CAPCALERA: Lo Diari

Jornalet, gaseta occitana d'informacions

Diluns, 26 d'octòbre

Joan-Marc Leclercq

Dimars, 4.2.2020 03h00

Antisemitisme o racisme: cau causir?


Comentaris 7 comentaris    
Dolent Fluix Bo Molt bo Fabulós (2 vòtes)
carregant En cargament





Èi agut un còp de mès una charradissa dambe jo medish.
 
Au parat deu 75-au anniversari de la liberacion deu camp d’Auschwitz-Birkenau per l’Armada Rotja, la cadena França 2 programèc una serada tematica sus l’antisemitisme, animada per Julian Bugier (véser imatge).
 
Après la projeccion deus filmes documentaris “Antisemitisme” d’Ilan Ziv e “Cronica d’un antisemitisme d’uei” de Georges Benayoun, un debat amassèc Jean-Michel Blanquer (ministre de l’Educacion), Annette Wieviorka (istoriana), Haïm Korsia (rabin màger de França), Michel Jonasz (cantaire), Fatiha Boudjahlat (ensagista) e Rudy Reichstadt (fondator d’un siti anticomplotista).
 
Me soi dit qu’èra aquò una causa de las bonas. Puèi, la question que’m pausèi a jo medish estoc la seguenta: “Pòt pas benlèu estar contraproductiu de desseparar l’antisemitisme de las autas manifestacions de racisme?”
 
Lavetz me responoi de tira qu’es pas susprenent per çò de l’emission, que s’agís justament de commemorar la liberacion deu camp d’Auschwitz.
 
Puèi repliquèi a jo medish que seré estat benlèu tanben lo parat de parlar deus Rròms (o Tziganes) qu’estón embarrats dens lo medish camp deu medish biaish e ende las medishas rasons. A cada còps, los praubes, mancan l’omenatge e son a l’endehòra deu “dever de memòria”.
 
Poderem imaginar una serada tematica sus França 2 suu racisme antirròm e los prejutjats, sovent ancians e istorics, que pertòcan aquesta populacion?
 
Me soi dit qu’avèvi rason (a còps sabi reconéisher quan quauqu’un a rason) e doncas me soi demandat çò que volèvi díser per “contraproductiu”.
 
Es simple, ça’m responoi. I aurà solide, dens lo nombre, monde que van comprénguer qu’i a estigmatizacions de populacions que son mès grèvas que non pas autas. Non pas educar contra lo racisme en generau, mes contra una sola fòrma en particular, pòt menar a deishar muishar deu dit per exemple los Asiatics pr’amor de la paur deu virus de Wuhan, sense de’s rénder compte que s’agís d’una fòrma de racisme.
 
O lavetz, ausissi dejà los que van pensar “que n’i a pas tostemps qu’ende los medishes” e que lor patiment a eths sofrís, un còp de mès, d’una manca de reconeishença.
 
Me soi pas pelejat dambe jo medish e’m soi entenut ende díser qu’òc lo racisme deu estar pres en consideracion dens son integralitat, se que non la luta contra las segregacions e las estigmatizacions a benlèu pas nat sens.
 
L’educacion deu plan explicar que lo racisme comença pas au moment quan un poder tira los drets civics a una part de la populacion pr’amor de sas originas etnicas (es dejà fòrça tròp tard), mes que pòt començar a capsús per generalizacions, prejutjats, legendas que gaireben tostemps mian a la simpla mauhisença, puèi a la paur qu’ajuda a tot acceptar.
 
Me soi trobat de bon conselh e après aqueste debat de bona tenguda, soi anat béver un còp …
 
 
 
abonar los amics de Jornalet
 
 


 



publicitat
BANNER1: IEO Arièja



Comentaris

7 de febrièr 14.10h

#4 Sénhor! Nosautres Occitans avèm 3500 annadas d'istòria d'esquèrra, nòstre dever es de nos occupar dels pòbles minorizats e victimas del racisme dels pas bons


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

6 de febrièr 07.49h

En pus dels josius, dels resistants e dels gitans cal pas doblidar tanpauc los pedachos deportats e sagatats en massa.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 de febrièr 20.31h

#4
tirAtz
sÉnher
Nosautres
sÈm
primiÈrs
pÒBles
minorizatS
Nos devèm pas nos occupar > nos devèm pas ocupar
d'aquelas
venOn
d'endacÒm mai
A lÈU


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

5 de febrièr 19.10h

#3
Es una causa que ieu anavi dire, me tiretz los mots de la boca senher. Nos autres los occitans sem los primiers a sofrir del racisme e tanben i a los catalans e los arpitans e los autres poples minorizat. Nos devèm pas nos occupar de aquelas religions e autres poples que venen de endacom mai. A planleù


Valora aquest comentari:   votar positiu 1   votar negatiu 9
Respondre comentari replica Comentari inadequat   Formulari d'abús de comentari

5 de febrièr 10.41h

En realitat lo problèma es lo racisme que pertòca lo pòble nòstre, valent a dire, los Occitans e los nòstres fraires miègjornals, valent a dire, los Catalans opressats per l'Estat espanhòl racista, faissista e colonialista. Nos cal organizar amb las minoritats opressadas per França per, fin finala, far valer los nòstres dreches basics. Òsca per aquel article dels bons !


Valora aquest comentari:   votar positiu 4   votar negatiu 3
Respondre comentari replica Comentari inadequat   Formulari d'abús de comentari

4 de febrièr 17.18h

#1 Responsa (extrèit deu tèxte copiat-pegat) : "lo racisme deu estar pres en consideracion dens son integralitat".
Doncas aurí hèit la medisha constatacion, mes la vertat es que França 2 a programat una serada sus l'antisemitisme.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

4 de febrièr 09.22h

S'ac èi tot plan comprés, n'averetz pas escrivut un article d'aqueth ordi avosse portat l'emission en question suu racisme antirròm o antiasiatic.


Valora aquest comentari:   votar positiu 5   votar negatiu 3
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions