CAPCALERA: PAIS INVISIBLE
CAPÇALERA2: mot amagat

Jornalet, gaseta occitana d'informacions

Diluns, 6 de febrièr

Joan-Marc Leclercq

Dimars, 18.10.2022 03h00

Recuperat per la Republica Francesa


Comentaris 3 comentaris    
Dolent Fluix Bo Molt bo Fabulós (7 vòtes)
carregant En cargament





Es atau que l’istòria es hèita: a cada còp qu’i a un eveniment, cadun i tròba una confirmacion de çò que pensava. Me brembi deus atemptats deu 11 de seteme a New-York, quan un predicador american i vesèva lo castig de Dius pr’amor de l’omosexualitat tròp liura aus USA (anecdòta vertadièra) lavetz qu’uns occitanistas eths, consideravan que lo país pagava son mesprés de cap a las minoritats culturalas dens lo monde.
 
Mes solide, son los qu’an lo poder que s’i escaden d’impausar lor vision. Es un pauc lo cas ara peu murtre òrre deu praube Samuel Patty.
 
Benlèu que los jornalistas vòlen utilizar frasas bracas per ganhar temps, mes presentan la victima coma “assassinat per aver hèit un cors sus la laïcitat”. Es pas vertadièrament exacte e i vesi una petita recuperacion que bota devath lo tapís los detalhs de l’ahar.
 
Samuel Patty èra un bon professor que hasèva plan son mestièr. Presentava son cors sus la laïcitat dempuèi unas annadas e pas nat problèma estoc pas jamès de notar, l’ensems de son ensenhats le consideravan coma un professor de qualitat, los pairs d’escolans tanben.
 
Hascoc doncas son cors coma de costuma, digoc a los que poderén estar butats per las caricaturas de las qualas parlava (e las de Mahomet n’èran pas qu’una part, es important) que podèva desvirar los uelhs. Es tot. Lo cors se debanèc tranquillament.
 
Levat que, un gojata, en conflicte dambe lo professor (e es aquò lo còr de l’ahar), e qu’èra quitament pas presenta, s’angoc plànher per le núser a son pair en tot díser qu’avèva demandat aus musulmans de la classa de levar la man e de se n’anar, puèi qu’avèva mostrat un òmi nud dambe las parts genitalas plan vesederas. Una mentida enòrma.
 
Lo pair es esmalit contra lo professor, manda messatges de colèra contra eth suus hialats sociaus, demanda sa demission deu collègi e pòrta un clam per “difusion d’imatges pornografics”. La religion  es pas mencionada. Per malastre aqueste pair coneish un militant islamic que’n profieita per botar òli suu huec e relaia la polemica que grossís.
 
E aquò cad dens las aurelhas d’un joen ahuecat islamista qu’a enveja de se n’anar hèr lo jihad en Siria, que compren benlèu pas tròp plan lo francés (es un Chechén nascut a Moscòu que parla lo rus e l’arabe) e que decidís de tuar lo professor. Solide lavetz qu’Allah, se digoc qu’es “mauaisit d’estar aimat per conasses”.
 
Doncas, se vei que l’istòria deu praube professor es pas tan simpla qu’aquò. Estoc un martir de l’ensenhament, aquò solide, qu’a perdut la vida a maugrat de la qualitat de son trabalh e sons esfòrces per trasméter lo saber a las joenas generacions, e la corporacion deus ensenhaires le pòt rénder omenatge, mes martir de la laïcitat, es un drin un destornament de l’istòria e l’Estat francés a tendéncia de’n hèr un sent republican, çò qu’es contrari a son idèia de basa.
 
Aquesta setmana, tot parièr, en tot legir la ficha Wikipedia deu cardinau de Richelieu, m’aperceboi qu’aqueste qu’installèc en França un poder ipercentralizat per la fòrça e, per exemple, la decapitacion deus adversaris politics (Lo duc de Montmorency per exemple) es considerat dens l’agiografia republicana coma lo qu’avèva “combatut dambe fermetat l’orgulh e l’esperit facciós deus Grands deu reiaume qu’abusavan deus bens que lo rei les avèva hèits.” Una grana figura d’esquèrra fin finala, una mena de Che Guevara abans l’ora …
 
Com aquò se ditz? Ah òc, cadun vei miejorn a sa pòrta …
 
 

abonar los amics de Jornalet

 


 



publicitat
BANNER1 - OPLO erasmus



Comentaris

20 d'octòbre 05.50h

#2 "soi Charlie", que de non!
No soi pas jamai estat interessat per un jornal de fons de commerci bèstia e maishant, victime d'una autra forma de connaria.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

19 d'octòbre 21.06h

#1 Òc soi d'acòrdi qu'utilizar las caricaturas dens un cors pòt estar plan o marrit, tot depen de com es presentat. Semblaré que dens lo cas de SP, èra meslèu plan hèit, qu'i avoc pas jamès clams de degun. Après, s'es sus la libertat d'expression en generau, caleré mostrar tanben caricaturas anti-republicanas revolucionàrias, mes cresi qu'ac hèn pas. M'agradaré de saber.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

18 d'octòbre 13.00h

Recuperacion, tiò!
Laïcitat e libertat d'expression, i a una diferéncia...
Amb aquò, carricatura vèn de carricare, çò es cargar, d'ont exagerar. D'aquí la question de l'exageracion
e dels limits a la libertat d'expression, legals o personals, en tèrmes de risque.
La preséncia dins le material pedagogic oficial de caricaturas religiosas pòt semblar pas de neutralitat laïca, e passar per de provocacion riscada de la part de l'ensenhant.
Explicar es pas justificar, l'exercici es de ... Legir la seguida


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OC Brigada

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions