Bandièra01 1180x150: Comuna de Tolosa

Opinion

Un punt sus l’inegalitat sociala

Bernard Arnault
Bernard Arnault
Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Un pichon coquinàs (Aquí lo jornau Fakir) s’es amusat de hèr un calcul lèu hèit per balhar una idèia de çò que pòt estar una diferéncia de revenguts dens l’Estat francés au sègle XXI-au.
 
S’es interessat a Bernard Arnault, lo miliardari francés, classificat purmèr au monde peu magazine Forbes. Se disèm “miliardari”, aquò vòu díser, solide, qu’a au mens un miliard de fortuna, mes per nosautes, paures mortaus, es mauaisit de’s rénder compte de quant tot aquò nos hè. Nos cau doncas comparasons dambe “los umans”.
 
Segon Fakir, la fortuna de Bernard Arnault a creishuda en 2015 de 9,27 miliards. Per aver una idèia, aquò hè 10 000 euros a la minuta.
 
Mes ara, comparam dambe çò que ganha las obrèras de Poix-du-Nord (59) dens l’usina Kenzo, qu’es sa proprietat. Les cau una annada per ganhar çò qu’amassa lor patron en duas minutas.
 
Per arribar a ganhar çò qu’eth ganha en una annada, les caleré trabalhar unas 463 000 annadas, sia sense de s’estancar dempuèi l’edat deu Huèc. Aquò deisha saunejaire …
 
Mes es pas tot. Per completar l’imatge, cau saber que las obrèras ganhavan encara tròp per Bernard Arnault. A doncas barrada l’usina per la mudar en Polonha. Mes aquiu tanben ganhavan “tròp”, quitament s’èra la mitat de çò que pagava a las Chtimias. A tornat desplaçar l’usina en Bulgaria per ganhar, eth, encara mès.
 
Segon çò qu’ausissi de la part deu monde que sostenguen la “lei deu meriti”, Bernard Arnault s’ameritaré per son trabalh 463. 000 còps mès sons sòus que non pas las hemnas de Poix, que, eras, solide s’encuentan tanben deus dròlles e de l’ostau.
 
Ara vos balhi soscadissas personalas que venguen pas de Fakir. Sovent se ditz qu’Arnault “crèa emplecs”. Es pas vertat. Se quauqu’un crompa un costume Kenzo de la navèra usina, lo cromparà pas endacòm mès, doncas es una pèrda per la concurréncia, que va benlèu licenciar o recrutar pas çò qu’èra previst.
 
L’auta reborida es de pensar que la vida deu miliardari mès ric deu monde es un exemple d’escaduda devuda a son trabalh. Que nani. Aquò son dinastias. Son paire dejà èra cap d’entrepresa, e sa maire la hilha du fondator de la societat Ferret-Savinel. Arnault a cinc dròlles, que son respectivament: PDG de Christian Dior Couture, director generau de Berluti, director generau de Rimowa, PDG de TAG Heuer, director de Louis Vuitton. Totis èran escolarizats au licèu Saint-Louis-de-Gonzague dens lo XVI-au a París dambe Brigitte macron coma professora.
 
Vaquí tot çò que cau saber per aver un imatge un pauc mès precís e mès chifrat sus personatges que’ns son sovent un pauc mitics. I calerà pensar lo còp que veng quan ausiratz parlar deu Bernat.
 
 
abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Cairon Florentin d\'Albigés
1.

Òsca per ton article !

  • 5
  • 1

Escriu un comentari sus aqueste article