Bandièra01 1180x150: Comuna de Tolosa

Opinion

La vaccinacion

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Espèri que seratz pas tròp decebuts, pr’amor que vau pas parlar deu debat entre pro-vaccinacion e contra-vaccinacion.
 
Me pausi autas questions, particularament sus la politica deus laboratòris farmaceutics de cap a sas practicas, es a díser los Estats e l’UE, e a capvath d’eths los contribuidors que sèm. I a especialament una question que’m tarabusta e per la quala, quan ne parli a l’entorn, tròbi pas jamès degun qu’aja la responsa. Mandi doncas una mena de crida aus legedors deu Jornalet.
 
A çò que’m sembla, los diferents laboratòris an anonciat a la debuta tauses d’eficacitat de lor productes que’s situavan entre 95% e 99%. Se comprengui plan, aquò volèva díser que de 100 personas qu’estoren vaccinadas, i a pas qu’entre 1 e 5 qu’estoren totun contaminadas se’s trobèren en preséncia deu virus. Avèvi plan comprés?
 
E doncas la significacion de tot aquò èra qu’una persona vaccinada podèva tornar trobar sa vida “d’abans”. E ben non pas. Apareishoc, un còp la campanha de vaccinacion aviada, qu’una persona vaccinada podèva totjorn estar contaminada e contaminar los autes. Un octogenari de la region parisenca ne hascoc l’experiéncia. Despausèc, dambe sos avocats, un referat dabans lo Conselh d’Estat e estoc debotat.
 
I a dus meses, un dotzenat de residents d’un EHPAD d’Alsàcia, qu’èran vaccinats, son estats un còp de mès tocats peu virus. Es lavetz qu’apariscoc l’argument qu’èra aquò la pròva que lo vaccin protegís de las fòrmas grèvas de la malautia. Un estudi miat en mitan espitalièr peu gropament public Epi-Phare muishèc que la proteccion es de 87% contra las fòrmas grèvas.
 
Es una bona resulta, mes me demandi se’s pòt comparar una eficacitat contra la malautia e una eficacitat contra las fòrmas grèvas. Aquesta eslissada semantica amagaré pas una pichona engana comerciala?
 
Una auta question que’m pausi: i avosse pas l’escandale Volkswagen sus las emissions de particulas finas de sos motors (Qui podèva dobtar deu seriosèr d’una firma coma aquesta?) me demanderí pas se las resultas anonciadas peus laboratòris son fidablas. Lo laboratòri Pfizer estoc, de son costat, mès d’un còp condemnat per frauda, de las qualas una estoc l’encausa de la mòrt d’un trentenat de personas au Niger.
 
Imaginatz que los laboratòris èran, i a pas guaire, a efectuar estudis suus efèits deus vaccins sus adolescents. Se los ensais son concludents, las firmas ganhan miliards. S’ac son pas, las firmas pèrden aquestes miliards. Seré possible qu’aquò aja una influéncia sus l’interpretacion de las chifras?
 
S’ajustatz ad aquò tot lo secret qu’entorneja los contractes entre las firmas farmaceuticas e los Estats e l’UE, me sembla qu’i a de qué botar son nas dens aquestes ahars.
 
Un deputat europenc demandèc de véser aqueste contracte e le receboc, mes dambe los paragrafes sus la responsabilitat en cas de problèma cancelats dambe raiaduras negras. La resulta de tot aquò es qu’informacions de totas se passejan sus la telaranha suu prètz pagat per las autoritats (e doncas los contribuidors) que seré exorbitants: 2 euros per la fabricacion contra 19,50 euros venuts, sia + 4 euros dempuèi qu’AstraZeneca estoc refusat per uns Estats. Vertat? Exageracion? Engana?
 
Coneishi quauqu’un que perdoc un amic pr’amor deu Covid e una auta persona que perdoc sa sòr tot escàs un còp vaccinada. Cadun se hè una idèia segon son experiéncia e sa sensibilitat.
 
Mes, per contra, se pòt trobar una unanimitat per díser que tot aqueste ahar de miliards publics s’ameritaré un pauc mès de clartat e de democracia. Non pas?
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Papioli
1.

Simple error medicala o afar que merita d'esser condemnada per un second tribunau de Nuremberg?
Quò barda au niveu lo pus elevat de la planeta.

  • 0
  • 15

Escriu un comentari sus aqueste article