Dimars, 14.3.2023 03h00
Ma soscadissa d’uei veng dirèctament de l’ubuesca situacion actuala. En resumit:
La màger part de la populacion de l’Estat francés es opausada a la refòrma de las retiradas. Dinc a 90% deus actius! Mes passarà benlèu totun. E es pas aquò qu’es ubuesc…!
La màger part deus opausants a la refòrma a matematicament votat per Macron au dusau torn de la presidenciala. A votat en hèit contra Marine Le Pen qui, ara es opausada a la refòrma.
Aquò’s pas brica logic. La question es: son hòus o la situacion es hòla?
Lo problèma veng de çò, l’auratz comprés, que l’elector deu causir un programa. Es a díser un nombre de punts que, ac sabèm, seràn o pas realizats (son en hèit promessas electoralas), lavetz que d’autes ac seràn mes son pas dens lo programa. Se cau brembar que François Hollande avèva dens son programa la ratificacion de la Carta de las Lengas minorizadas mes pas la “Lei Trabalh”, qui a getat per carrèras totis los qu’avèvan … votat François Hollande.
Imaginatz un restaurant on se poderé pas cambiar au menú impausat l’entrada ni lo dessèrt. Non, aquò existís pas. En politica, aquò existís…
Doncas se 5 punts deu programa vos agradan mes 15 autes vos agradan pas brica, vos calerà benlèu virar de cap a un candidat deu quau 6 punts vos agradaràn, quitament se 20 autes punts vos semblan marrits. De tot biaish, vos calerà votar contra çò que pensatz. Aquò’s un negament de l’intelligéncia.
E se lo candidat, un còp elegit, realiza çò que’vs agrada pas e pas çò que’vs agrada, ètz colhonat.
Caleré doncas un cambiament. Un sistèma on lo pòble poderé balhar son avís sus cada refòrma, au mens estar escotat s’es opausat, e non pas balhar carta blanca a qui que sia. E per aquò caleré abandonar lo sistèma deus partits politics.
Pensi tanben au “mandat imperatiu”, es a díser que lo representant es un vertadèr … representant, qu’a pas d’avís a balhar mes representa los que l’an elegit, que’u pòden desmandatar a tot moment se manca a son dever de representacion. De tau biaish qu’i auré fin finala pas besonh d’eleccion de representant mes votacions sur subjèctes debatuts.
Atau se poderé causir l’entrada, lo plat màger e lo dessèrt independentament.
Mes çò que’m hè paur dens la situacion actuala, es que l’aspècte ubuesc de çò que’s debana es pas encara un vertadèr subjècte de debat.
Comentaris
14 de març 16.43h
#1 On atz vist que cresi dens l'aunestetat deu poder politic ? Se disi que la situacion es "unuesca", sabi plan qu'es pas un azard e que nòstes cars mèstes ac saben plan.
Valora aquest comentari:
3
0
14 de març 11.19h
L'inteligencia de Joan Marc Leclercq e de quauques occitanistes es de creire a l'onestetat dau poder politic qualque sia. Mas...
Los temps cambian e au niveu internacionala la governança cambia de cap.
Darier los Estats i a las tenebras e son pus negras que las tenebras de la Bibla. Tot es mas messonja, a començar per l'istòria de l'umanitat, Sem estat aportar sur terra per de las civilisacions mai avançadas per esser daus esclaus obeissents e apres aver manipulat nòstra ADN.
Pretenci... Legir la seguida
Valora aquest comentari:
0
3
1
Comenta
Lo comentari es estat mandat corrèctament
2 comentaris
(4 vòtes)
En cargament
2 comentaris
Mandar
