Dimenge, 10.2.2013 03h00
Que’vs prègui de’vs avisar. Dens aquestas linhas, ne balharèi pas de sentiment pròpri suus cas personaus de la Florence Cassez e deu Mohamed Merah, ni sus tau o tau arrèst de justícia. Lo subjècte n’ei pas de saber qui ei copable o qui ei innocent. Ne vòli pas sonque parlar deu tractament de la premsa de cap ad aquestes dus ahars juridico-mediatics. Lo mestièr de jornalista qu’ei un mestièr deus seriós, qui demanda rigor e soscadissa. E podèm díser que los jornalistas francés d’aquera passa complisson aquestas condicions? Ne dobti.
Per la premsa exagonau, lo cas de la Florence Cassez estoc lèu reglat. Ua francesa èra emprisoada au Mexic e cridava la soa innocéncia, aquò que volèva díser que n’èra. L’ensems deus jornaus escrits e parlats èra a d’ua per evocar la manipulacion policièra e mediatica mexicana, tanvau la volontat politica (sustot presidenciau) de la manténguer en preson. Que’s seguiscoc escambis entre França e Mexic mentre los quaus l’arrogància francesa muishèc tota la soa amplor e manquèc de hèr cabussar las negociacions.
Estoc aisit de provar que l’arrestacion de la francesa, filmada e retrasmesa au hinestron, èra ua mesa en scèna. L’acusada era medish que podoc entervénguer per telefòne de la soa preson estant pendent l’emission Punta de Partida en dirècte, e Genaro García Luna, lo director de l’Agéncia Federau d’Investigacion, qu’estoc plan obligat d’ac adméter en tot acusar la television de l’aver demandat d’ac hèr. Aqueste Luna avèva bonas relacions dab l’Eduardo Margoulis, associat en desacòrd dab lo Sebastian Cassez, lo hrair de la Florence. Tot aquò que pudèva a pasti-hasti.
D’un aute costat, la francesa èra l’amigueta d’un Israel Vallarta Cisneros, gavidaire d’ua banda de raubadors enchafrada la banda del Zodiaco, especializada dens la presa de victimas e mandada per pòsta de tròç de còs entà dar pròvas de la preséncia deus detenguts. Ça declarèc n’èra pas brica assabentada de tot aquò. Testimònis qu’an assegurat reconéisher la francesa per la soa votz e peu son accent, e quitament un ça digoc l’avèva trencat un dit. Mès un testimoniatge n’ei pas sonque un testimoniatge. E doncas nòstra brava premsa exagonau de denonciar per granas e bèras frasas que:
- Ua manipulacion que’s pòt debanar entà façonar l’opinion publica.
- Ua volontat politica que’s pòt exercir entà desviar lo cors de la justícia.
- Testimònis se podon enganar o mentir.
Tot aquò qu’ei un eslambrèc de clarvedença dens un monde de cècs cronics. Mès:
S’òm compara lo tractament mediatic deus dus ahars, ne podèm pas díser lo Mohamed Merah beneficièc de la medish soscadissa. Comparèm:
La Florence Cassez que cridoc la soa inociéncia. Lo Mohamed Merah ne podoc pas, pr’amor qu’estoc tuat per ua semonsa d’un quinzenat de policièrs qui perdurèc uas 20 secondas (enregistraments sonors).
L’arrestacion mexicana estoc ua engana, la deu tolosenc n’ei pas clara tanpauc. Lavetz que lo mendre activista basca b’ei cuelhut tranquilament en tot sortir de l’ostau per tres policièrs en civiu, lo Merah que patiscoc d’un sièti ipermediatizat qui perdurèc 32 oras en tot hèr arbecar e ténguer alèrt tot lo monde. Que cau signalar lo presumit assassin (La deontologia jornalistica francesa indica que cau utilizar aqueste adjectiu tant que l’acusat n’ei pas jutjat) sortiscoc d’en çò son entad anar postar films de las soas accions ad ua cadena pro-americana e pro-sionista, o tanben telefonar ad ua jornalista mentre lo son ostau èra encerclat peu RAID (!)…
Los jornalistas francés, tostemps prèsts de denonciar los poderós (deus quaus ne depenon pas, solide) avèvan hicat lo dit suu pes politic deu president mexican Calderón qui joguèc un ròtle important a carga dens lo debanament de l’ahar Cassez lavetz que l’ahar Merah que’s debanèc (com sovent) pendent la campanha electorau, e los candidats que gausiscon díser que “merquèn ua pausa” quan l’espectacle balhat avèva dètz còp mei de retrenida.
La premsa exagonau, prèsta de méter en dobte los testimònis mexicans, ne sembrèc pas geinada per l’abséncia de rapòrts a carga objectius contra lo tolosenc, ni tampauc per las enganas de la Nicole Yardeni (presidenta deu CRIF Mieidia-Pirenèus) qui vesoc un casque néguer quan èra blanc, ua mòto quan èra un scooter, o lo senhalament balhat qui ne correspon pas brica au lo deu franco-argerian.
E lo mot clau de l’istòria estoc dit per la Florence Cassez era medish quan tornèc botar lo pè a París davant ua seuva de microfònes. Que denoncièc lo hèit que lo monde au Mexic avèva cresut los médias e sustot la television: “Qu’èi pardonat aus qui’m jutjavan shens de conéisher lo dossièr, pr’amor qu’èran eths qui cridavan mei hòrt, … l’èster uman qu’ei atau, qu’a tendéncia de’s deishar emportar per l’opinion, de’s deishar convéncer aisidament.”
E que’vs asseguri que los jornalistas presents be notavan a de bon.
Comentaris
13 de febrièr 18.49h
#9 Re-adishatz !!
Me demandi se parlam de la medisha causa. La question n'ei pas de saber se un tipe qui a tuat dròlles ei un salopàs o non pas, (solide qu'ac ei, pensatz que ne sois pas uman ?, n'èi pas dròlles jo medish ?), La question ei de saber QUI a tuat. Entad aquò, cau conéisher lo dossièr a fons e soscar "hredament" shens reagir d'un biaish emocionau, com un enquestaire vertadièr.
"Son ostau clafit d'armas". Sabètz quinas armas i avèva dens son ostau ? I avèva dus Colt 45... Legir la seguida
Valora aquest comentari:
0
0
13 de febrièr 15.41h
#8 Joan Marc, i a totjorn d'incomprension per Internet per definicion... Ten a l'escrich onte i a pas l'intonacion, lei gèstes, l'escambi dirècte, la possibilitat de respondre frasa a frasa e donc de pas laissar s'installar l'incomprension...
Pasmens, m'avisi que siáu pas soleta d'èstre tustada per "la victimizacion de mehrad" qu'assajatz d'instillar... Seguissi d'a fons l'apreciacion de Teiric Lausa : "Aquò dit, la Tèrra se pòrta melhor sens un salopàs coma aqueste qu'a tuat ninòts ... Legir la seguida
Valora aquest comentari:
0
0
13 de febrièr 11.01h
#6 Re-adishatz,
Torni de léger vòste tèxte e'm veng ua soscadissa de mei.
Disètz : "Vòstre biais d'ignorar sei victimas me gèina fòrça fòrça".
E pr'amor ignorarí las victimas jo ? On ei escrit ? Aquò ta jo qu'ei hèra grèu, aquò que mia generaument a las errors judiciàrias. M'expliqui :
Se lo crimi ei òrre (dròlles tuats), lo monde ne cèrcan pas mei la vertat mès la venjança rapida. Lo respècte de las victimas ne seré pas meilèu de trobar lo copable vertadièr que non p... Legir la seguida
Valora aquest comentari:
0
0
13 de febrièr 10.47h
#6 Adishatz,
Soi plan d'acòrdi dab vosautes per çò qui ei de la fin deu vòste tèxte.
Lo debat ne pòrta pas vertadièrament suus hèits, mès suu tractament.
Disètz : " ... a tuat 7 personas que d'enfants : que volètz de mai coma "pròba" ? ."
