Bandièra01 1180x150: Comuna de Tolosa

Opinion

La suspresas de l’istòria

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Coma l’èi dejà escrit, soi pas un istorian mes soi apassionat d’istòria, un amator dens las duas significacions deu mot. Çò que m’interèssa mès es de descobrir tot çò que m’an amagat a l’escòla pr’amor d’un programa de l’Education nationale focalizat sus París e ensenhant, au mens a mon epòca, un “roman nacionau” un pauc luenh de la realitat.
 
Solide, mas descobèrtas son centradas sus Tolosa, qu’es la vila on demòri e imagini que cada parçan deteng atau causas importantas de las qualas los quites estatjants son pas assabentats. Doncas, vaquí çò que descobriscoi sus ma vila:
 
Estoc vertadièrament lo far de l’Occident en mestior de retorica au sègle IV-au. Imaginatz que l’emperaire Constantin (véser imatge), un deus personatges mès famoses de l’istòria, mandèc dus de sons frairs per estar educats dens la Vila Ròsa, e hascoc vénguer a Bizanci Aemilius Magnus Arborius, un retor tolosan per ensenhar a son filh pròpri.
 
Estoc lo capdulh d’un beròi empèri que s’estenèva de Léger dinc a l’estrech de Gibartar deu temps deus Visigòts. Aquò dessùs los trabalhs de Jòrdi Laboissa son particularament conselhats. Lo 5 d’octobre de 2022 serà inaugurada una plaça de las “Reinas e reis visigòts de Tolosa”.
 
I estoc creada la purmèra societat d’accions deu monde. Son los molièrs deu Basacle qu’an botat sòus en comun per poder bastir molins suu riu en 1070. Aquò au mens s’ensenha dens las escòlas de comèrci.
 
Estoc una republica consulara entre 1189 e 1789. Un Jusiu, Elie Azar, n’estoc capitol, doncas administrator. Quan èi après a l’escòla que, a la Revolucion, la Republica francesa avèva balhat un estatut de ciutadan aus Jusius, m’a semblat plan, mes sabèvi pas qu’aquò existissèva en çò nòste dempuèi 6 sègles.
 
I estoc creada la purmèra academia artistica d’Euròpa. Lo Consistòri deu Gai Saber data de 1323. Vengoc puèi l’Academia deus Jòcs Floraus, balha prèmis literaris devath la fòrma d’una flor dempuèi 7 sègles, e fonciona encara uei lo dia.
 
Passarèi suu purmèr SAMU de França (fondat per Louis Lareng) o lo purmèr avion supersonic comerciau deu monde (dambe comandas electricas e analogicas, turborreactors a combustion e pilòt automatic) e autas innovacions tecnicas, que son pas encara part de l’istòria e sustot que’s debanèn quan èri jo encara a l’escòla.
 
E Tolosa es pas qu’un exemple. Cada vila, cada país a conegut una istòria rica e interessanta que lo monde deu lòc coneish pas totjorn. Per astre, i a associacions que perpetuan la memòria locala, coma l’Ostau Comengés que hè conferéncias per la votz de Joan-Pau Ferré sus Bernat IV, un actor important de la resisténcia aus crotzats.
 
 
 
abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

Bernat IV, foguèt un actor important de la resisténcia als Franceses pretextant d'una "crosada" per annexar lo centre e lo sud dels territòris de lenga occitana. Franceses, es plan lo nom que lor donan los dos autors de la Cançon de la Crosada. Los Occitans i son nommats, mai d'un còp, "los de nòstra lenga". ja, al sègle XIII.

  • 2
  • 0
Parsons, Pariers, Pariatge, Uchau
1.

Ligam en anglés d'aqui estant que los molins del Basacle son estudiats als Estats-Unids

https://qz.com/219270/bazacle/#/h/77336,2,77350,2/

Parsons, Pariers, Pariatge, Uchau n'es un escapolon del vocabulari d'aquel temps

Parsons : Dividendes
Pariers : Actionnaires
Pariatge : Société anonyme par action
Uchau : Action

  • 3
  • 0

Escriu un comentari sus aqueste article