CAPCALERA: IEA-AALO

Jornalet, gaseta occitana d'informacions

Divendres, 30 d'octòbre

Domergue Sumien · Questions de lenga occitana

Diluns, 24.8.2015 03h00

Leis occitans devèm pas defendre lo francés (I)


Comentaris 45 comentaris    
Dolent Fluix Bo Molt bo Fabulós (15 vòtes)
carregant En cargament


La “defensa de la lenga francesa” es un tèma que n’ausissèm parlar pron sovent dins nòstre país, en Occitània, e que quasi totei semblan de lo trobar normau. Totun es una impostura intellectuala e una posicion illegitima, immorala, quand consideram l’interès culturau elementari dei populacions occitanas.
 
La “defensa dau francés” se presenta sota d’aspèctes fòrça variats que, dins una analisi occitana, lei podèm classar en tres dimensions:
 

I. L’illegitimat de la “defensa dau francés” aicí en Occitània
 
II. L’arroganta “defensa dau francés” dins lo Mond
 
III. L’irracionala “defensa dau francés” còntra la corrupcion supausada de son usatge.
 
 
I. L’illegitimat de la “defensa dau francés” aicí en Occitània
 
Se devèm defendre una lenga en Occitània, es ben l’occitan e non pas lo francés.
 
Dins l’interès dei populacions que vivon en Occitània, çò que còmpta es d’aver un accès plen e garentit a la lenga d’aicí, qu’es l’occitan e non lo francés. L’accès liure a nòstra lenga occitana es una condicion indispensabla per garentir un desvolopament uman complet, equilibrat, en acòrdi amb lo liure arbitri collectiu, car la lenga que nos aperten cessariá de nos èsser raubada e esconduda.
 
La “defensa dau francés” a pas la mendre logica culturala aicí quand la lenga autoctòna, l’occitan, es pas manco accessibla.
 
Parlar en Occitània de la “defensa dau francés” es una insulta ai populacions occitanas, se consideram la privacion de la lenga autoctòna que França a impausada. “Defendre lo francés” es una idèa parasita qu’empacha un desvolopament culturau plenament conscient, plenament chausit e autocentrat.
 
Certanei partisans dau chauvinisme francés s’i enganan pas e an ben comprés qu’existís un conflicte entre occitan e francés. An l’audàcia d’afirmar que la promocion dei lengas dichas “regionalas” es un obstacle au francés... çò qu’es verai en absolut, car promòure seriosament l’occitan implicariá efectivament una avançada sociala de l’occitan e una reculada consecutiva dau francés.
 
En mai d’aquò lei francistas an lo fetge de pretendre que cau arrestar la promocion dei lengas dichas “regionalas” per i garentir, a sa plaça, la continuitat de la supremacia dau francés. Aquò es una posicion insultanta, racista e discriminatòria còntra lei populacions occitanas que subisson una privacion de lenga (un exemple tipic e recent d’aquela impostura, entretant, se pòt trobar sus lo blòg de Jean Matouk, un economista ignorant que se fa aubergar per la revista francesa “d’esquèrra” Rue 89).
 
Quauqueis occitanistas, eissorbats per lo discors dominant, contunhan de creire que la defensa de l’occitan seriá compatibla amb la “defensa dau francés” o amb lei manifestacions per la “francofonia” que se fan regularament dins diferentei vila d’Occitània. Pasmens, dins una realitat evidenta que vòlon pas veire, es ben lo francés que risca de tuar l’occitan mejançant un conflicte lingüistic sens pietat, ont lo francés rèsta totjorn l’idiòma pus fòrt, lo pus subvencionat, lo pus sostengut, lo sol oficiau, lo sol obligatòri e lo sol indispensable.
 
La revendicacion d’un “bilingüisme” francés-occitan, de part de certaneis occitanistas, supausa una “defensa dau francés” simultanèa amb la “defensa de l’occitan”. Aqueu “bilingüisme” es donc una posicion irresponsabla, tresanada e intellectualament indefensabla de part deis occitanistas.

Pus generalament, la “defensa dau francés” deuriá passar per una posicion escandalosa ais uelhs dei ciutadans que se senton esclairats o progressistas e que vivon aicí en Occitània.
 
Per o comprene melhor, remandi a aquesteis articles complementaris:

“Per n’acabar amb lo «bilingüisme»”
“L’occitan primiera lenga, amb una dobertura vèrs la diversitat (ni bilingüisme, ni monolingüisme, ni unilingüisme)”
“Botem lo francés a sa plaça”
 



publicitat
BANNER1: IEO Arièja



Perfil

Categorias

Mai d'articles

Archius




Etiquetas

mite   realitat   sumien  

D'autres articles


Jornalet, gaseta occitana d'informacions