Dimenge, 5.3.2023 03h00
Qu’ei la question qui pausa lo magazine Historia sus la cobèrta deu son darrèr numerò de març de 2023.
En efèit, despuish las annadas 1990, la recèrca suu subjècte que s’ei separada en duas brancas: ua qui considèra que cau tornar interpretar las honts de faiçon radicala shens forçadament préner per vertat tot çò qui disen los documents de l’epòca (e qui vienen mei que mei de sorsas ligadas a la glèisa catolica) e ua auta qui evolua tanben e qui descobreish causas navas tanben mes shens renegar las interpretacions hèitas peus istorians scientifics deu sègle XX.
Si las duas escòlas s’acòrdan tà díser que i a avut monde qualificats d’eretics, persecutats, tuats e bruslats devath aqueth pretèxte abans, pendent e après la crosada deus Albigés, los lors punts de desacòrd que pòrtan sus la constitucion en «contra-glèisa» dissidenta d’aqueth monde:
Peu corrent «deconstruccionista[1]»:
— Las sorsas eclesiasticas que son a tractar dab suspicion per’mor que son redigidas peus quites opressors dab un punt de vista particular dont sabem que n’ei pas tostemps estat fidèu a la realitat dens autes contèxtes
— Lo concile eretic de Sent Felix de Lauragués qu’ei probablament ua invencion d’erudits catolics sègle XVII
— E los tèxtes medievaus deus dissidents que son tròp chic numerós e tròp dissemblables tà que’us poscam considerar com un ensemble.
Ne podem donc pas parlar d’ua glèisa dissidenta en Occitània deu sègle XI au sègle XIV... E enquèra mensh l’aperar «catara» puish qu’aqueth mot ne s’empleguè quasi pas tà parlar deus crestians dissidents d’Òc.
Peu corrent «tradicionalista
[2]» en revenja:
— Las sorsas sus-citadas que’ns balhan ua vision coerenta d’un corrent crestian medievau alternatiu au catolicisme e qu’ei desrasonable d’anar tant luenh dens la loa critica
— La carta de Sent Felix de Lauragués que conta probablament un eveniment reau ja que n’ajam pas accès au manuscriut originau
E tot aquò qu’amuisha que i avè ua glèisa dissidenta organisada e ierarquisada en Occitània entre lo sègle XI e lo sègle XIV.
Que revendican tanben de continuar de l’aperar «catara» sia per comoditat sia en argumentant qu’aqueth qualificatiu s’empleguè (ja que rarament) tà qualificar eretic.a.s d’Occitània.
En obrint las soas pajas a istorian.a.s especialistas deu subjècte, lo magazine Historia d’aqueste mes que’ns liura un resumit accessible, ric e rigorós de l’estat de las recèrcas actualas suu subjècte e de las rasons deus desacòrds entre aquestes dus corrents qui, ailàs, comunican chic.
Que podem constatar que, si lo cap-redactor revendica ua pausicion neutra dens lo son editoriau, mei de pajas que son conscradas a autor.a.s de l’equipa deu «non» qu’a autor.a.s de l’equipa de l’«òc», çò qui a dejà valut arcasts au magazine... mes que podem tanben jos-linhar qu’ei lo purmèr còp qu’un magazine destinat au gran public hè coabitar aquestas duas escòlas istoricas entà vulgarisar aqueste debat qui pertòca l’istòria deu noste país.
Mencion especiala peu darrèr article consacrat aus episòdis deu magazine televisat La Caméra Explore le Temps (La camerà qu’explòra lo temps) suus catars e qui conta lo contèxte politic dens loquau estón preparats e recevuts e l’impact qui avón suu sentiment nacionau deus Occitans deu Lengadòc de l’epòca.
Ací
quauques extrèits lejuts e revirats en occitan.
[1]Que son mei que mei los lors detractors qui’us apèran atau. Qu’utilisi l’aperacion per comoditat.
[2]Que’us aperi atau per comoditat: cadua de las «escòlas» que’s qualifica en fèit d’«istòria» e que parla chic publicament de l’auta.
Comentaris
9 de març 15.43h
#11 Vòs continuar la discutida o n'as pro?
Valora aquest comentari:
0
0
9 de març 14.17h
— Per aver lejut lo libe "Hérétiques" de Robert I Moore, lo numerò d'Historia dont parla l'article e la mustra "Les Cathares, une Idée Reçue", ne partatgi pas aquesta analisi. Sus qué la basas ?
— Non ten pas compte, aqueste òme, totas las donadas textualas, mas sonque de las que semblan li donar rason. Trivelonee e Julien Théry. Es çò que se revèla dins "Inventer l'hérésie ?" dirigit per M. Zerner. A moment donat, de fadesas, n'ai pro legit qu'ai quicòm mai a a saborar dins... Legir la seguida
Valora aquest comentari:
0
0
9 de març 14.17h
— Per aver lejut lo libe "Hérétiques" de Robert I Moore, lo numerò d'Historia dont parla l'article e la mustra "Les Cathares, une Idée Reçue", ne partatgi pas aquesta analisi. Sus qué la basas ?
— Non ten pas compte, aqueste òme, totas las donadas textualas, mas sonque de las que semblan li donar rason. Trivelonee e Julien Théry. Es çò que se revèla dins "Inventer l'hérésie ?" dirigit per M. Zerner. A moment donat, de fadesas, n'ai pro legit qu'ai quicòm mai a a saborar dins... Legir la seguida
Valora aquest comentari:
0
0
9 de març 08.25h
#9 Que dises : "Non s'agís pas de critica, mas d'ipercritica. Causisson un "raconte" qu'imagina, retenon cada menut detalh de tot çò que confirmariá aqueste raconte, puèi nega los faits revelats per totes los autres faits atestats qu'invalidarián lo "raconte imaginari"."
Per aver lejut lo libe "Hérétiques" de Robert I Moore, lo numerò d'Historia dont parla l'article e la mustra "Les Cathares, une Idée Reçue", ne partatgi pas aquesta analisi. Sus qué la basas? Ei çò qui ditz Anne... Legir la seguida
Valora aquest comentari:
0
0
8 de març 14.55h
#8 Non s'agís pas de critica, mas d'ipercritica. Causisson un "raconte" qu'imagina, retenon cada menut detalh de tot çò que confirmariá aqueste raconte, puèi nega los faits revelats per totes los autres faits atestats qu'invalidarián lo "raconte imaginari". En Biologia, m'avián ensenhat qu'un tal procediment de la pensada en tèrme de recèrca, se ditz "teleologia", e es fondamentalament, es a dire scientificament non solament falsa, mas desonèsta.
Parcticar lo "negacionisme", dins moj... Legir la seguida
Valora aquest comentari:
0
0
8 de març 12.29h
#7 Ès segur que vòs continuar de parlar de "negacionistas"?
Díser que i a avut persecucions per rasons religiosas au sègle XIII mes que cèrtes documents qui'n parlan son a espiar d'un biais mei critic, ei parièr per tu que de díser que n'i a pas avut de genocidi en Euròpa au sègle XX?
Valora aquest comentari:
0
0
7 de març 23.57h
#5 Una "glèisa" es una "ekklesia", als sens grèc, valent a dire un recampament organizat, de crestians dins aqueste cas. Res non obliga un tal recampament a aver o non una ierarquia, per definicion.
Totun, los evescats catars foguèron dirigits per d'evèsques, coma los testimònis qu'aquel temps n'atèstan. I aguèt d'evescats "catars", atestats pels documents istorics, qué que ne vòlgan nos far creire los "negacionistas", es a dire los que denegan que i aja agut una glèisa "catara". So... Legir la seguida
Valora aquest comentari:
0
0
6 de març 12.46h
Me soi enganat de mot, s'agís deu "revisionisme" qu'èra una branca deu sionisme. Sabi qu'i a teoricament una diferéncia entre los dus mots "revisionisme" e "negacionisme", mes popularament son emplegats dambe la medisha significacion.
Suu sionisme revisionista :
https://fr.wikipedia.org/wiki/Sionisme_r%C3%A9visionniste
Valora aquest comentari:
1
0
6 de març 12.43h
#4 Utilizar lo mot "negacionista" es fòrça costumièr dens aquesta mena de debat sus l'istòria, ara vòu díser simplament qu'aqueste qu'escriu es pas d'acòrdi, es un biaish de criticar. Mes lo mot "negacionisme " es estat emplegat dens l'istòria a d'autes moments, quitament se'm bremba plan per una branca deu sionisme plan abans la Shoah.
Après, pensi qu'efectivament benlèu qu'i a pas agut de "glèisa" catara dens lo sens on i a pas agut de ierarquia catara, au contra de la glèisa cato... Legir la seguida
Valora aquest comentari:
2
0
5 de març 12.56h
#2 A, per contra, si vòs un conselh, atencion dab lo mot "negacionista" qui a un sens precís e qui pòt estar pres com difamacion per istorians.
Qu'as lo dret de pensar que cèrta-e-s istorian.a.s an tòrt e d'auta.e.s rason mes compara'us publicament a Robert Faurisson e a la soa banda que pòt constituir un delicte.
Valora aquest comentari:
3
1
Comenta
Lo comentari es estat mandat corrèctament
13 comentaris
(5 vòtes)
En cargament
13 comentaris
Mandar
