CAPCALERA: la botiga

Jornalet, gaseta occitana d'informacions

Dimècres, 21 d'abril

Joan-Marc Leclercq

Dimars, 2.3.2021 03h00

Debat acarnassit sus la carn


Comentaris Un comentari    
Dolent Fluix Bo Molt bo Fabulós (9 vòtes)
carregant En cargament


Julien Denormandie, ministre de l’Agricultura e de l’Alimentacion




Vos amagarèi pas que soi vegetarian dempuèi mès de 20 ans, doncas aqueste debat m’interèssa, mes es pas lo subjècte que volerí tractar, meslèu lo biaish dambe lo quau uns ministres se son enganats publicament en se mesclar de quicòm que coneishen pas guaire.
 
Tot a començat quan, per se plegar a las constrentas sanitàrias, la comuna de Lion (Arpitania) a decidit de servir temporàriament un menut unic sense carn dens las cantinas escolaras. Son conse, Grégory Doucet, es deu partit deus Verds. 
 
Aquò causèc una responsa lèu escrita sus Tweeter de Julien Denormandie, ministre de l’Agricultura e de l’Alimentacion, que desenvolopèc sus l’antena de RTL lo dimarç seguent: 
 

“D’un punt de vista nutricionau, es de non pas créser”, ça digoc, avant d’ajustar: “D’un punt de vista sociau, es una vergonha, qu’es tostemps una ecologia de l’entre-se, on, a cada còp, son los mès fragiles, qu’an pas forçadament accès a repaishes equilibrats que son penalizats per decisions atau.”
 
Estoc sostengut peu quite ministre de l’Endehens, Gerald Darmanin. Qu’escrivos tanben sus Tweeter: “En mès de l’insulta inacceptabla aus agricultors e aus carnissèrs franceses, se vei que la politica moralista e elitista deus Verds exclusís las classas popularas. Fòrça dròlles an sovent pas que la cantina per manjar carn ... Ideologia escandalosa.
 
Quan quauqu’un “tweeta” mès viste que non pas son ombra, risca de s’enganar maishantament en public. Estoc hèit. En dehòra deu debat sus la carn, daubuns an hèit remercar qu’una tala decision èra estada presa per Gérard Collomb, lo conse de Lion precedent, engatjat a costat de LREM, sense que nat comentaris estosse hèit. Una cofa de las bèras. 
 
Puèi, per enfonsar lo clau, tota la premsa se botèc a estudiar se çò qu’avèvan dit los ministres èra vertat. Solide qu’èra pas encara qu’un teishut d’asenadas.
 
Un estudi de 2017 de l’Anses (l’Agéncia nacionala de seguretat sanitària de l’alimentacion, de l’environament e deu trabalh) contraditz l’argument sociau: los dròlles de pairs qu’an un bachelierat + 4 manjan mens de carn que non pas los qu’an peirs mens diplomats.
 
Un article de Le Monde deu 27 de heurèr mostra tanben que “Non pas, es pas indispensable de manjar carn per estar en bona santat. En contra de las declaracions deu ministre de l’Agricultura, lo consensus scientific pensa que los dròlles poden créisher en bona santat sens manjar carn.”
 
D’autes son anats cercar la chifra de 80% de carn servida dens las cantinas francesas que … venguen de l’estrangèr.
 
Autes comentators, a còp privats suus hialats sociaus, an denonciat una mesura “dictatoriala” deus ecologistas, lavetz que s’agís d’un conse elegit democraticament que bota en plaça una mesura qu’èra dens son programa e que son predecessor, ac cau tornar díser, aplicava tanben.
 
Demòra que Julien Denormandie es conegut per reprénguer mot per mot las declaracions de lobís a favor deus OGM e per respóner pas a las demandas de rendètz-ve d’associacions coma UFC Que Choisir, Greepeace o “Pour une Autre PAC” que s’en planhen dens un comunicat comun.
 
 
Aurà aquò balhat lo parat a fòrça jornalistas de hèr au jòc de minister checking e de s’apercéber qu’es possible d’estar a un pòste a hauta responsabilitat en tot díser asenadas. 
 
 
abonar los amics de Jornalet

 



publicitat
BANNER1: IEO Arièja



Comentaris

2 de març 07.59h

U.E e Mexica an signat una pacha per l’importacion de 20 000 Tonas de carn bovina ambe taxas de doana a 7,5%, de 10 000 tonas de polhs sens taxas de doana de 10 000 tonas de carn de pòrcs sens cap de taxas de doana.

l’U.E es acarnasida a far minjar de carn e a l’ajuda dels agricultors nòstres.


L’avetz volguda, Europa : aqui l’avetz !

Lo sembla acarament carn contra cap de carn es lo bringe per pivelar e jogar, las causas d’importancias se passan dins la rèire fogana a ... Legir la seguida


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions