CAPÇALERA: OPLO Licèu
CAPÇALERA2: IEA-AALO

Jornalet, gaseta occitana d'informacions

Diluns, 29 de novembre

Joan-Marc Leclercq

Dimars, 19.10.2021 03h00

La Republica tanben a besonh de sents


Comentaris 2 comentaris    
Dolent Fluix Bo Molt bo Fabulós (2 vòtes)
carregant En cargament





 Es amusant sovent de constatar a quin punt la Republica francesa reprodusís pro identicament l’aparat e lo faste de la Glèisa, lavetz que s’engloria d’aver hèit recular l’obscurantisme de la religion gràcia a la filosofia de las Lutzes. A pas hèit que’u remplaçar, fin finala.
 
Una istòria rescrita com un Ancian o un Navèth Testament, un drapèu a la plaça d’una crotz, una “Sang impura” a la plaça deu “Nòste Pair”, una escòla au lòc deu catequisme, prefèctes au lòc d’avesques, ostaus de vila au lòc de glèisas, la declaracion deus Drets Umans peus Dètz comandaments, la lista es longa e s’entanga pas ací. Seré un pauc tròp hastiós de tot citar.
 
Mes çò que cau ajustar, es que la Republica a besonh de sents, se cambia pas atau una formula que marcha plan. E per un azard deus grans, aquesta setmana am assistit a la “canonizacion” de dus d’entre eths.
 
Solide aquò lèva pas ren a çò que hascón dens lor vita, que son monde de qualitat, mes soi pas segur que lo tractament (daubuns diserén “la recuperacion”) de l’Estat de lor memòria lor agradaré tan qu’aquò. Quin ac saber?
 
Lo purmèr es Hubert Germain, darrèr companh de la Liberacion, que s’angoc de cap a Londres tre la capitulacion de França de cap a Alemanha en 1940. S’atz vista la ceremonia que l’estoc consacrada aus Invalides, e precisament lo moment deu devís deu president Macron, imaginatz lo cap de l’Estat en auba blanca e auratz la gravetat d’un Sent Pair dens un discors que’s vòu grandiós e liric. “Passèc sa joentat en tot cercar França de pertot…. Coneishèva pas qu’una sola fidelitat: la patria”. Notaratz en passar l’entitat immateriala “França”, aperada tanben “patria”, que preng la medisha plaça dens lo discors que lo nom de “Diu” dens la boca d’un papa.
 
La dusau persona que recebèc un omenatge aquesta setmana es lo praube Samuel Patty. Victima d’un crimi òrre, es vengut un sent peus promotors de la laïcitat, çò que pòt semblar estar un paradòxe.
 
Un còp desbrembadas las circonstàncias deplorablas de son assassinat, son conflicte dambe una colegiana fòrabandida de son cors qu’inventèc una mentida a son pair de musulmans pregats de s’identificar e de sortir de la sala, la reaccion epidermica deu dit pair suus hialats sociaus e un encadenament tragic dinc a un joen extremista sanguinari de soca chechèna, l’istòria es sovent abracada e simplificada en “Mòrt per aver muishadas caricaturas de Mahomet”, lavetz que lo cors, en vertat, se debanèc fòrça plan e que lo professor hasèva son trabalh coma cau.
 
De mès, es l’estructura educativa de la Republica qu’estoc mostrada deu dit per l’aver pas vertadièrament sostengut com ac auré calut, per aver pas ensajat de restablir la vertat, mes meslèu demandat de’s desencusar.
 
Aquò rai, s’es plan qu’i aja omenatges ad aqueste professor coratjós, las envoladas liricas sus la laïcitat deishan un gost amar de presic. Aunorar la memòria es plan, mes ne profieitar per tornar servir çò que’s pòt considerar coma una ideologia, que siam per o contra, ac es fòrça mens.
 
 
 
abonar los amics de Jornalet
 
 


 



publicitat
BANER2: OPLO liceu



Comentaris

22 d'octòbre 09.42h

#1 Soslinhavi jo lo hèit que la Republica francesa se hè lo campion de la laïcitat en tot semblar la Glèisa dens son sistèma de transméter son ideologia. L'occitanisme se hè pas lo campion de la laïcitat. Es la diferéncia.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 d'octòbre 10.12h

Aquò marxa tabé per l'occitanisme.

- Lo cateixisme es bien desvolopat : "unitat dins la diversitat" "dels Alps a la Mar Granda" "e vos qué fasètz" "l'important es de parlar la lenga (que los ancessors non nos an transmesa)" "vergonha" "òsca" "grafia vergonhosa" "los occitans que s'ignòran" "intercomprenèla" etc.
- Un drapèu, un imne (res de xocant tapauc en de 'quò)
- Les escòlas : calandretas
- Los sents : Alibèrt, Bèc, Lafont... Grosclaude (sent martirr demb sa grèva de la ha... Legir la seguida


Valora aquest comentari:   votar positiu 7   votar negatiu 16
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions