CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Diluns, 21 d'octòbre

Joan-Marc Leclercq

Dimars, 14.1.2014 03h00

Pèir, lo lop e l’antisemitisme


Comentaris 8 comentaris    
Dolent Fluix Bo Molt bo Fabulós (2 vòtes)
carregant En cargament


Una cronica setmanèra, aquò que s’aprèsta a l’avança e quan se tracta d’actualitat escosenta, tot pòt cambiar còp sec e lo tèxte es dejà obsolèt. Aquesta setmana, èi escrit au bèth miei de la tempèsta Dieudonné e los eveniments se son plan lèu encadenats ... e descadenats. L’espectacle jogat deu mes de junh enlà estó interdit per la decision d’un jutge solet deu Conselh d’Estat de la Republica convocat a la lèsta.
 
Parli doncas pas de l’interdiccion, mès balhi mon avís suu hons de l’afar, precisament au moment quan los mèdias semblan meilèu s’interessar a las viradas maitièras en escotèr deu president de Seine-et-Loire.
 
 
Laïcitat
 
Ne soi pas convençut mes qu’aquò que lo Dieudonné M’bala M’bala sia un antisemita, a maugrat de çò que ditz lo 110% de la premsa exagonau escrita e parlada. Susprenent, non pas? Analizem la situacion d’un biais apatzat (Es pas aisit). Per explicar ma pausicion, diserí qu’es meilèu un extremista de la laïcitat. A la debuta de sa carrièra, l’artista fòrma un duet damb l’Elie Semoun, jòga una comediòta damb lo Gad el Maleh, e se hè remercar per son actitud antiracista o meilèu anticomunautària. Se va presentar a Dreux a la eleccions contra lo Front National. Cadun pòt cambiar, solide, mès me sembla pas que venga d’un mitan favorable a una dretizacion extremista. De qué ditz dens soas entrevistas a l’epòca quan tot comença de virar e que la polemica s’installa?
 
 “Quan encontri un éster uman, me’n foti de sa raça, me’n foti de las comunautats. Las comunautats son una escroqueria, estar jusiu, es una escroqueria. “Notatz per la fin una formula ambigüa que pòt estar legida coma racista, mès la debuta explica plan çò que jo vesi coma un extremisme laïc. Se poderà doncas trobar aquí o aquiu la fin de sa declaracion sens de la debuta, çò qu’es un destornament. Ça horní tanben: “Uns musulmans prenguen lo medish camin en reviscolar concèptes coma la guèrra santa”. Es clar, fòrça clar. Sovent se peleja suus platèus de television on evòca la Republica francesa sens de comunautats. A pas jamei balhat son sicut sus las lengas ditas  “regionaus”, mès pensi pas qu’estorem francament d’acòrdi.
 
 
Comunautat negra
 
Puèi veng, segon jo, lo periòde de la contradiccion. Un bèth jorn, convidat suu platèu de Thierry Ardisson de Tout le monde en parle, es acompanhat a son arribada per la cançonIssus d’un peuple qui a beaucoup souffert de Tonton David mentre lo public truca de mans en ritme. Aquò que sembla l’enmalir pregondament e comença de s’acarar a un convidat que, abans son arribada, avèva  “parlat deus problèmas de la comunautat jusiva”, lavetz que l’istòria de l’esclavatge deus negues, era, es debrombada deus mèdias e deus libes d’istòria. Lo debat, pas tròp agressiu, s’en·hanga notablament entre tres participants (Ardisson se’n mescla  “coma crestian”) que’s reclaman de la laïcitat e d’una republica sens de comunautats. Mès totun la ressentida de Dieudonné de cap a çò que vei coma una injustícia es vesedera. Atau, se las comunautats  “son una escroqueria”, es mauaisit lavetz d’explicar pr’amor Dieudonné se reivendica de la soa. De tot biais, la  “competicion entre las memòrias” demorarà tostemps au còr deu pelei entre l’artista e los jusius. Per jo, lo Dieudonné es un extremista laïc que’s contraditz en plea contradiccion.
 
           
Polemica
 
Lentament mès segurament, vam assistir a un auçament de la votz entre lo bretonocameronés e unas personalitats en vista de la comunautat jusiva deus quaus podèm citar notadament lo Patrick Bruel. De frasòta en frasòta, las atacas van shisclar e van plear las colomnas deus jornaus. Totis an segurament ausit l’allegacion de l’umorista: “Los jusius son los mes grans escrocaires de la planeta”. Es evident que, dit atau, lo caractère racista de la frasa es pas de demostrar. Totun, cau, coma tostemps, la tornar plaçar dens son contèxte. Èra en seguida d’una declaracion d’Eric Zemmour (eth tanben acostumat deus clams de la LICRA e de SOS Racisme) que digó que  “la màger part deus traficaires son negues e arabis”, tanben qu’èra  “normau qu’un emplegaire refuse un negue o un arabi” e fin finau  “qu’entre 70 e 80% de la populacion de las presons francesas son negues e arabis”. Interrogat sus aqueste darrèra declaracion, Dieudonné ça responó: “Tiò, es benlèu vertat, mès per delictes deus petits [part tirada], mentre los mes grans escrocaires de la planeta son jusius, [part guardada mès inversada]… mmm, Madoff, … etc … “Vaquí com estó presentat a l’emission C dans l’air sus França5 lo 9 de genièr de 2014, mès replaçada dens lo contèxte, vesèm plan qu’es l’element d’una de las polemicas de las quaus los mèdias son gormands.
 
Lo dessenhaire Plantu, creador de l’associacion Cartooning for Peace per la libertat d’expression ça digó a I-télé dens un debat damb l’Alain Finkelkraut: “Cau anar véser un espectacle sancèr abans de’n parlar. Dieudonné truca sus totas las religions mès, per malastre …” abans d’estar interromput.
 

Alianças
 
Un còp la guèrra deu Dieudonné intensificada, caló lèu causir son camp. Dieudonné s’apressè lavetz de personas de totas, sovent controversadas, notadament lo trebós e agressiu verbaument Alain Soral (e eth antisemita vertadèrament), ancian sòci deu Partit Comunista pèi ancian sòci deu Front National. Aquesta apressada estó interpretada coma un raliament de Dieudonné a las idèas de Soral, mès james coma una aliança tactica o lo raliament de Soral a las idèas de Dieudonné.
 
En 2006, l’umorista se’n va hèr una virada a la hèsta deus Bleus-Blancs-Rouges deu Front National ­(de la quau se hè racompanhar amablament de cap a la sortida). Aquesta visita es denonciada coma una aleujança a las idèas de dreta extrèma, sens de precizar que l’artista avèva hèit la medisha causa a la hèsta de l’Humanité organizada peu Partit Comunista Francés! Se cau tostemps mauhisar de çò que legem dens los jornaus. Es pas forçadament faus, es a còps incomplet.
 
 
Shoah
 
Sa pausicion de cap a la Shoah es sovent citada coma pròva de son antisemitisme. Vesèm la causa de mes près. Las duas rasons per las quaus hè de l’olocaust un de sons chivaus de batèsta son:
 

La mesa en concurréncia de la patida de l’esclavatge deus negues qu’a pertocat uns 42 milions de personas (segon l’istorian Olivier Pétré-Grenouilleau) e la de la Shoah que, segon l’artista, aucupa lo prumèr plan e estuja l’auta. Aquesta pausicion es totun vesina de la d’uns Norman Finkelstein, hilh de subervivents deu ghetto de Varsovia que critica fòrça heròtjament  “l’industria de l’olocasut” per lo Congrès jusiu Mondiau o d’un Noam Chomsky d’un avís comparable.

Dieudonné n’i crei pas. En contra de çò que’s ditz comunament a coma l’a explicat Pierre Vidal-Naquet, lo combatent màger e infatigable deus revisionistas, la pausicion de critica de cap a las cambras de gas n’es pas automaticament la pròva d’un antisemitisme, mès tanben pòt vénguer d’un grop de pensada pacific d’esquèrra. Lo  “pair espirituau” deu revisionisme francés, Paul Rassinier èra justament dens aquesta dralha. Militant pacific, s’acarè a la preséncia alemanda d’un biais non-violent en estampar faus documents peus persecutats deu regime, deus quaus gaireben sonque jusius miaçats de deportacion. Denonciat, arrestat, torturat, estó enviat au camp de Buchewald pèi de Dora. Son libe, Le mensonge d’Ulysse, estó editat per la societat esquerrista La vielle taupe. Robert Faurisson se ditz l’eretèr de Rassinier. Podèm citar tanben jusius revisionistas com Josep Ginzburg o David Cole, entre autes.
 
 
Antisemitisme
 
Lo racisme e la discriminacion ne son pas acceptables, es un hèit. Ne pensi pas, coma los antisemitas, qu’i aja un problèma damb los jusius (diserí pas la medisha causa deus jacobins!), mès cresi qu’i a un seriós problèma en França damb lo mot  “antisemitisme” e son utilizacion. Coneishètz totis l’istòria de Pèir e lo lop (en rus Петя и волк) lo conde musicau rus de Serguèi Prokofièv. A pos de cridar au lop quan n’i es pas, los caçaires n’i cresen pas mes quan arriba vertadèrament. Se lo mot s’utiliza a truc e malhuc, pèrd sa valor, forçadament. Lo problèma, es que s’utiliza coma arma fatau per aver rason e trencar una discutida, en tot getar sus l’adversari un anatèma deu quau ne’s poderà pas james des·hèr. Qui se bremba de las lagremas d’Olivier Besancenot sus un platèu de television, acusat qu’èra d’antisemitisme pr’amor d’aver participat a una manifestacion a favor deus palestinians?
 
Lo somiu de l’abús l’am tocat damb  “l’afar Kassovitz”. Lo realizator francés es lo hilh d’un jusiu de soca ongresa deu quau lo pairs son estats deportats de cap a un camp d’exterminacion d’on son tornats. Pòt pas vertadèrament estar suspectat de qué que sia de maishant de cap a la cultura jusiva. Mès un bèth dia, suu platèu de Ce soir ou jamais, declara que  “pensa necessari de clarificar uns aspèctes deus atemptats deu 11 de seteme”. De qué digó aquiu? Los acús comencèn tanlèu de plàver, Europe 1 l’assimilè a  “l’extrèma dreta sordeish antisemita americana “, Lilian Massoulier deu Journal du Dimanche lo compara a Goebbels, Patrice Bertin et Renaud Revel dens France Info e L’Express l’aperèn  “revisionista” en tot lo comparar aqueste còp a Robert Faurisson. La medisha malaventura es arribada au Normann Finkelstein, citat mes haut, deus quaus tanben los pairs èran tornats d’un camp d’exterminacion.
 
Vaquí perqué benlèu cau rapidament tornar a un debat mes calme e a una analisi deus numerós elements, au lòc d’una polemica emberogida de noms de bèstias de tots. Sabi que son aquò vòts sents, mès s’ac volèm, b’ac podèm.
 
Espèri de m’enganar pas.



publicitat
BANER1-2-3: DGPL DICTADES



Comentaris

5 de febrièr 22.04h

A, Dieudonné ! Quand comencèt, n’èri un fan. Aquel ὸme, o cal dire, es una bèstia d’empont, un comedian extraordinari. Sos primièrs esquetches sus los comunautarismes èran non solament de cacalassar a se tustar lo cuol per sὸl, mas èran tanben inteligents…E puèi, a bèles paucs, l’ai vist cambiar, se radicalizar…talament que finiguèt per dire de frasas que francament me fasián pas pus rire. Pasmens ai contunhat de lo voler comprene. Al cap d’un moment, avoèri que i co... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

16 de genièr 17.42h

#5 Joan-Marc, n'i a una diferéncia de las grandas entre Desproges o Coluche e Dieudonné. Qu'es l'engatjament politic. Dieudonné es un umorista engatjat, que se presenta quasiment tot lo temps a de las eleccions politicas e ente los elements de son umor (coma la quenela) venen daus arguments politics. Quand eu s'engatja dins de las eleccions au costat de Soral o dau Parti Antisioniste - eissut de l'islam politic - son umor pren una autra dimension (quitament si, sei de consent, es mai que mai... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 de genièr 22.13h

Çò que sabi de Dieudonné es que lo François Hollande e lo sieu ministre de l'interior fan expulsar cada annada 20 000 ròms, ciutadans europèus.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

14 de genièr 18.06h

#4 Adiu lo Gèli,
Es vertat qu'es fòrça excessiu, mès cau tornar plaçar aquò a l'endehens d'una polemica que perdura dempèi bèra pausa on los escambis son sovent rufes deus dus costats. Sèm pas mes dens la soscadissa, solide, mès dens un pelei qu'es, de mes, sus l'empont d'un umorista que lança nhargas au limit deu corrècte, çò qu'es son hons de comèrci. Quan Desproges ditz : "Los Jusius se son tots aborrits de cap a Auschwitz pr'amor ne pagavan pas lo trin.", Es au limit tan... Legir la seguida


Valora aquest comentari:   votar positiu 1   votar negatiu 1
Respondre comentari replica Comentari inadequat   Formulari d'abús de comentari

14 de genièr 14.58h

Dieudonné seria pas antisemita : Galejas
qualqu'un que gausa dire "entre los josius e los nazistas soi neutre" es quauqu'un d'ignòble


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

14 de genièr 13.44h

Lo passat de Dieudonné excusa pas ren. Pas mai que per los ex-maos que retrobatz au servici dau MEDEF o de l'UMP. O los rotges-bruns de Riposta "laïca" (que venon de s'escandalizar sus una eventuala ratificacion de la Charta de las lengas). Las pausicions de Dieudonné me semblan claras, e an pas ren de veire amb las de Chomsky o Vidal-Naquet. Tot es pas comparable.
Aquo dich, ço que me sembla centrau dins l'afar Dieudonné, es pas sas idèias o son ipotetic umor. Es sas manipolis per pagar ... Legir la seguida


Valora aquest comentari:   votar positiu 12   votar negatiu 0
Respondre comentari replica Comentari inadequat   Formulari d'abús de comentari

14 de genièr 13.06h

Ok amb aquela opinion. Al revenge, es ben practic de parlar d'aquel afar. D'aquel temps se parla ges de la crisi, dels imperialismes estatals que son a tornar crèisser, dels salaris de mai en mai inegals...


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

14 de genièr 10.54h

Sui content d'aver legit aquò, per prénder un chic de recul sus la campanha-bulldozaire de la premsa ben-pensanta !

Pasmens, lo Dieudonné se geina pas per embauchar monde de las JNR (lo movement fascista de Serge Ayoub) dens son servici d'òrdi. A un moment, las contradiccions se pòden pas mei suportar. A quau jòc juga Dieudonné ? oportunisme financèir ? provocacion incontralada ?


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions