CAPÇALERA2: AMICS DE JORNALET

Jornalet, gaseta occitana d'informacions

Dissabte, 16 de decembre

Joan-Marc Leclercq

Dimars, 10.10.2017 03h00

Calomniatz, ne demorarà tostemps quicòm


Comentaris 12 comentaris    
Dolent Fluix Bo Molt bo Fabulós (6 vòtes)
carregant En cargament


Es totjorn plan de començar un article per una faussa citacion. Voltaire l’auré pas jamès dit, ni escrit. Mes aquò rai. Es pas lo subjècte.

Uns dias au davant, èi agut dambe un amic un prosei que’m pausèc question. Lo devís cadoc sus Thierry Meyssan, l’òmi qu’escrivoc “L’esvarjabla impostura” dens la quala bota en question la version oficiala deus atemptats deu 11 de seteme de 2011 e n’atribuís la responsabilitat au govèrn estatsunidenc de l’epòca. Mon amic ça digoc: “Thierry Meyssan es un tipe de dreta extrèma”. Aquò me questionèc. “Ah bon, ça responoi, n’ès segur?” Mon amic semblava cèrt de çò que disèva. Le demandèc lavetz se’n sabèva un drin mès, mes eth demorèc evasiu.
 
Decidiscoi lavetz d’espiar tot simplament la fica Wikipèdia de la persona en question. Vaquí çò qu’i trobèc:
 

— Es sòci, estant joen, deu Renouveau Charismatique, una organizacion pentacotista, e estudia la teologia au seminari d’Orleans. Pas una pròva de deriva de dreta extrèma peu moment, mes pas lo contrari tanpauc.
 
— Puèi s’engatja a favor deus drets deus omosexuaus (se’n ditz) e’s reïvindica liure-pensaire en tot renegar son educacion catolica. Aquiu, una debuta francament de las atipicas ende quauqu’un que seré fascista.
 
— Un pauc mès tard entra au Partit Radicau d’Esquèrra. Aquiu tanpauc, ren que muisha idèias totalitàrias de dreta.
 
— Crea en 1994 lo Réseau Voltaire, ende la defensa de la libertat d’expression e la laïcitat. Aquesta associacion publica enquistas que denóncian la dreta extrèma e lo Front National.
 
— De 1996 a 1999, es coordinator deu Comitat Nacionau de Vigilància contra la Dreta Extrèma.
 
— En 2001 es editat son líber sus la caduda de las Tors Bessonas. Es convidat, puèi lèu interdit de television francesa. Autes paises, antiamericans, le daubrissen las pòrtas.
 
— Se declara pròishe deu Hezbollah iranian e deu Venezuela. Ditz qu’es prèst de trabalhar dambe totis contra l’imperialisme (estatsunidenc sustot), coma Jean Moulin que volèva “trabalhar dambe totis los que defenen la libertat, de la dreta extrèma e l’esquèrra extrèma”.
 
Es benlèu pr’amor d’aquesta darrèra pausicion que podèm notar un viatge en 2006 en Siria dambe Ahmed Moualek (deu siti Labanlieuesexprime) mes tanben Alain Soral qui, eth, es plan de dreta extrèma.
 
Me soi lavetz demandat pr’amor un tipe atau, qu’a totun fòrça mès punts de biografia anti-dreta extrèma que non pas fascista a la reputacion de n’estar aus uelhs de quauqu’un coma mon amic qu’es pas lo darrèr deus colhons.
 
Ne soi arribat a la responsa que, ajant atacat lo poder deus Estats-Units dens una polemica e ajant recebut un cèrt reclam un pauc de pertot (levat en França), au lòc de respóner suu hons, la contra-ataca se podèva pas hèr que sus la reputacion. Pegatz l’etiqueta “dreta extrèma” sus quauqu’un e veseratz un hum de monde se desviar d’eth, essajar pas de’n saber mès, escotar pas çò que ditz e fin finala estar un contra de tot çò que volerà provar o declarar.
 
Es un pauc coma, a l’Edat Mejan, quan los codemnats avèvan la cara marcada au hèr roge o quan los empestats que viravan una tarabastèla ende que totis los huèjan quan passavan per carrèras.
 
Es pr’aquò, un còp de mès, que cau sustot analizar çò que disen lo monde e non pas generalizar en tot los botar dens sacas de color diferentas. Demanda un drin mès de trabalh, mes sèm atau segurs de’ns enganar pas. Un biais de hèr dambe lo quau totis son d’acòrd e que sembla una balanitat, mes que paucs practican vertadèrament.
 
 


abonar los amics de Jornalet
 



publicitat



Comentaris

13 d'octòbre 22.09h

"Dens la region austriaca de Burgenland, l'esquèrra govèrna amassa dambe lo partit de dreta extrèma. Sabi pas se los nacionalistas austriacs son venguts socialistas o se lo sociau-democratas son virat fascistas."
La question de pausar qu'ei: quan l'esquèrra (o au mensh ua partida) decida de har un tròç de camin dab l'extrèma dreta, qui ei qui va colhonar (per non pas díser borrar) l'aute?
Qu'èi lo men avís sus la responsa...


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

13 d'octòbre 11.22h

#9 Sus aquò, cau reconéisher qu'atz rason. I a sostengs politics que podon estar susprenents.
Se lo Soral es estat un jorn sòci deu Partit Comunista e doncas pòt demorar encara drin estalinian, lo sosteng de JMLP a Iran sus l'ahar de las armas atomicas se sembla l'amassada d'una carpa e d'un conilh, en tot saber çò que pòt díser lo vielh breton sus la religion musulmana.

Es donc un problèma de sostengs, de recèrca de sosteng, d'adversari comun, benlèu de recèrca de publicitat. S'u... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'octòbre 21.53h

#8 "L'intenautalha parciau e ideologizada de l'occitanisme" que't ditz mèrda. 

E sustot, "L'intenautalha parciau e ideologizada de l'occitanisme", quan escriu quauquarren entà comentar aquèth article, qu'argumenta en tot emparà's sus hèits (#3, #9) e non pas sus declaracions boharócas com tu dens lo ton pòst...


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

12 d'octòbre 19.45h

#7 Que s'ei trobat un extremista de dreta com Alain Soral entà sostiéner Corea deu Nord, Iran e Venezuelà. E quitament organizar, en 2007, dab lo Jean-Claude Martinez enqüèra au FN a l'epòca, un collòqui on èra convidat e present lo cap d'estat major deu Venezuelà.
Lo quite Jean-Marie le Pen a l'epòca d'Ahmadinejad, convidat au Centre Zahra (lobby pro-Iran en França), sostien la Republica islamica d'Iran:
https://www.youtube.com/watch?v=qAo2QLUm-0k


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'octòbre 10.44h

#6 #7 Vòstras reaccions son justas e sanitosas, Sénher Leclerq ! Mas per l'internautalha ideologizada e parciala de Jornalet e de l'occitanisme en general, aquò passa mal. Fiertat, marrida fe... qué volètz...


Valora aquest comentari:   votar positiu 3   votar negatiu 10
Respondre comentari replica Comentari inadequat   Formulari d'abús de comentari

12 d'octòbre 09.58h

#3 Vaquí quicòm d'interessant justament : "Meyssan sosteng Siria, Iran, Russia, Corea deu Nòrd, China, Venezuelà". Atz dejà vist un fascista sosténguer Venezuela o Corèa deu Nòrd ? O une républica islamica ? Es pas seriós.

Meyssan sosteng regimes autoritaris, ac podèm arcastar, mes pas de dreta extrèma. Li pegar l'etiqueta "dreta extrèma" quan sosteng Corèa deu Nòrd permet d'escóner son anti-imperialisme american, qu'es la rason purmèra de son sosteng ad aquestes regimes que s... Legir la seguida


Valora aquest comentari:   votar positiu 4   votar negatiu 4
Respondre comentari replica Comentari inadequat   Formulari d'abús de comentari

12 d'octòbre 09.46h

La tòca d'aqueste article es pas estada compresa per totis, ça'm par.

S'agís pas de "deféner" un tipe mes s'agís de soscar sus çò que pòt estar una reputacion e la cara que poden balhar articles subjectius.
La causida de jp es pas neutra, sembla un tèxte "a carga" sonqu'en espiar los mots causits. Jo avèvi causit Wikipèdia pr'amor qu'es pas tròp subjectiu. Per exemple es escrit qu'es estat "l'icòna d'un movement sectari e integrista crestian". "Icòna" èra vertadèrament ? Un es... Legir la seguida


Valora aquest comentari:   votar positiu 2   votar negatiu 4
Respondre comentari replica Comentari inadequat   Formulari d'abús de comentari

11 d'octòbre 17.25h

Comprène mau l'espantanta defènsa acarnassida que fasètz d'aquèu Thierry Meyssan, pedacho (que sembla pas saupre ço que fasian leis nazis deis pedachos !!) d'estrèma drècha e afogat dau regim criminau de Bachar al-Assad. A que jogatz, coquin de sort ?


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

10 d'octòbre 21.20h

#2
Un revirador automatique seriá pieg per la linga, quau que siàia lu chafre d’aquela, que de pas voler legir — o b’etot poder segre lu liam e lu passar au virador de chas ggl — un bilheton escrich per daus francilhons, o aquí, de las francilhonas.


Valora aquest comentari:   votar positiu 4   votar negatiu 2
Respondre comentari replica Comentari inadequat   Formulari d'abús de comentari

10 d'octòbre 16.07h

Lo Thierry Meyssan que collabòra dab Soral despuish 2007. Las soas videòs que son difusidas suus sitis controlats per Soral e un deus sons libes qu'ei difusit per lo son ostau d'edicion.
Lo tipe qu'ei "refugiat" dens la Siria de Bachar al-Assad despuish 2008. Que's hè, peu biais deu son siti (Réseau Voltaire) le defensor de tots los regimes autoritaris de la planeta (Siria, Iran, Russia, Corea deu Nòrd, China, Venezuelà, etc...).
Mes bon, que van díser que'u hèi un maishant procès...... Legir la seguida


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions