CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Diluns, 22 de julh

Joan-Marc Leclercq

Dimars, 23.4.2019 03h00

Caleré ensenhar a debàter


Comentaris 4 comentaris    
Dolent Fluix Bo Molt bo Fabulós (2 vòtes)
carregant En cargament


Çò que repròchi mès a l’escòla, es d’ensenhar pas la cooperacion, la collaboracion. Au contra, l’escòla vòu pas que destriar los dròlles, per la competicion, entre los que seràn los miaires de la societat de deman e los que seràn los executants. Trabalha ende conservar la ierarquia. Sèm totis dejà estats jutjats sus nòsta capacitat a recitar lo teorèma de Talès que’ns servirà pas jamès, e degun nos muishèc pas com realizar un projècte amassa, s’escotar, se comprénguer, trabalhar en armonia, çò que hèm gaireben cada jorn.
 
La resulta se vei dens lo biaish qu’an lo monde de discutir. Au lòc d’escotar çò que ditz l’aute, de l’analizar, d’ensajar de comprénguer son problèma e d’i portar una responsa, sèm tostemps dens la competicion (com nos ensenhèn a l’escòla) e nos sembla que cau “ganhar” lo debat e tot botar son “adversari” K.O.
 
Me soi trobat recentament tres còps davant exemples atau.
 
Lo purmèr èra pendent una discutida en Jordania entre esperantistas suu tèma de la patz dens l’Orient mejan. Quan Anna Löwenstein, una britanica que’s definís era medisha coma “jusiva seculària” pausèc LA question mès importanta, de saber: “De qué caleré hèr ende portar una solucion progressista e pacifica a la situacion qu’a tròp durat? “, nada responsa i estoc pas portada.
 
La question èra destinada aus israelians presents. Au lòc de soscar a çò que caleré hèr ende tornar trobar la patz, an pas qu’explicat que la volèvan portar eths, mes que los palestinians ac volèvan pas, en tot balhar fòrças exemples. Quitament s’unas personas (de las qualas jo) les tornèn pausar la question en insistir suu hèit qu’èra LA clau deu problèma, son demorats dens una pausicion de critica de cap aus autes belligerants.
 
Lo dusau cas estoc dambe un francés que demòra en Alemanha. Èra lo jorn quan Emmanuel Macron devèva parlar au finestron ende hèr sas perpausicions après lo “gran debat”, abans que lo huec d’una catedrala anullèsse lo devís presidenciau. Ma question èra totun simplassa: “De qué pòt perpausar Macron ende sortir de la crisi politica? “
 
Mon interlocutor responoc pas. Sentissèvi que’s portava pas los Gilets Jaunes dens lo còr, es evident. Mes s’es acontentat de’us criticar, en tot comparar la situacion dambe Alemanha, en particular la de las retiradas. Ensagèi tres còps de’u tornar miar a la demanda, mes aquò atenhoc pas son cervèth. Èra complètament incapabla de formular la debuta d’una idèa de solucion de sortida de crisi. Los Gilets Jaunes avèvan tòrt, es tot.
 
Lo tresau còp, parlavi de la situacion en Polonha e de la politica deu govèrn. A un moment, digoi la frasa: “Polonha a un govèrn poirit (desencusatz, es de lengatge parlat) mes an baishat o van baishar l’edat de la retirada dinc a 60 ans”. End’una hemna presenta, lo hèit de trobar quicòm de positiu ad aqueste govèrn hasèva de jo solide un dangerós fondamentalista catolic, a maugrat de la debuta de la frasa.
 
Me demandèc, escandalizada, com podèvi díser aquò lavetz que los “drets de las hemnas” èran “grèvament miaçats”. Purmèr estoi susprés, puèi comprenoi que se tractava de las miaças suu dret a l’avortament. Estoc fòrça complicat de l’explicar que, se lo govèrn es vertadièrament “poirit” (èra un resumit lèu lèu hèit), miaçar lo dret a l’ortada es pas bon, mes baishar l’edat de la retirada es meslèu bon e que, fin finala, i a pas nat rapòrt entre las duas causas.
 
Èra tròp tard, m’avèva classificat com enemic que calèva combàter ideologicament.
 
Pas nada solucion ende la patz en Palestina, pas nada sortida de crisi politica, pausicion trencada sus un govèrn, ne sèm bloquejats aquiu dessús. Tot es blanc o negre. Es benlèu l’escòla que’ns a après aquò.
 
Estranhament, es pas vist encara l’idèia d’ensenhar la cooperacion dens la refòrma Blanquer sus l’educacion.
 
 
 
 


abonar los amics de Jornalet
 



publicitat
BANER1-2-3: DGPL TRADUCTOR



Comentaris

26 d'abril 22.36h

Adieu,
Mantuns còps me soi trucat al meteis fenomèn, sens capitar de me far ausir,comprene.
Me soi trobat una mena d'explicacion benlèu garrèla. Es basada sus l'instint gregari. Disèm que la populacion pòt se sompartir en 4 , 5 grops politics de la drecha extrèma a l'esquèrra extrèma. Totes sèm somés al banh mediatic dins la rega ortodoxa de l'OTAN e de las leis del mercat. Un sistèma electoral astuciós permés a la borgesiá nauta de servar lo poder ambe 30% dels votants (a pro ... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

25 d'abril 06.26h

L'esperanto, lenga binària propícia al maniqueïsme ?
L'esperanto forma la mitat de son lexic per la negacion de son contrari..
Aital varma fai caud, quand malvarma fai freid...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

24 d'abril 17.39h

Ensenhar la cooperacion a l'escòla? Del temps luenchenc ont èri ensenhaire de licèu, i aviá de dispositius per permetre als escolans de trabalhar e recercar amassa en grop amb un raportaire que fasiá la sintèsi. Lo problèma èra que maites ensenhaires cresián pas a l'utilitat del trabalh comun e que los escolans que volián pas res fotre comptavan sul raportaire per far lo trabalh a lor plaça. Sèm dins une societat individualista e competitiva e l'escòla es pas que son rebat.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

23 d'abril 11.55h

Un esser uman a un sentiment, de las emocions e quò lo rend unic dins l'univers coma a l'escòla.

Dempuei 2000ans vivam sos lo renha daus imperadors romains; bastir un poder que profita a una ponhada e maintener lo reste de la populacion dins l'esclavatge. Tot es fach per aquò : de las asseguanças, en passar per las bancas, las multinacionalas, l'educacion , lo sistem financier, e aura los medias. Chacun dins son confòrt moral e materau. Lòr balharem daus juòcs e una cultura pervertida... Legir la seguida


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions