mèdias e deu monde politic atenhoc pas lo detzau d’aquestes de l’ahar Finkielkraut.
 
De mès, Finkielkraut avèva dejà viscut la medisha benalèja en 2016 en tot se presentar a una manifestacion parisenca de Nuit debout de la quala estoc hòrabandit. Avèva tanben escrit un article contra los Gilets Jaunes pareishut la velha e sa preséncia au ras de la caminada de l’endeman pòt estar considerat coma una mena de provocacion. Es una personalitat mediatizada que, coma totas las personalitats mediatizadas, viu de las polemicas que provòcan. Tra l’endeman estoc convidats sus totis los platèus televizats e radiofonics deu país.
 
Un grop de deputats ne profitèc end’evocar un projècte de lei que castigaré l’antisionisme au medish títou que l’antisemitisme. Tocam aquí lo hons deu suberrealisme. En tot saber que lo sionisme es una doctrina politica qu’estoc a la debuta (e l’es encara) combatuda peus Jusius progressistas e religioses, l’assimilar a un sentit racista botaré un embrolh tragic dens lo biaish d’aplicar la libertat d’expression.
 
Existís l’Union Jusiva Francesa ende la Patz qu’es fòrtament antisionista e doncas que riscaré de’s trobar interdida pr’amor … d’antisemitisme.
 
La conclusion d’aqueste ahar es que servís màgerment au govèrn qu’a ensajat de pegar sus l’esquina deu movement de contestacion l’etiqueta “antisemita”, après la de “dreta extrèma”, de “esquèrra extrèma”, de “pagats per Moscó”, de “anti-maridatge per totis” e sabi pas qué de mès.
 
 
 
 
 


abonar los amics de Jornalet
 



publicitat
BANER1-2-3: DGPL TRADUCTOR



Comentaris

3 de març 16.22h

Oc, Finkielkraut es un sionista, un incondicional d'Israël tan coma i-aguèt d'incondicionals de Moscou o de Mao. E sufis d'escotar son emission dissabtièra per comprene que per aquel un francès aquo's abans tot un blanc, tan coma per ma mamèta un francès èra abans tot un catolic. Mas contestar aquel racism new-look qu'es tanben aquel del sinistre Zemmour es interdich se lo tipe que ne fa la promocion es un josiu, que passariatz lèu per un antisemit.


Valora aquest comentari:   votar positiu 12   votar negatiu 1
Respondre comentari replica Comentari inadequat   Formulari d'abús de comentari

27 de febrièr 15.29h

J.M. Leclercq ditz : "Tocam aquí lo hons deu suberrealisme". Lo fons del subrerealisme es lo realisme. La cima n'es çò subrereal, es a dire çò que, pres a la realitat mas mes en relacion acausala segon los anars comolats de l'inconscient subjectiu e de l'asard objectiu, pren sens e pòrta sens aquí ont cap intelligéncia logica auriá pogut menar.

Res a veire amb l'instrumentalizacion mediatica vergonhosa e cinica de la (plan legitima) orror (e terror) de l'antisemitisme per emporcassar... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

27 de febrièr 10.41h

#2 Me soi demandat pr'amor avèvatz agut aquesta reaccion. Benlèu mon error es estada de demorar pas dens l'encastre de chifras e de botar un mot de registre de l'emocion "inquietant", çò que pòt hè pensar que me foti de tot aquò. M'auré calut escríver au lòc de "es pas tan inquetant qu'aquò" "lo creish es pas tan agut qu'aquò" o quicòm atau.
Ac sabi ara peu còp que veng e mercés per vòstra remèrca.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

27 de febrièr 04.48h

#5 e #4
Brava parada!
L'autor descripta, coma de costuma, tota forma de manipulacion, de chifras dinc a d'opinions.
La manipulacion de l'antiracisme legitim contra una protèsta sociala es una manòbra politiciana malonèsta.
Sèm totes, un jorn, objèctes de manipulacion inconscienta de la nòstra opinion.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

26 de febrièr 22.51h

#1 Solide hès alusion ad un contèxte de racisme qu'es reau. Jo, dens l'article, citi tamben lo crimi d'Ilan Halimi. Çò que cau reténguer deu tèxte es que l'ahar Finkielkraut justament a pas de rapòrt dirècte damb'aqueste contèxte e qu'i avoc un essaide'u botar sus l'esquina deus GJ au profièit deu poder.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

26 de febrièr 22.45h

#2 En hèit, l'article hè 740 mots. Resumir una pensada en 10 mots aquò s'apèla sortir deu contèxte. I avèva un article sus Agora Vox que disèva qu'es pòt calcular coma un creish de 74% o una baisha de 30%, tot depen deu periòde comprés dens los calculs.
Es aquò que cau legir. Se una baisha es inquietanta en mestièr d'antisemitisme, lavetz me demandi perqué.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

26 de febrièr 17.06h

L'antisionisme es pas sinonime d'antisemitisme, pas mai que sionista e juseu.


Valora aquest comentari:   votar positiu 9   votar negatiu 2
Respondre comentari replica Comentari inadequat   Formulari d'abús de comentari

26 de febrièr 11.26h

La pensada de Leclercq se pot resumir amb mens de detz mot sieus: "vesèm clarament qu’es pas tan inquietant qu’aquò". Aqueste article enaltis pas Jornalet.


Valora aquest comentari:   votar positiu 9   votar negatiu 7
Respondre comentari replica Comentari inadequat   Formulari d'abús de comentari

26 de febrièr 09.22h

I a recuperacion politica e rambalh mediatica e hès plan d'ac díser. Sai qu'ès prigondament antiracista.

Pr'aquò, soi geinat.

Soi d'ua familha qu'amaguèn jusius pendent la guèrra e soi totjorn estat sensible a la luta contra l'antisemitisme.
Me brumbi de l'afar Merah de 2012, dont parlas pas d'aulhors. Aqueth fanatic islamista executèc pichons mainatges jusius a Tolosa. Aquò coma Occitan, e simplament uman, que toquèc prigondament. Qui parla ara d'ua comunitat jusiva, qu'èra import... Legir la seguida


Valora aquest comentari:   votar positiu 10   votar negatiu 10
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions