CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Dijòus, 17 d'octòbre

Joan-Marc Leclercq

Dimars, 31.12.2013 03h00

La manipulacion es mes fòrta que tu (Visca la pensada fraccionada!)


Comentaris 16 comentaris    
Dolent Fluix Bo Molt bo Fabulós (6 vòtes)
carregant En cargament


La manipulacion, ne parlam sovent dens aqueras colomnas, l’atz remercat solide, es la tecnica de har acceptar a la populacion idèas que n’auré pas agudas sens aquò, o qu’auré quitament combatudas sens una preparacion psicologica benparada. Fòrtament utilizada en dictatura, servís plan tanben dens un sistèma dit democratic o d’eleccion, on l’expression es liura e on remplaça eficaçament los mejans de coercicion tradicionaus.
 
Mès coma es possible, dens païses iperinformats com los nòstes, on los ideaus de libertat, de democracia e de patz an trionfat definitivament, on las vielhas cresenças an cedit lo pas au racionau, que’s posca encara crànher d’estar abusat per l’antica propaganda de toton e sons gròs hius blancs? Es fòrça simple: la manipulacion es mes fòrta que non pas nosauts, mès lavetz dens proporcions que ne podètz pas suspausar.
 
Lo manipulator modèrne possedís utís mes poderós que non pas lo d’un còp èra. Acabadas la bonas vielhas campanhas d’aficas o los discorses ahuecats davant una horrèra electrizada, lo manipulator es psicològue, publicitari, marketingaire, escenografe, escenarista, dramaturgue e sabi pas qué encara. Sa paleta s’es eslargida, mès los mecanismes de modelatge deus esperits foncionan segon las medishas règlas.
 
Lo bon pòble, dens sa part màger, es pacific, es tostemps estacat a l’idèa de libertat e de justícia. Sauneja pas que de víver tranquillament, de balhar un teulat, de qué minjar e una bona educacion a sons dròlles e de véser l’armonia senhorejar a l’entorn. Lavetz, perqué un monde de violéncia e de guèrra? Justament pr’amor que lo manipulator sap plan utilizar los ressòrts de recèrca d’aqueste ideau. Es precisament sus aquestes sentiments que va jogar per obténguer la resulta voluda. Se lo manipulat es tan pacific qu’aquò, le cau lavetz har créser que son ideau de libertat e de justícia es miaçat per un “maishant”, designat per las tecnicas abituaus deu cinèma hollywoodian. La presentacion de las “pròvas” de la preséncia en Iraq d’armas de destrusida massiva responèvan perfèitament a una debuta d’escenari plan lecat. Coma ac disèva Alfred Hitchcock: “Mes escadut serà lo maishant, mes escadut serà lo filme.” D’on la rumor suu Viagra distibuït aus mercenaris néguers de Gaddafi, la pretenduda holia megalomana de Ceausescu, los faus camps d’exterminacion de Bosnia (Mercés Sénher Kouchner!), los murtres saunejats de nenets a l’espitau de Kuwait City e l’error intencionau de revirada deu discors d’Ahmadinejad.
 
Vau prénguer un exemple benlèu drin espantós mès sens de dobte evocator: quan un joen soldat SS, endoctrinat peus propagandistas aluserpits de son partit, arrèsta Jusèus per los miar dens un vagon per bestiar, e agís solament per òdi? Solide que non pas, lo taus de desobediéncia seré estat benlèu tròp haut. Son tribalh es de caçar enemics dangerós que miaçan justament l’ideau comun de patz e de bonaür saunejat per sons dròlles, per sons pairs e per sa patria. Solide, aqueste endoctrinament estó mes long que non pas qu’aquesta simpla frasa, mès l’idèa es aquí. Las nocions de bonaür e de benestar deu pòble èran preponderantas dens l’ideologia nazi. S’i son escaduts, dens una longa preparacion psicologica e per uns exemples plan causits, de’u har créser qu’èra dens lo camp deu Ben contra lo Mau. Aquò vos pòt semblar impensable, non pas? E totun a foncionat sus monde fòrça numerós.
 
Dusau exemple masclut: un grop de joens brinchuts massacran gaujosament un vielhòt dens un parc, lo trucan a la cara, le copan la maishèra a còps de pè e lo deishan com mòrt jasut dens sa sang. La victima de l’agression, era, n’a pas james trucat, hèit empresonar, nafrat condemnat ni tuat degun. Escandalós, non pas? Los assautaires, eths, son plan convençuts d’obrar peu benestar de l’umanitat pr’amor lo vielhòt s’apèra Robert Faurisson.*
 
La fòrça de la propaganda es plan de’ns har agir en contra de las nòstas conviccions originaus, de desirar una guèrra lavetz qu’èm pregondament pacifistas, de desirar un castig exemplari de cap aus mostres pedofiles quitament se son los d’Outreau qu’avèvan pas hèit ren, pr’amor la descripcion deu “maishant” es plan escaduda coma l’aconselhava En Hitchcock.
 
D’aquò, de qué podèm har per se’n premunir? La sola solucion es de refusar la pensada globau. Un drin coma las pòrtas virahuec dens las bastidas publicas, nos cau apitar parets de seguretat a l’endehens de nòste cervèth per evitar qu’un conclusion se posca espandir de cap a un aute problèma e formar atau l’amalgama dangerós. Nos cau pas foncionar per mots-claus coma “democracia”, “religion”, “extrème”, “islamista”, “fascisme”, mès estudiar cada situacion coma s’èra navèra e desconeishuda. Es lo sol mejan de n’estar pas manipulat.
 
Cada mot es important e cercar dens lo tèxte perpausat la preséncia (o pas) deus famós “mots-claus” que foncionan coma panèus de senhalizacion que’ns hèn virar la pensada au cervèth a dreta o ad esquèrra dens son caminament segon la classificacion simplòta “bon” o “maishant”.
 
Dens l’exemple recent de l’istòria de gasatges en Siria, lo legedor d’un article (sustot se s’agís de Le Monde o de Libération) pòt estar gavidat a l’avança dambe intencion de cap a una cèrta conclusion per formulas coma “dictator”, “populacion civila”, “violéncia” o “rebèlles”. A qui agrada un dictator? A qui agrada pas l’imatge romantica deu rebèlle? Qui a pas paur a la violéncia de cap a la populacion civila? L’afar es reglat avans la fin de l’article: lo gas veng obligatòriament deu camp governamentau e los mes pacifistas d’entre nosauts son dejà prèsts de sosténguer una intervencion imperialista qu’aurén criticada en d’autas circonstàncias. La vision de dròlles tuats o simplament alebats es insuportable a totis e nos hè pérder lo sens de la soscadissa.
 
Se las Pussy Riot s’ameritavan pas un castig tan pesuc, los jornaus francés an complasentament cambiat lo cap d’acús d’ “otratge a la religion” en “otratge au cap de l’Estat”, en insistir com cau sus l’aspècte “antiPutin” de la cançon cantada dens la basilica, lavetz que lo quite president en question avèva demandat un jutjament meilèu clement per las joenas punketas (Podèm díser que se’n fot, grops de rock antipoder n’i a a fanègas en Russia, que lo miaçan pas brica). Aquò empacha pas tanpauc que l’amic Vladimir es pas lo campion olimpic de la democracia e de la libertat, causa coneishuda, mès un pertrèit de maishant es lèu dessenhat e los escenaristas lo volon tostemps complet.
 
La dificultat lavetz es de guardar lo cap fred e de saber har la diferéncia entre la nocion de “dictator”  e la de “culpabilitat d’un dictator”.  Vos serà mauaisit d’explicar la nuança a vòstes collègas de burèu a l’entorn deu cafè, mès l’exercici s’ac vau.
 
Lutar contra la manipulacion, es pensar l’impensable. Justament pr’amor que vos ateng aquí on atz la costuma d’anar, suus camins largs de la soscadissa.
 
Prenguètz meilèu los sendèrs brostassuts.
 
 
 
 
_____
*: hèita vertadèra



publicitat
BANER1-2-3: DGPL AN LAFONT



Comentaris

3 de genièr 11.03h

#11
Adiu Natalia
Solide qu'aquò's un bròi article, mès Castèths utilisa una bròia lenga bien tipada (donc saborosa)....

