CAPCALERA: la botiga

Jornalet, gaseta occitana d'informacions

Dimenge, 25 de julh

Joan-Marc Leclercq

Dimars, 15.6.2021 03h15

Peticion contra lo RN


Comentaris 7 comentaris    
Dolent Fluix Bo Molt bo Fabulós (9 vòtes)
carregant En cargament





Èi vist passar i a pas guaire una peticion en linha qu’apèra personalitats du monde d’Òc a signar contra lo Rassemblement National. Estoc l’objècte d’un article dens lo Jornalet lo 10 de junh passat. Cau senhalar que’aquesta iniciativa es l’òbra de Marie-Jeanne Verny.
 
Purmèr, diserí qu’aquesta accion se compren de plan. Aquest partit es un dangièr vertadièr. Cau tornar brembar qu’estoc creat per ancians sòcis de la SS (Pierre Bousquet, lo purmèr clavaire deu partit èra de la Division Charlemagne), que lo creator màger impausèc sa pròpria hilha au cap de l’organizacion abans qu’era le getèssa com un lordàs per una operacion de dediabolizacion a mira electorala.
 
Aqueste partit a pas coma sola linha directritz que lo nacionalisme francés, es l’enemic pièger de las lengas (Marina Le Pen, a maugrat de son nom plan breton, condemnèc dens una entrevista qu’i aja panèus en lenga bretona en Bretanha). Volon suprimir las regions (Aquò empacha pas de’s presentar a las eleccions regionalas, coma a las europencas lavetz que son en contra de l’Union europenca).
 
Son d’una linha politica de la quala a cada còp qu’un partit es arribat au poder, se’s acabat marridament.
 
Comprengui doncas lo chepic deus signataris, ne coneishi quauques qu’estimi fòrça.
 
Mes totun me demandi de qué cau hèr contra aquesta menaça. Signar la peticion es una crida, mes aquò sufís?
 
Se lo partit es vartièrament dangerós, perdequé pas demandar de l’interdíser?
 
Hmmm, es mauaisit de’s reclamar de la libertat en generau e demandar l’interdiccion d’un partit politic.
 
Me demandi fin finala se lo dangièr veng pas deu sistèma eth medish, que permet a un partit de prénguer las comandas d’un populacion sense conta-ròtla mès tard de çò que los au poder decidissen.
 
Au lòc d’un sistèma on la populacion a lo poder de decision tot lo temps e a un dret d’espiar sus çò que’s decidís, sèm acarats a un machina que pana lo poder au pòble per un periòde pendent lo quau un grop de personas pòt hèr çò que vòu en tot mandar la polícia contra los movements eventuaus de protèsta. Es benlèu una caricatura, mes es lo president elegit qu’a lo poder de cachar suu boton roge de l’arma atomica e pòt estar Marine Le Pen un jorn.
 
S’am paur doncas deu RN, cau prumèr, segon jo, pensar a cambiar lo sistèma de cap a una organizacion sociala democratica, es a díser on los estatjants an lo conta-ròtle permanent suus administrators que son pas qu’a lor servici e non pas petits reis que decidiscan tot solets.
 
E mès l’entitat territoriala serà pichona, mès aquò serà possible.
 
 
 
abonar los amics de Jornalet
 
 


 



publicitat
BANNER1 - AMICS DE JORNALET 07/21



Comentaris

16 de junh 15.50h

#5 Leon Ferrer?
WTF?


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

16 de junh 10.58h

#2 Demandèssen tot aquò a MLP, apareisseriá aitanlèu coma ultradrita e capborda.

Mas lo vòstre questionament subre la prensa dominanta, lo poiriam espandir a totes los politicians — mai que mai tota la socialistalha que se pretend d'esquèrra e que fot en l'aire tota alternança democratica en se far elegir a esquèrra per continuar obstinadament las politicas neoliberalas fòrça a dreita impausada per la mondializacion financiarista generalizada. Qualques bonas questions economicas e ... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

15 de junh 22.48h

Car Joan-Marc, a ieu, me sembla qu'un "sistèma on la populacion a lo poder de decision tot lo temps e a un dret (e mai lo dever, non ?…) d’espiar sus çò que’s decidís" es una societat libertària coma m'agrada, coma ne sòmnii.

Un sistèma aital, a las eleccions successivas, despuèi que ieu vòti, jamai non n'ai vist l'ombra d'un prepausat ont que foguèsse per qui que foguèsse. Lo darrièr còp que se n'es parlat, èra en Aragon e Catalonha, entre 1936 e 1938, abans la Retirada. ... Legir la seguida


Valora aquest comentari:   votar positiu 11   votar negatiu 1
Respondre comentari replica Comentari inadequat   Formulari d'abús de comentari

15 de junh 08.21h

La vox popularia a totjorn una guerra de retard.
Marine Le Pen es crotz de fuòc per l'eternitat de l'eternitat.
Lo comuniste es stalinian per l'eternitat de l'eternitat.
Entre los dos, lo partit socialiste es lo salvador, lo qu'a la pensada justa, aquel que velha a pas tombar dins l'extrem d'un biais o d'un autre e aquò per l'eternitat de l'eternitat.
Dins la realitat se passa la Revolucion aus Estats-Unis emben de nombros mèorts dins las elitas poderosas. E coma aquel pais dominava lo mon... Legir la seguida


Valora aquest comentari:   votar positiu 2   votar negatiu 10
Respondre comentari replica Comentari inadequat   Formulari d'abús de comentari

15 de junh 08.20h

#1 Soi jo qu'èi causida aquesta aficha de las annadas 80 per tornar brembar çò qu'es lo FN a la basa. Vertat que daubuns pòden benlèu interpretar aquò coma una publicitat, tot es possible, mes es per muishar la cara vertadièra d'aqueste partit.


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

15 de junh 07.54h

"Me demandi fin finala se lo dangièr veng pas deu sistèma eth medish"

E tanben daus mediàs collaboracionistas qu'an demissionat de sons pretzhèits d'educacion e d'analisis.
Me sembla alucinant que nat organisme de premsa s'interèssi ad aqueras eleccions, que los programas siin pas espepissats --lo caractèr suberrealista dau FN pareisheré hòrt lèu, e tanben la soa vertadeira cara que tots sajan d'estujar de longa.
Perqué digun damanda pas a MLP sa pausicion sus l'avortament ? Sus l... Legir la seguida


Valora aquest comentari:   votar positiu 8   votar negatiu 3
Respondre comentari replica Comentari inadequat   Formulari d'abús de comentari

15 de junh 07.32h

pasmens, publicar un tracte daus racistas end'illustrar aqueth tèxte... la causida es curiosa, o alara Jornalet saja de s'adaptar a son lectorat ?


Valora aquest comentari:   votar positiu 1   votar negatiu 4
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions