CAPÇALERA: MARPOC
CAPÇALERA2: mot amagat

Jornalet, gaseta occitana d'informacions

Dissabte, 2 de julh

Joan-Marc Leclercq

Dimars, 17.5.2022 03h00

Una guèrra es una guèrra, una armada es una armada


Comentaris 2 comentaris    
Dolent Fluix Bo Molt bo Fabulós (8 vòtes)
carregant En cargament





Es fòrça banau ara de díser qu’a la guèrra de las armas s’es ajustada la guèrra de la comunicacion, aperada tanben “guèrra deus mots”. Es pas vertadièrament una navetat, èra dejà lo cas per las guèrras ditas “modèrnas” dempuèi la debuta deu sègle XX-au.
 
Sus çò que’s debana en Ucraïna, sabèm qu’en Russia es pas permés de parlar de “guèrra”, pr’amor que s’agiré d’una “operacion militària especiala”. Se quauqu’un parla de “guèrra”, aquò se pòt considerar coma “informacion mensongèra sus las fòrças armadas” e vos pòt costar dinc a quinze annadas de preson. Poden doncas pas aperar un gat un gat…
 
Deu nòste costat, i a tanben mots que’m mancan. Non pas que sian interdits, mes son pas utilizats peus jornalistas e aquò be’m hè dòu.
 
Repròchi los moments quan los jornalistas emplegan los mots “Los Russes”, “Russia” o quitament “Moscòu” quan benlèu seré milhor d’emplegar los mots “soldats russes”, “armada russa” o “poder rus”. Quina diferéncia, me demandaratz?
 
Es fòrça important segon jo. Son pas ciutadans que hèn la guèrra, son soldats. Benlèu son professionaus e engatjats que cresen a l’emplec de la fòrça, e doncas lo mot “soldats russes” s’aplicaré milhor, benlèu son aperats civius qu’i son forçats, e lavetz l’utís de malastre deu pòble ucrainian es una institucion que s’apèra “l’armada russa”.
 
Pr’amor que çò que manca dens tot aquò, es de tornar brembar qu’aqueste malastre es la resulta d’una politica militarista, basada sus la hidança dens l’emplec de la fòrça. E cau pas descobrir aquò ara, mes i cau pensar quan vesèm la desfilada deus tancs e deus missiles sus la Plaça Roja los jorns de hèstas nacionalas o sus autas plaças deu monde.
 
Utilizar pas aquestes mots es empachar de pensar qu’una aute camin es possibla, lo deu pacifisme. E diserí quitament: lo de l’antimilitarisme. La critica de cap ad aquesta institucion (e non pas de cap aus òmes que la compausan) èra fòrça viva dens las annadas setanta deu sègle passat. Se cau brembar plan de la cançon de Greame Allwright: “Dinc a la cinta”, de la de Maxime Le Forestier: “Paracadudista” o encara de l’album de dessenhs de Cabu: “Avalisca totas las armadas!”
 
Mercés a l’estofada de la pensada progressista operada peus mèdias màgers (d’un biaish “doç” de’n çò de nosautes, comparat dambe lo metòde potinesc), l’idèia pacifista o antimilitarista a pas mès d’espaci per s’exprimir e es pas pro representat dens l’esperit de las joenas generacions.
 
La guèrra en Ucraïna seré lo bon parat per tornar brembar que las armas son hèitas per atacar e tuar, que, a còps, soldats qu’assasinan civiu hèn pas qu’aubedir aus mandaments d’un superior mercés a una institucion militara que deisha pas lo dret de pensar e vos pòt obligar a complir actes que jutjatz indignes.
 
Atengui doncas d’ausir, au lòc de “crimis de guèrra perpetrats peus Russes”, la frasa “crimis de guèrra perpetrats per l’armada russa”, au mens peu respècte de totis los Russes que son contra aquesta “operacion espaciala” (sic) e los qu’an deishat lo país.
 
 
 
 
abonar los amics de Jornalet
 
 


 



publicitat
BANNER1 - comuna tolosa



Comentaris

17 de mai 09.01h

#1 Lo debat deu pacifisme es entre "armada o pas d'armada" e non pas entre "Potin o OTAN". Aquí comenti çò que's ditez ara dens los mèdias. Se desbremban de díser que s'agís d'armada o de soldats.


Valora aquest comentari:   votar positiu 5   votar negatiu 4
Respondre comentari replica Comentari inadequat   Formulari d'abús de comentari

17 de mai 08.06h

A! es brava lo pacifisme mai lo pacifisme se trompa jamai.
Jamai lo pacifisme analisa la causa prionda de la guerra. L'òm critica aquel qu'agressa mas l'òm vei pas que si Putin s'era laissar far auria acabat coma Kadafi (libia) o Sadam Hussein(Irak). Si Putin avia pas tornat redressat Russia las armadas daus Estats-Unis serian deja a Mosco tot coma per Napoleon e Hitler.
Las armadas daus Estats-Unis se son emparadas de l'OTAN per colonisar Euròpe emben lo consentament daus politics europ... Legir la seguida


Valora aquest comentari:   votar positiu 2   votar negatiu 6
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions