Bandièra01 1180x150: Comuna de Tolosa

Opinion

“La Seria” va ganhar sa jòga

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Au parat de la purmèra Jornada de la Creacion Occitana organizada per l’IEO31 dens lo barri tolosenc de Las Pradetas, èi agut l’escasença de poder véser dus purmèrs episòdis de “La Seria”, deu realizator Amic Bedel, co-escrit dambe l’autor Julian Campredon.
 
Après la projeccion, èra possible de pausar questions au realizator, mes tanben a dus deus actors qu’èran presents, lo Marius Blenet (un deus dus personatges màgers) e la Maria-Elèna Cabròl (que jòga sa mair).
 
Amic nos expliquèc com tot aquò durèc dètz ans abans que França 3 balhe un budgècte de 50. 000 euros (en comparason, ça’ns digoc, una produccion d’Arte, per exemple, es dotada de 5 milions). Mes sustot lo servici public balhèc son autorizacion de programacion suu portau internèt de França Televizion. Per çò deu hinestron, res es pas encara decidit. Benlèu dependerà deu succès sus la telaranha.
 
L’escambi estoc fòrça interessant. Cau saber sustot que los dus co-scenaristas an realizada una seria dens la quala dus tipes … realizan una seria, e es aquesta “mesa en abís”, com se ditz dens lo mitan cinematografic, qu’es justament l’interés purmèr (n’i a mès qu’aquò) de la causa, a mon vejaire.
 
Pr’amor que, segon jo, la jòga purmèra de La Seria es pas de sedusir los occitanistas mes solide de balhar un imatge modèrne e vivent de la lenga au monde de l’endehòra, e d’aqueste costat, es largament ganhat.
 
Ma generacion i trobarà solide dambe jubilacion lo camin drin caotic de dus Blues Brothers occitans, mes tanben lo suberrealisme deus Monthy Pythons que’s saben jogar a cada moment dambe gausença de situacions au dusau grad, tot aquò servit dambe la bohada d’un road movie deu sègle XXI-au.
 
L’utilizacion de la lenga es fòrça judiciosa. Sèm pas dens una ficcion on tot lo monde parlaré occitan, mes dens la realitat, de la quala l’istòria se trufa dambe plaser. E aquiu, coma dens la vita vitanta, trobam de tot, deu tipe que s’interèssa pas brica au “patés” mes que’u parla fòrça plan dambe son amic catalan, de l’amigueta que crei que s’agís de portugués, de l’occitanista “a hum de calhau” qu’a un tutet de veitura que jòga la melodia deu Se Canta, etc …
 
La Seria es quicòm que podèm ara mostrar dambe contentèr aus non-occitanistas, va agradar aus joens susquetot. Segon quauqu’un deu Collectiu de las Pradetas, unas personas èran vengudas dambe l’idèia qu’estore drin ringard (sic) e se n’anguèn complètament encantadas e convençudas.
 
La jornada se perseguiscoc per lo concèrte dambe l’Eric Fraj e son guitarrista Morgan Astruc e deu grop Tarabass’t, un duet de cantaires ragga-rap acompanhats d’un DJ.
 
Ne sèm sortits estrambordats.
 




 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mica
1.

Pas tarribles aqueths purmèrs dus episòdis, deu men punt de vista, esperem la seguida!

  • 2
  • 0

Escriu un comentari sus aqueste article