E ben justament, vòli ua pròba pr'amor n'i a pas nada. Quina pròba avèm ? Lo testimoniatge de Montauban qui'u ditz "petit e meilèu gròs" lavetz qu'èra gran e magre ? Lo de l'escòla qui vesó uelhs blaus e "hreds com l'acièr" ?
Disètz ... Legir la seguida
Valora aquest comentari:
0
0
13 de febrièr 09.39h
òsca per l'article que denóncia lo circ a l'entorn de la Florença "paura inocenta que viu dins l'ostau amb un criminau qu'i embarra de personas... mai que sap ren de ren " ! Quina indecéncia vertat, luòga de faire perfiu bas !
Mai tròbi pasmens la comparason amb Mehrad mai que desastrosa, indecenta, per pas dire escandalosa... Me'n foti reialament de saupre coma foguèt desquilhat. Tròbi e mai gaire clar... lo fach de parlar de manipulacion de l'opinion a son prepaus. Vòstre biais d... Legir la seguida
Valora aquest comentari:
0
0
11 de febrièr 08.53h
#2 Adiu !
Justament, quan dises : "Mohamad Merah que i avó un compòrtament lamentable, sagnós e fin finala suicidari", aquò vòu díser que sias d'acòrdi dab la tèsa oficiau. Qu'ei aquò lo tèma deu tèxte. N'i avoc pas cap d'enquèsta, ne sabem pas sonque çò qui'ns digoc los jornaus, qui repetivan çò qui disèva lo Guéant. Lo Merah estoc jutjat shens de jutjament ni procès.
Jo, qu'escrivirí meilèu : "Mohamad Merah que i auré avut benlèu un compòrtament lamentable, sagnós e ... Legir la seguida
Valora aquest comentari:
0
3
10 de febrièr 23.56h
Es evident qu'an tuat Merah perqué s'èra jutjat se sabrián de causas que cal pas saber. Òsca per aqueste article
Valora aquest comentari:
1
0
10 de febrièr 22.12h
L'execucion de'n Merah demorarà un mistèri politic pesuc, atal coma las condicions del sius actes. E l'aver tuat evita, de segur, un jutjament qu'auriá donat responsas. Es una demostracion sens trantalhatge de la "raison d'état".
Aquò dit, la Tèrra se pòrta melhor sens un salopàs coma aqueste qu'a tuat ninòts (e adultes) inocents. La siá desaparecion me pausa pas cap problèma.
La florence Cassez? Ne parlarai amb mon caval (e tèni pas de caval): benlèu m'explicarà aqueste passion... Legir la seguida
Valora aquest comentari:
3
1
10 de febrièr 21.41h
Ne tròbi pas bona la toa comparason enter Florence Cassez e Mohamad Merah.
N'i a pas nada excusa tà Mohamad Merah que i avó un compòrtament lamentable, sagnós e fin finala suicidari. Mohamad Merah que cercava e que dava la mort exactament coma la falange espanhòla pendent la guèrra civila e qui uglava : "Viva la muerte" !
Après que'm hè dòu la toa comparason mausentida pr'amor que la part suu Florence Cassez que pausa questions de las bonas. Que lejoi la premsa en castelhan, com tu... Legir la seguida
Valora aquest comentari:
3
1
10 de febrièr 21.38h
Ne tròbi pas bona la toa comparason enter Florence Cassez e Mohamad Merah.
N'i a pas nada excusa tà Mohamad Merah que i avó un compòrtament lamentable, sagnós e fin finala suicidari. Mohamad Merah que cercava e que dava la mort exactament coma la falange espanhòla pendent la guèrra civila e qui uglava : "Viva la muerte" !
Après que'm hè dòu la toa comparason mausentida pr'amor que la part suu Florence Cassez que pausa questions de las bonas. Que lejoi la premsa en castelhan, com tu... Legir la seguida
Valora aquest comentari:
2
1
1
Comenta
Lo comentari es estat mandat corrèctament
10 comentaris
(5 vòtes)
En cargament
10 comentaris
Mandar