---------------

Quò's amusant : arríbam ad auger una quinzena de comentaris quòra nos bótam a parlar de la fòrma e pas deu hons !


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

2 de genièr 09.53h

#14 Mes s'es dijà estat sancèr lo puzzle ? E hètz ací alusion a le famosa koinè occitana ?!
De tota mòda, qu'am totas les maneitas entà'u tornar har, o au mensh saber com èra bèth temps i a (que parli deu gascon) : un hèish de diccionaris locaus, autors locaus tabé, e sustot lo tribalh gigantàs de l'ALG e los enregistrament de le parabòla "de l'enfant prodigue" documentats per tota le Gasconha (escotadeirs en linha). Shèt de contar los locutors naturaus qui damòran. Dab tot aquò... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

2 de genièr 09.08h

# Castèths Vesetz : Lo pair Nadau que'vs a portat un puzzle : qu'ei un bèth puzzle de mes de 200000 pèças e un còp acabat lo puzzle, malaja , ac deishatz tot caijer : pecètas que n'i a de pertot : devath las cadièras, devath la taula, dens la cheminèia... Barrejadas que son . Que cau hèr ? Tornar hèr lo jòc pecèta per pecèta o las tornar botar au sac en tot s'avisar de'n mancar pas ? Be atau la lenga occitana : esbrigalhada de'n pertot. Los occitanistas que son a amassar los ... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

1 de genièr 20.01h

#12 arregladas


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

1 de genièr 17.19h

#9 Que pòt paréisher detalhs, o chic de causas que harí pujar pr'arré. Òc-bé, s'at vòletz. Mes aquiths detalhs que son, au cronta, punts màges per jo percè que ns'amuishan duas vistas de çò que diu estar le lenga de doman. E que hèi espelir questions. E s'at vau tot percè n'i a pas sonque diferenças meninas entre lengas occitanas ? E's pòdem permèter de barrejar mantun dialècte dehen un tèxte shèt d'i har cas ? Es grèu o pas ? Quau arrelacion aver dab los locutors naturaus ?... Legir la seguida


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

1 de genièr 13.51h

Les commentaires linguistiques de M. Castèth me donnent l'envie de ne lui parler qu'en français.
Beròi article que la lenga onòra de bon OGM ( occitan gascon mejan)


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

1 de genièr 10.34h

#9
E ben, fau diser qu'a fòrça de lugir suu Jornalet articles ont trèitan de çò qu'es legitime o pas en matièra de lingüistica, demb detzenas de comentaris ahugats per saber se l'anglés "processor" vèn deu latin dirèctament o indirèctament, o se "blu" es un simptòma de trolituda...


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

31 de decembre 17.22h

Es tot çò qu'avètz retengut de l'article, la qualitat de la lenga ? (paure pòble occitan, que crebarà de sa pròpria conariá)


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

31 de decembre 17.21h

Sus aquel sicut volia ajustar la mieuna.I a un mot qu'es un exemple de manipulacion de la pensada economica del ciutadan , un mot que s'enten gaireben cada jorn ,siague en reportatge siague en emission de la còla de saberuts,es lo mot e lo presentarai en francés:"charges".Quant de fés avem vist la paura fornièira del reportatge gemegar ,non sens rasons car atencion non soi pas aqui per tustar sus los botiguièrs,"n'en podem pas mai amb aquèlas cargas!" e lo pichot patron "Se las cargas nos... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

31 de decembre 15.16h

Adishatz Sénher Castèths,
La nòrma que seguissi dumpèi pauc de temps es lo diccionari de Nicoloau Rei Bèthvéder de gascon tolosan, que demòri a Tornafuèlha. Dens aqueste diccionari i a tanben conjugasons e un drin de gramatica. Lo poderatz consultar suu siti deu Congrès Permanent.
Lo gascon tolosan es solide en contacte dambe lo lengadocian e la fòrma trantalha sovent entre los dus. Parli tanben l’occitan a Tolosa on lo monde respon en lengadocian çò qui es l’encausa d’una me... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions