CAPÇALERA: OPLO Licèu
CAPÇALERA2: IEA-AALO

Jornalet, gaseta occitana d'informacions

Diluns, 29 de novembre

Joan-Marc Leclercq

Dimars, 6.4.2021 03h00

Islamoesquerrisme


Comentaris 9 comentaris    
Dolent Fluix Bo Molt bo Fabulós (5 vòtes)
carregant En cargament





Per quauqu’un que s’apassiona per lo debat d’idèias e sustot per çò que podèm aperar “la guèrra deus mots”, vaquí un polit neologisme plan saborós qu’a aucupat los comentators de l’actualitat politica i a pas guaire: islamoesquerrisme.
 
D’un usatge drin confidenciau dempuèi 2002 quan nascoc devath lo calam deu politològue-sociològue Pierre-André Taguieff (passat eth medish de l’esquerrisme a un nacionalisme d’esquèrra a la Chevènement) e meslèu reservat de costuma a un vocabulari de dreta extrèma, lo mot coneishoc una popularitat navèra quan estoc emplegat lo 16 de heurèr de 2021 per Frédérique Vidal, ministra encargada de l’ensenhament superior, que declarèc voler comandar au CNRS una enquista sus “l’islamoesquerrisme dens l’universitat”. Aqueste sortida coneishoc mès de succès que non pas l’usatge que’n hasèvan abans Jean-Michel Blanquer (Ministre de l’Educacion) e Gérard Darmanin (Ministre de l’Interior). Ajustèc qu’aqueste islamoesquerrisme “gangrena la societat dens son ensems”.
 
Un còp lo mitan universitari atau segotit, lo CNRS declarèc que “l’expression correspón pas a nada realitat scientifica” e la Conferéncia deus Presidents d’Universitat digoc son “estupor dabans una polemica esterla”.
 
S’espiam de près aquesta expression, efectivament vòu pas díser gran causa. La part “islam-” hè allusion a la populacion musulmana o au movement politic dit “islamisme”? La part “-esquerrisme”, era, sembla plan pertocar çò que disèm “l’esquerrisme”, es a díser l’esquèrra extrèma que’s tròba mès a esquèrra que non pas lo PC o la France Insoumise. Mes es pas segur.
 
Lo quite creator de l’expression reconeish que “lo sens veng a cada còp mès mauclar a mesura que veng un mot polemic.”
 
Fondamentalament, la pensada islamista s’apuja purmèr suu hèit que Diu (aperat Allah) existís, quan la pensada esquerrista regeta aquò totalament sense nuança. Èi ensajat d’imaginar un drapèu de l’islamoesquerrisme per véser se tot aquò vos sembla coerent.
 
Los exemples de credents d’esquèrra extrèma existissen benlèu (tot es possible dens lo maine de la pensada umana), mes son talament rares que’s pòt pas imaginar un movament influençat per aquesta eventualitat.
 
Podèm comprénguer que l’expression es pas que mauagida e vòu parlar en hèit de la “complasença suspausada d’una part de l’esquerrisme de cap a reivindicacions islamistas”. Aquí sèm mès dens lo racionalisme.
 
Mes los descridaires deu mot hèn remercar la semblança dambe “judeobolchevic” de las annadas 30, quan los antisemitas associavan los Jusius au marxisme en s’apujar sus las originas jusivas de Marx o deus sòcis de tres deus cinc sòcis deu dusau Politbiorò, lavetz qu’una tala situacion se retròba pas ara, que “islam” definís pas qu’una religion, lavetz que “judeo” definís tanben una origina etnica, çò que permet una dobla apartenéncia.
 
Los qu’emplegan l’expression, sovent los partidaires d’una laïcitat rigorosa, utilizan tanben l’expression “islamofascisme”, çò qu’aluenha las possibilitats d’una concordança dambe las duas ideologias, levat una complicitat tactica possibla.
 
Mes coma sovent dens la guèrra deus mots, vaquí una expression de mès aisida d’utilizacion e practica per ensajar de devalorizar sense tròp d’esfòrç un contradictor. Deu costat opausat, l’expression “islamofobia” es utilizada tanben dambe la medisha eficacitat e lo medish aisidèr dens lo sens invèrse.
 
Prenguètz una saca, pegatz dessús una etiqueta e botatz-i dedins totis los que’vs agradan pas. Lo mot “islamoesquerrisme”, coma tandes autes, permet d’estigmatizar en tot evitar lo debat.
 
Soi solide que lo subjècte s’amerita escambis d’idèias e d’arguments mès elaborats.
 
 
 
 
abonar los amics de Jornalet
 
 


 



publicitat
BANER2: OPLO liceu



Comentaris

7 d'abril 15.52h

E encara la diferéncia es que se l'idèa d'islamo-senèstrisme es sensa realitat materiala, la nocion d'islamofobia es utilisada simplament per descriure en sciéncias socialas la forma de racisme còntra lei populacions musulmanas. Mai aqueu govèrn, qu'a besonh de l'extrèma-drecha per dirigir, fa lo còntrari : Ara per eu, l'islamo-senèstrisme est una realitat mai l'islamofobia es una idèa d'islamistas.
Puei islamo-senèstrisme es pas la soleta nocion impausada per l'extrèma-drecha dins ... Legir la seguida


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

6 d'abril 21.51h

Aquel govern de caminaires se sarran totjorn un pauc mas cap a la dreita e me sembra que contunharà encara se ço que vòlon es recuperar de vòtes a dreita , totjorn mas a dreita... Aquel mond parlan pas coma aquò sens s'ho pensar avans . Degùs serìos se creu aquò del islamoesquerrisme . Es una provocaçion volguda , una guinhada a l'electorat d' extrema dreita, me sembra.


Valora aquest comentari:   votar positiu 10   votar negatiu 3
Respondre comentari replica Comentari inadequat   Formulari d'abús de comentari

6 d'abril 19.56h

#2 As rason aquò dessùs. Pensavi tanben a Tolstoï qu'èra crestian e anarquista. Mes dens l'Estat francés, i a pauc d'exemples uèi lo dia. "Esquerrisme", sia en francés "le gauchisme" se marida mau dambe la religion. Los trotskistas, los lambertistas, los maoistas son pas religioses dens lor immensa majoritat. Es d'aquò que volèvi parlar : ara e uèi. Dens lo monde, solide, es mès aisit de trobar exemples.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

6 d'abril 19.38h

Manca mai l'occitanoesquerrisme!


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

6 d'abril 19.05h

#3 Es complicat justament de tornar trobar la nuança entre lo francés "gauchiste" e "de gauche". Es per aquò qu'èi utilizat "esquerrista" coma "gauchiste".


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

6 d'abril 19.00h

#3 Que crei meilèu que "gaucha" e passa per un francisme. Segon jo, qu'ei un manlhèu au francés, mes anterior au sègle XVIau, senon que seré "gòcha". Donc, que'u podem acceptar com acceptam tant d'autes mots francés manlhevats per l'occitan ancian.


Valora aquest comentari:   votar positiu 1   votar negatiu 4
Respondre comentari replica Comentari inadequat   Formulari d'abús de comentari

6 d'abril 13.24h

Gauchiste= esquerrista? Me sembra que lo prumìer mòt a una nuança pejorativa que revira pas exactament l' altre. Me trompi?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

6 d'abril 08.11h

"Fondamentalament, la pensada islamista s’apuja purmèr suu hèit que Diu (aperat Allah) existís, quan la pensada esquerrista regeta aquò totalament sense nuança". M'estonariá que los crestians sandinistas sud-americans o agèssen entendut d'aquel son ! Unes esquerristas o son estats per amor qu'èran crestians ; pensi per exemple al libre de Agnès Roquefort-Turquin : "Front Populaire - Socialistes parce que chrétien" (Ed. de Cerf). Mas aquesta mescladissa ven de l'idèa de caritat (a t... Legir la seguida


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

6 d'abril 07.55h

Tots los mots utilisats dins lo discors ideologic son vides de sens perque lòr definicion repausa pas sur una analisa prionda que vai dau pòple mas sovent d'un intelectuau que sa paraula es tornada prener per daus medias que son au servici daus poderos.
Que representa au jorn d'uei lo comuniste, lo socialisme. Son pas l'ideologia daus militants mas aqueus daus poderos. Lo partit comuniste chines au poder es lonh dau militantisme comuniste de basa. Los socialistes au poder son au serv... Legir la seguida


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions