Introduccion e clarificacions
 
Dens la darrèra vidèo en data de Te Ve Òc, Florença Faure-Brac que balha las soas recèptas de remèdis contra los diferents maus de las diferentas sasons.
 
Que vau estar hèra critic cap a aquesta vidèo mes que pensi qu’ei necessari. Com vau criticar, que vau totun començar per díser causas positivas: d’un punt de vista tecnic e artistic, aquesta vidèo qu’ei hèra escaduda. Espiar l’invitada copar las soas plantas dens beròis endrets naturaus e har las soas recèptas en tot nos explicar çò qui hè en occitan qu’ei hòrt agradiu.
 
Qu’i aprenem de mei ua recèpta de siròp de paparòc qui a ua color plan beròia e qui èi enveja d’essajar.
 
Que raperi de mei que l’equipa de Te Ve Òc produseish ua vidèo on invitan ua persona tà parlar d’un subjècte en occitan quasi cada setmana, çò qui ei un ritme dur a tiéner, çò qui implica de cercar activament personas a entrevistar e qui rend mauaisit lo fèit de díser “non” a ua persona invitada, o a portar ua espiada critica sus çò qui ditz. Lo men but ací n’ei pas de’m fachar dab Te Ve Òc ni dab la loa invitada e enquèra mensh de criticar l’ensemble deu lor tribalh o ua persona en particular.
 
MES
 
1) lo problèma de las pseudo-sciéncias dens los media
 
Balhar la paraula atau a Florença Faure-Brac suus sons remèdis shens pausar cap question, qu’equivau a la deishar transméter las soas practicas directament. E aqueras practicas que vienen d’un centre de formacion precís e contestable: l’IMDERPLAM (Que vam véder mei luenh qu’aqueth centre prepausa formacions on las pseudo-sciéncias an ua part importanta.)
 
E balhar la paraula dens un media a ua persona formada per l’IMDERPLAM suu subjècte de las plantas medicinalas qu’ei balhà’u la legitimitat d’aqueste media, balhà’u lo pes d’ua causida editoriala.
 
En efèit per hèra de nosauts si un media qui seguim s’interessa a un subhècte, lo subjècte que dèu estar interessant e si l@ jornalista ne contraditz pas la persona qui intervien, qu’ei qu’aquera persona dèu díser vertat. Que son tendéncias naturalas deu noste foncccionament mentau.
 
 
2) Los problèmas dab lo centre de formacion IMDERPLAM
 
“La riguor scientifica e l’exigéncia etica qui gavidan la pedagogia d’IMDERPLAM plaçan los nostes estudiants en situacion de respóner dab competéncia a l’intérès creishent de la societat entà las possibilitats auheridas per las plantas medicinalas e las medecinas doças.”, ce legem suu lor sit. (https://ecole-imderplam.com/notre-ecole/#objectifs)
 
Aquiu que n’i a qui començan de véder lo problèma, non? Dens ua grana majoritat las “medecinas doças”, com l@s lo(a)s promotor(a)s las apèran en França que son practicas a visada terapeutica qui n’an pas aportat la pròva d’ua eficacitat au-delà de l’efèit placebo, de còps maugrat mei d’un sègle de recèrca scientifica d’aquera eficacitat (per l’omeopatia per exemple).
 
L@s partisan(a)s de la racionalitat en medecina qu’emplègan meilèu lo tèrme de “pseudo-medecinas” qu’aqueths de “medecinas doças”, “medecinas alternativas” o “medecinas complementàrias” qui jutjan promocionaus per aqueras practicas e trompaires suu lor contiengut.
 
Associar rigor scientifica e “medecinas doças” dens ua frasa que’m pareish donc falaciós  
Uèra çò qui exigiré la “rigor scientifica” a prepaus de las “medecinas doças” deu men punt de vista.
 
Ne preni pas qu’aqueste exemple tà estar brac mes si vatz suu sit deu centre de formacion, qu’i poderatz constatar de visu que si l’intitulat de cèrtes cors sembla scientific (anatomia, botanica, etc) lo d’autes que renvia shens equivòca a pseudo-medecinas averadas (omeopatia, flors de Bach, gemoterapia, etc.)
 
 
3) Çò qui vedem dens la vidèo e suu sit de l’invitada
 
N’èi pas hèit recèrcas seriosas sus cada produit qui Florença Faure-Brac promòu dens la vidèo de Te Ve Òc. Que volerí qu’aqueste article pareishosse pendent que la vidèo ei enquèra en purmèra paja de Jornalet, donc que hèi lèu. (N’esitetz pas a perlongar las recèrcas dens los comentaris!). Après ua recèrca corta, las tisanas de tem tà har passar ua enrauquèra que poderén ajudar, la loa eficacitat qu’ei estada amuishada.
 
https://www.karger.com/Article/Abstract/442111
 
L’eficacitat deu siròp de paparòc que m’a semblat enquèra pauc estudiada… e peu moment qu’ei tot çò qui èi cercat a verificar.
 
Que’s pòt que tot o partida de las causas qui prepausa aja ua eficacitat desmostrada superiora a l’efèit placebo.
 
Tà jo lo problèma n’ei pas ací.
 
Lo problèma qui vèi qu’ei meilèu que la vidèo pòt servir de clip promocionau a l’invitada per la soa activitat:
   
Aqueste darrèr punt qu’ei ambivalent: d’un costat los sits qu’explican plan d’on tien lo son corpus teoric e las soas practicas, donc que serveishen de sorsas a la vidèo, çò qui’m sembla un esfòrç de transparéncia laudable.
 
Mes d’un aute costat, personas chic informadas sus las pròvas en medecina o la problematica de las pseudo-medecina que la poderàn préner per ua terapeuta e contactar dens aqueste but.
 
Justament, evoquem bracament los sons sits:
 
Purmèr que’u cau reconéisher l’aunestetat d’i precisar que n’ei pas ni medecin ni farmaciana ni psicològa e que ne pren pas en carga las patologias grèvas.
 
https://meristemeblog.wordpress.com/sante/
 
Mes drin mei luenh, quand descriu quin se passan las soas presas en carga, qu’indica qu’ “entaus cas aguts, ponctuaus, ua sola consultacion que pòt estar pro.”
 
Quau ei la diferéncia entre un “cas agut” (un cas agut de qué?) e ua patologia grèva? Que soi drin perdut.
 
Çò qui ne hè pas nat dobte per contra qu’ei la natura pseudo-scientifica de la soa formacion ”en fitoterapia, aromaterapia, omeopatia e flors deu Dr Bach, iniciada au diagnostic en Medecina Chinesa”... Quina!
 
E quand legem la bibliografia deu son sit qu’i trobam enter autas causas (e au miei d’obratge qui semblan rebàter l’estat de la sciéncia actuala tanben, b’ac cau reconéisher)
       
...Carton plen!
 
 
Conclusion
 
Lo but d’aqueste article n’ei pas de discreditar Te Ve Òc en tant que media occitan, que consideri que hèn un hèra bon tribalh dens l’ensemble e que soi conscient qu’ei hèra mei facile de criticar com hèi ací que de har ua vidèo en occitan cada setmana com hèn.
 
Lo men but ací n’ei pas tanpòc de convéncer Florença Faure-Brac d’arrestar la soa activitat para-medicala qui’m sembla basada sus un corpus de teorias pseudo-scientificas: quand avem investit tres ans de la nosta vita e a puish près 3 000€ dens ua formacion e que’n hèm la nosta activitat professionala après, n’ei pas un praube article d’opinion qui’ns va har cambiar d’avís.
 
Enfin lo men but n’ei sustot pas d’afirmar que nada de las personas implicadas a avut l’intencion d’enganar.
 
Qu’ei probable que ne sia pas lo cas: hèra de monde inteligents e diplomats que promòven hèra de causas non-provadas, provadas faussas, o provadas dangerosas de faiçon tot a fèit sincèra.
 
Lo men but qu’èra meilèu d’explicar au monde qui espiaràn o an espiat la vidèo perqué lo men detector de “fakemed[1]“ s’aluca quand l’espii e perqué ei utile tà cadun de’s hargar un detector de fakemed e de l’actualisar de temps en quant[2].
 
Per’mor l’idea que “s’ei naturau, ne pòt pas har mau” (a la quau aderèi jo tanben ua longa partida de la mea vita) qu’ei de mei en mei seriosament invalidada, enter autes per un estudi recent qui amuisha personas qui an utilisat medecinas “complementàrias” en mei deu lor tractament contra cèrtes cancèrs an avut un taus de subrevida au lor cancèr significativament inferior, “un fenomèn qui, segon los autors, se pòt explicar peu refús deus pacients de préner au mensh un deus tractaments convencionaus prepausats.”
 
En efèit l’idea que la medecina convencionala hè mei de mau que de ben qu’ei sovent presenta dens los discors pseudo-medicaus e, coplada a ua suber-estimacion deus efèits curatius de las pseudo-medecinas prepausadas, aqueste mes.hidèr que pòt miar a retards de suenhs o a refús de suenhs qui pòden, dens los cas mei extrèms, costar la vita a la persona “suenhada”.
 
N’acusi pas Florença Faure-Brac d’aver aqueste darrèr travèrs mes qu’ei totun ua realitat de mei en mei documentada, que sia dens las declaracions de pseudò-terapeutes o dens instruccions de tribunaus.
 
Mercés d’aver acabat aqueste article longàs, los comentaris que son planvienguts si respèctan las règlas basicas de cortesia.
 
Prenetz suenh de vos!