CAPÇALERA: OPLO Licèu
CAPÇALERA2: IEA-AALO

Jornalet, gaseta occitana d'informacions

Dimenge, 5 de decembre

Lo Pimflòid

Dijòus, 14.10.2021 07h30

Reaccions a la vidèo Tè Vé Òc: Un remèdi per sason ambé Florença Faure Brac


Comentaris 17 comentaris    
Dolent Fluix Bo Molt bo Fabulós (9 vòtes)
carregant En cargament





Introduccion e clarificacions
 
Dens la darrèra vidèo en data de Te Ve Òc, Florença Faure-Brac que balha las soas recèptas de remèdis contra los diferents maus de las diferentas sasons.
 
Que vau estar hèra critic cap a aquesta vidèo mes que pensi qu’ei necessari. Com vau criticar, que vau totun començar per díser causas positivas: d’un punt de vista tecnic e artistic, aquesta vidèo qu’ei hèra escaduda. Espiar l’invitada copar las soas plantas dens beròis endrets naturaus e har las soas recèptas en tot nos explicar çò qui hè en occitan qu’ei hòrt agradiu.
 
Qu’i aprenem de mei ua recèpta de siròp de paparòc qui a ua color plan beròia e qui èi enveja d’essajar.
 
Que raperi de mei que l’equipa de Te Ve Òc produseish ua vidèo on invitan ua persona tà parlar d’un subjècte en occitan quasi cada setmana, çò qui ei un ritme dur a tiéner, çò qui implica de cercar activament personas a entrevistar e qui rend mauaisit lo fèit de díser “non” a ua persona invitada, o a portar ua espiada critica sus çò qui ditz. Lo men but ací n’ei pas de’m fachar dab Te Ve Òc ni dab la loa invitada e enquèra mensh de criticar l’ensemble deu lor tribalh o ua persona en particular.
 
MES
 
1) lo problèma de las pseudo-sciéncias dens los media
 
Balhar la paraula atau a Florença Faure-Brac suus sons remèdis shens pausar cap question, qu’equivau a la deishar transméter las soas practicas directament. E aqueras practicas que vienen d’un centre de formacion precís e contestable: l’IMDERPLAM (Que vam véder mei luenh qu’aqueth centre prepausa formacions on las pseudo-sciéncias an ua part importanta.)
 
E balhar la paraula dens un media a ua persona formada per l’IMDERPLAM suu subjècte de las plantas medicinalas qu’ei balhà’u la legitimitat d’aqueste media, balhà’u lo pes d’ua causida editoriala.
 
En efèit per hèra de nosauts si un media qui seguim s’interessa a un subhècte, lo subjècte que dèu estar interessant e si l@ jornalista ne contraditz pas la persona qui intervien, qu’ei qu’aquera persona dèu díser vertat. Que son tendéncias naturalas deu noste foncccionament mentau.
 
 
2) Los problèmas dab lo centre de formacion IMDERPLAM
 
“La riguor scientifica e l’exigéncia etica qui gavidan la pedagogia d’IMDERPLAM plaçan los nostes estudiants en situacion de respóner dab competéncia a l’intérès creishent de la societat entà las possibilitats auheridas per las plantas medicinalas e las medecinas doças.”, ce legem suu lor sit. (https://ecole-imderplam.com/notre-ecole/#objectifs)
 
Aquiu que n’i a qui començan de véder lo problèma, non? Dens ua grana majoritat las “medecinas doças”, com l@s lo(a)s promotor(a)s las apèran en França que son practicas a visada terapeutica qui n’an pas aportat la pròva d’ua eficacitat au-delà de l’efèit placebo, de còps maugrat mei d’un sègle de recèrca scientifica d’aquera eficacitat (per l’omeopatia per exemple).
 
L@s partisan(a)s de la racionalitat en medecina qu’emplègan meilèu lo tèrme de “pseudo-medecinas” qu’aqueths de “medecinas doças”, “medecinas alternativas” o “medecinas complementàrias” qui jutjan promocionaus per aqueras practicas e trompaires suu lor contiengut.
 
Associar rigor scientifica e “medecinas doças” dens ua frasa que’m pareish donc falaciós

 
— si ne citam pas los numerós estudis scientifics qui invalidan l’ipotèsi d’ua eficacitat pròpia de l’omeopatia e de cèrtas autas practicas plan estudiadas (quand las causas son estadas testadas e que n’an pas amuishat d’eficatitat, si volem rigor scientifica, b’ac cau díser!)
 
— si ne raperam pas tanben que hèra de practicas mentavudas atau ne son pas enquèra estadas pro testadas scientificament tà que poscam evaluar seriosament la probabilitat d’ua eficacitat loa
 
— e si ne raperam pas, enfin, que los fondaments teorics d’aquestas practicas (aromaterapia, flors de Bach, medecina antroposofica, medecina “tradicionala” chinesa, etc) vienen sia d’ideologias magico-religiosas sia d’ipotèsis qui podèn estar consideradas com scientificas… a l’Edat Miejana o au sègle XVIII! (e que las comaunautats scientificas an abandonadas despuish ença.)
 
Uèra çò qui exigiré la “rigor scientifica” a prepaus de las “medecinas doças” deu men punt de vista.
 
Ne preni pas qu’aqueste exemple tà estar brac mes si vatz suu sit deu centre de formacion, qu’i poderatz constatar de visu que si l’intitulat de cèrtes cors sembla scientific (anatomia, botanica, etc) lo d’autes que renvia shens equivòca a pseudo-medecinas averadas (omeopatia, flors de Bach, gemoterapia, etc.)
 
 
3) Çò qui vedem dens la vidèo e suu sit de l’invitada
 
N’èi pas hèit recèrcas seriosas sus cada produit qui Florença Faure-Brac promòu dens la vidèo de Te Ve Òc. Que volerí qu’aqueste article pareishosse pendent que la vidèo ei enquèra en purmèra paja de Jornalet, donc que hèi lèu. (N’esitetz pas a perlongar las recèrcas dens los comentaris!). Après ua recèrca corta, las tisanas de tem tà har passar ua enrauquèra que poderén ajudar, la loa eficacitat qu’ei estada amuishada.
 
https://www.karger.com/Article/Abstract/442111
 
L’eficacitat deu siròp de paparòc que m’a semblat enquèra pauc estudiada… e peu moment qu’ei tot çò qui èi cercat a verificar.
 
Que’s pòt que tot o partida de las causas qui prepausa aja ua eficacitat desmostrada superiora a l’efèit placebo.
 
Tà jo lo problèma n’ei pas ací.
 
Lo problèma qui vèi qu’ei meilèu que la vidèo pòt servir de clip promocionau a l’invitada per la soa activitat:
 
— ua votz off que la presenta com “botanista”, ua apelacion qui hè “seriós” mes qui’m sembla injustificada: ua botanista qu’ei meilèu ua persona qui estudia scientificament las plantas qu’ua persona qui las utilisa entà suenhar
 
— las personas qui filman ne pausan pas nada question en n’apòrtan pas nada contradiccion au son discors, çò qui i apòrta ua validacion implicita
 
— en descripcion la purmèra causa qui trobam que son los sons sits professionaus.
 
Aqueste darrèr punt qu’ei ambivalent: d’un costat los sits qu’explican plan d’on tien lo son corpus teoric e las soas practicas, donc que serveishen de sorsas a la vidèo, çò qui’m sembla un esfòrç de transparéncia laudable.
 
Mes d’un aute costat, personas chic informadas sus las pròvas en medecina o la problematica de las pseudo-medecina que la poderàn préner per ua terapeuta e contactar dens aqueste but.
 
Justament, evoquem bracament los sons sits:
 
Purmèr que’u cau reconéisher l’aunestetat d’i precisar que n’ei pas ni medecin ni farmaciana ni psicològa e que ne pren pas en carga las patologias grèvas.
 
https://meristemeblog.wordpress.com/sante/
 
Mes drin mei luenh, quand descriu quin se passan las soas presas en carga, qu’indica qu’ “entaus cas aguts, ponctuaus, ua sola consultacion que pòt estar pro.”
 
