Bandièra01 1180x150: Comuna de Tolosa

Opinion

Matematicas

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
A priòri, i a pas un rapòrt dirècte entre lo rugbi e las matematicas. Benlèu ne podèm trobar se sabèm que lo jòc mei beròi deu monde ei estat a la debuta un espòrt d’estudiants, doncas qui servissèva de solaciada entad un eleit intellectuau encuentat per estudis de haut nivèu, deus quaus shens de dobte las matematicas. Jean-Pierre Bourguignon, especialista de la geometria diferenciau e de la Corbe de Ricci, n’ei un exemple perhèit.
 
Mès podèm trobar un rapòrt mei estret dens lo calcul tramalhat de la classificacion de lasesquipas nacionaus qui hè l’International Rugby Board. De l’annada 2003 ençà, aquera federacion internacionau que publica un classament de las mei bonas esquipas nacionaus segon un metòde de calcul qui an benlèu engibanat un ser de hèsta sus un tròç de papèr destacat d’ua tavalha de restaurant. Aqueste calcul que preng en compte totis los encontres internacionaus despuish la debuta, qu’ei a díser l’an de gràcia 1871, quan Escòcia vençoc Anglatèrra peu purmèr còp. Estoc justament l’esquipa de la Ròsa qui s’arretrobèc atau au som de la ierarquia mondiau, mès non pas per longtemps. Prèsts? En fòrma? Haut, i anèm:
 
A cada encontre internacionau, l’esquipa qui ganha preng punts a l’esquipa qui perd. Dinc ad ara, pas arren que de normau e simplòt. Mès lo nombre de punts pres depen de la diferéncia de punts entre las duas esquipas ABANS l’encontre. De mei, vençosse l’esquipa mensh plan classada, lo nombre de punts escambiats serà mei important que s’ei l’esquipa mei mau classada qui ganha. Totun, lo nombre de punts escambiats ei limitat a dus. Aisit, non pas? Lapèira, ne copiatz pas per dessús l’espatla deu vesin ! Seguissèm?
 
S’ua esquipa ganha dab mei de quinze punts de diferéncia, lo nombre de punts serà multiplicat per un quocient de un virgula cinq. Se l’encontre compta per la fasa finau d’ua copa deu monde, lavetz lo nombre de punts ei simplament doblat. Per contra, los encontres amistòs e de competicions internacionaus son comptabilizats deu medisha biaish. Mès n’ei pas tot. Se preng tanben en compte lo hèit de saber se l’esquipa jòga a casa o a l’endehòra. Podèm contunhar o volètz ua aspirina?
 
Adara, vaquí la formula magica utilizada entà hornir o prénguer punts a ua esquipa arron d’un encontre:
 
Pausam qu’ua esquipa X encontra ua esquipa Y.
Sia Px lo nombre de punts de l’esquipa X abans l’encontre dens lo classament de l’IRB e Py lo de l’esquipa Y, la diferéncia serà aperada D.
A cada esquipa la valor de D serà aumentada de la valor de B, segon la règla seguenta: B = 3 se l’esquipa jòga a casa, B = -3 se jòga a l’endehòra e B = 0 sus terrenh neutre. Aquò que’ns balha ua valor Dx entà l’esquipa X e ua valor Dy per l’esquipa Y. Las valors Dx e Dy seràn limitadas a 10 en valor absoluda, sia entre 10 e -10.
 
Lavetz, se Dx = 10, X perderà 2 punts en cas de des·hèita mès 0 punts se Dx = -10.
Parallèlament, se Dx = -10, X ganharà 2 punts en cas de victòria mès 0 punts Dx = 10.
 
Mès n’ei pas enqüèra tot. Adara hasèm entrar lo paramètre de competicion e d’escart de quinze punts, aperat C, segon la règla:
Victòria dab 15 punts de diferéncia o mensh: C = 1.
Victòria dab mei de 15 punts de diferéncia: C = 1,5.
Victòria en fasa finau de copa deu monde dab 15 punts de diferéncia o mensh: C = 2.
Victòria en fasa finau de copa deu monde dab mei de 15 punts de direréncia: C = 3.
Tot aquò tad acabar ad ua formula simplòta qui resumís la situacion:
Se X ganha, que’u serà balhat C x (1-Dx/10).
Se X perd, que’u serà pres C x (1+Dx/10).
En cas d’egalitat, X ganharà o perderà, segon la valor de Dx: C x Dx/10.
 
Que cresi la simplicitat d’ua tau causa que’vs sauta aus uelhs, non pas?
 
Benlèu vau melhor un exemple, com a cada còp. Imaginatz que Romania encontra Russia en fasa purmèra de la copa deu monde en Anglatèrra en 2015. Va plan atau? Abans l’encontra, Romania possedís 66,18 punts e Russia 61,99. Russia ganha per 25 contra 17. (Qu’ei ua suputacion). De qué se passa?
La diferéncia abans l’encontre ei de 66,18 – 61,99 = 4,19 sia D. Se passa sus terrenh neutre, doncas B = 0 e cada esquipa guarda a son D la valor de 4,19. La victòria ne’s hè pas dab ua diferéncia mei grana que 15 punts e n’èra pas ua fasa finau, doncas C = 1. Segon la formula, Russia ganharà 1 x (1 – 0,419) = 0,581, çò qui Romania perderà. Russia aurà lavetz 61,99 + 0,58 = 62,57 punts e Romania 66,18 – 0,58 = 65,6 punts. En tot saber que los Estats Units an 66,04, son eths qui ganharén e qui passarén en 17au posicion shens de quitament jogar.
 
Bon, ètz astrucs, la campana que tringla, que’vs podètz barrar los líbers, interrogacion sus aquò la setmana qui veng. E pas un mot !
 
Peus curiós qui son arribats dins a la fin, vaquí lo classament actuau: 1/ Navèra Zelanda 2/ Africa deu Sud 3/ Australia 4/ Anglatèrra 5/ Occitània 6/ Gualas 7/ Samoa 8/ Irlanda 9/ Escòcia 10/ Argentina 11/ Tònga 12/ Italia 13/ Fiji 14/ Japon 15/ Canadà 16/ Georgia 17/ Romania 18/ Estats-Units 19/ Russia 20/ Espanha 21/ Uruguai 22/ Portugau 23/ Namibia 24/ Corèa 25/ Belgica 26/ Chile 27/ Alemanha 28/ Polonha 29/ Hong Kong 30/ Moldavia 31/ Kénya 32/ Zimbabwe 33/ Suècia 34/ Brasil 35/ País Baish 36/ Ucraïna 37/ Marròc 38/ Paraguai 39/ Sri Lanka 40/ Còsta d’Evòri 41/ Soïssa 42/ Tunisia 43/ Cazacstan 44/ Madagascar 45/ Lituania 46/ Islas Cook 47/ Senegal 48/ Israèl 49/ Malta 50/ Trinidad e Tobago.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gabrièu Balloux Bordèu
3.

M'i coneishi briga en rugbi; qué vòu diser "Occitània" dens lo classament? L'Estadi Tolzan?

  • 0
  • 1
aligardon
2.

Hòu, seguissem? Pas tròp alavetz e l'aspirina non m'agrada pas. Interessant totun e me platz çò deus punts doblats...mès d'ont ei França???

  • 0
  • 0
Mathieu Castel Amians
1.

Li manca l'intrada "França" dins lo tablèu ;) ...

  • 0
  • 0

Escriu un comentari sus aqueste article