Bandièra01 1180x150: Comuna de Tolosa

Opinion

L’estranha estrategia de la desfèita

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Aqueste dimenge matin, soi passat au mercat. I avèva, solide, un fum de monde que distribuissèvan paperòts electoraus per candidats a l’eleccion, qu’èra la darrèra dimenjada quan èra permetut.
 
Èri pressat e, a quauqu’un que m’aparava un d’aquestes paperòts per l’ecologista Yannick Jadot, responoi, drin provocator, que votère per eth au dusau torn. Lo tipe semblèc solide susprés e’m responoc quicòm qu’ausiscoi pas.
 
Mes me demanèi çò que’m podèva aver esponut, justament. Quin pòt estar l’argument de demandar de votar per quauqu’un qu’es segur de ganhar pas?
 
Sabi que los candidats, quitament se son mau plaçats dens las enquistas d’opinion, deishan pensar que poden “causar la suspresa” au ser deu purmèr torn. Mes bon, passar de 4% a 20% en una setmana, quitament se los sondatges son “orientats”, me sembla pauc possible.
 
E doncas la famosa question de la manca d’union politica a esquèrra me tornèc au cap. De qué hèn, nòstes “pensaires progressistas”?
 
Per ganhar una eleccion majoritària a dus torns, se cau qualificar peu dusau torn e per aquò, estar segur d’aver pro de vòtes. Aquí sèm quitament mès dens lo maine de las matematicas que non pas de la politica. E nòstes miaires ac saben plan. Lavetz, de qué hèn?
 
La normalitat seré que, un an abans l’escadença electorala, los partits d’esquèrra s’amassen e au mens charren d’un programa comun (Ten, aquesta formula me bremba quicòm). Caleré solide que cadun hasca concessions, mes vau milhor atau que non pas deishar ganhar la dreta.
 
E ben non pas. Cadun i va de son costat, tot gaujós. Quina es lor estrategia?
 
Benlèu que s’agís pas que d’una estrategia personala, una mena de promocion de sa persona per s’assegurar un avénguer confortable, o lavetz que son victimas de lor “ego” que seré suberdimensionat. Aquò’s possible, que n’i a que son depenents a la notorietat coma d’autes a l’alcòl o au tabat.
 
De tot biaish, qu’ajan lo cap com un melon, que sian pagats per aquò coma la candidata d’esquèrra polonesa, Magdalena Ogórek, qu’acabèc presentatriz-vedeta sus una cadena de dreta, o que sian innocents, la resulta es la medisha: vam de cap au dusau torn que semblarà lo de l’eleccion passada, dambe una esquèrra absenta.
 
E aquí pareish evident que la democracia es trepida dambe lo pès. Un exemple: se calèva votar per saber se l’edat de la retirada serà portada a 65 ans, es segur qu’aquò passaré pas. E totun, s’Emanuel Macron es tornat elegit, çò qu’es fòrça possible, aquò serà hèit.
 
 
 
 
abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi! 31
2.

Se vòta conformament al seu interès pròpri e/o segond l’interès general.
Mais se comprend mens de votar contra les seus interèsses de classe, se non se ten pas compte de l’assimilacion sociologica a la classe dominanta minoritària.
Aiçò es un paradòxa politic.

  • 4
  • 0
pierre lachaud
1.

Perqué i a pas d'union de l'esquera? Perqué tot simplament l'esquerra es usada, minada per la compromission emben la dreicha e la corupcion, minada per los scandalas que la tòca tertant que la dreicha, minada per aver sostengut la politica de Macron dins sas mesuras autoritarias, minadas per pas aver sostengut los gilets jaunes, minadas per manca de perspectiva.
Oc-es aquelas eleccions van enterrar l'esquerra e tota la politica classica . Quò es d'una autra elita politica que nos chau. Lo pòple reclama de pas esser prengut per una machina o v'un que gena si pensa.
Avetz vist l'esquerra parla de la crisa economica que ven, benleu d'un crash financier e daus effets secondarias degut a la vaccinacion e a una medecina basada sur la chimia e l'autoriatrisme?
Parlan de ren e planjan nos.
Mas lo pòple en a son confle. N'i a pron.

  • 5
  • 7

Escriu un comentari sus aqueste article