Quau ei la diferéncia entre un “cas agut” (un cas agut de qué?) e ua patologia grèva? Que soi drin perdut.
 
Çò qui ne hè pas nat dobte per contra qu’ei la natura pseudo-scientifica de la soa formacion ”en fitoterapia, aromaterapia, omeopatia e flors deu Dr Bach, iniciada au diagnostic en Medecina Chinesa”... Quina!
 
E quand legem la bibliografia deu son sit qu’i trobam enter autas causas (e au miei d’obratge qui semblan rebàter l’estat de la sciéncia actuala tanben, b’ac cau reconéisher)
 
— Hlidegarde de Bingen, ua monja de l’Edat Miejana sovent citada peus naturopats
 
 
— Jean-Marie Pelt, un autor pròche de la societat antroposofica, https://fr.wikipedia.org/wiki/Jean-Marie_Pelt
 
— obratges sus la gemoterapia, l’aromaterapia, la medecina tradicionala chinesa... Hèra de practicas largament reconeishudas com pseudo-scientificas.
 
— Dominique Gillet, fondator de kokopelli e defensor de tèsis complotistas sus la medecina scientifica (enter autas causas – HÈRA d’autas causas!) https://soundcloud.com/radio-pais/pensada-critica-n-com-new-age?in=radio-pais/sets/pensada-critica
 
...Carton plen!
 
 
Conclusion
 
Lo but d’aqueste article n’ei pas de discreditar Te Ve Òc en tant que media occitan, que consideri que hèn un hèra bon tribalh dens l’ensemble e que soi conscient qu’ei hèra mei facile de criticar com hèi ací que de har ua vidèo en occitan cada setmana com hèn.
 
Lo men but ací n’ei pas tanpòc de convéncer Florença Faure-Brac d’arrestar la soa activitat para-medicala qui’m sembla basada sus un corpus de teorias pseudo-scientificas: quand avem investit tres ans de la nosta vita e a puish près 3 000€ dens ua formacion e que’n hèm la nosta activitat professionala après, n’ei pas un praube article d’opinion qui’ns va har cambiar d’avís.
 
Enfin lo men but n’ei sustot pas d’afirmar que nada de las personas implicadas a avut l’intencion d’enganar.
 
Qu’ei probable que ne sia pas lo cas: hèra de monde inteligents e diplomats que promòven hèra de causas non-provadas, provadas faussas, o provadas dangerosas de faiçon tot a fèit sincèra.
 
Lo men but qu’èra meilèu d’explicar au monde qui espiaràn o an espiat la vidèo perqué lo men detector de “fakemed[1]“ s’aluca quand l’espii e perqué ei utile tà cadun de’s hargar un detector de fakemed e de l’actualisar de temps en quant[2].
 
Per’mor l’idea que “s’ei naturau, ne pòt pas har mau” (a la quau aderèi jo tanben ua longa partida de la mea vita) qu’ei de mei en mei seriosament invalidada, enter autes per un estudi recent qui amuisha personas qui an utilisat medecinas “complementàrias” en mei deu lor tractament contra cèrtes cancèrs an avut un taus de subrevida au lor cancèr significativament inferior, “un fenomèn qui, segon los autors, se pòt explicar peu refús deus pacients de préner au mensh un deus tractaments convencionaus prepausats.”
 
En efèit l’idea que la medecina convencionala hè mei de mau que de ben qu’ei sovent presenta dens los discors pseudo-medicaus e, coplada a ua suber-estimacion deus efèits curatius de las pseudo-medecinas prepausadas, aqueste mes.hidèr que pòt miar a retards de suenhs o a refús de suenhs qui pòden, dens los cas mei extrèms, costar la vita a la persona “suenhada”.
 
N’acusi pas Florença Faure-Brac d’aver aqueste darrèr travèrs mes qu’ei totun ua realitat de mei en mei documentada, que sia dens las declaracions de pseudò-terapeutes o dens instruccions de tribunaus.
 
Mercés d’aver acabat aqueste article longàs, los comentaris que son planvienguts si respèctan las règlas basicas de cortesia.
 
Prenetz suenh de vos!
 
 
 
[1]Literalament faussas medecinas; aute tèrme epmpegat per medecins tà parlar de las pseudo-medecinas.
[2]Qu’ei ua metafòra, e! N’ei pas un detector vertadèr qui podem manipular dab las mans, meilèu un ensemble de reflèxes qui avem dens lo cap.




abonar los amics de Jornalet

 

 



publicitat
BANER2: OPLO liceu



Comentaris

18 d'octòbre 14.48h

#16 Hé hé! Vertat que hè ben ua discutida suu jornalet shens aver tròls d'un bòrd o de l'aute ;-)


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

18 d'octòbre 13.15h

15# Mercès per l'escambi .Es pas totjorn asiat sus aquelas paginas...
Non , coneissi pas la Dòna Faure-Brac personalament . Pasmens i a pas gaire de mond que trabalha encara ambe la lengua nòstra , es particularament pivelant quora se tracta de plantas mediteraneas sabent que per aiçi demoran fòrças plantas qu'an pas qu'un nom lati e un autre occitan( saladas salvages per la magèr part d'ellas). Mas saique me diratz que las cal pas manjar perdeque son pas estadas analisadas per un labor... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

18 d'octòbre 12.22h

#14 Mercés per las referéncias : qu'anarèi espiar :-)
Arrés ne ditz pas que n'i a pas de problèmas dens la medecina scientifica e arrés ne ditz pas tanpòc que n'i a pas recèrcas a har sus las practicas medicalas de diferents país.
Los dus problèma que son qu'arrés ne's defineish pas com "faus mètge new age" : "passaire/a d'un saber tradicionau injaustament inhorat" qu'ei ua etiqueta hèra mei valorisant per la persona qui practica e per las personas qui la segueishen... e justamen... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 21.17h

Ço que ensagi de dire e que cresi qu'illustra plan aquèl article es que i a un saber popular pas totjorn verificat que serià pecat de perdre. Soi d' a fons d'accordi ambe vos quora denonciatz los falses metges e breishes "new age" que fan creire al paure monde a de potingas farlabicadas mas i a agudas de messorgas sortidas de laboratoris tanbe , (la thalidomine?, lo sang contaminat?)
Se vos interessa , i a un libre publicat per Vigot: manuel pratique de phytotérapie ISBN 2-7114-1641-0 que b... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 16.58h

#12 Mercés!


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 13.50h

Ligam: Jornalet dijòus29 de julhet2021: los espicultors de daufinat se mobilizan.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 09.09h

#10 Ne soi pas au corrent deus dus ahars qui citatz, desolat! Si voletz continuar la conversacion sus aquò, e poderetz enviar ligams cap aus articles qui citatz svp? Ne'us tròbi pas quand hèi recèrcas...

La vòsta question qu'ei complicada.
Que pensi seriosament qu'en mestior de santat que i a metòdes qui visan a detectar l'eficacitat de las accions qui hèm entà guarir patologias e qu'abans d'afirmar qu'ua accion ei eficaça que la cau testar dab aquestes metòdes, sinon que riscam de h... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 07.36h

7 # mercesplan per me respondre. Per ço que es del IMDERPLAM Avià pas tot gaitat sus lo site internet.
Ara pensatz seriosament que tot deurià passar per de laboratoris ?
Fa pauc de temps publiquèt Jornalet un article fòrça interessant sus la lavanda provençala e los laboratoris . rememoriam tanben l'enebiçion dau pissolier de falguièra ....


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 06.41h

#8 Mercés :-)


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

15 d'octòbre 00.01h

Felicitacions pr'aqueste artigle !


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Lo Pimflòid

Lo Pimflòid logo rss

Pensada Critica, qu’es aquò?

mai d'informacions

contactar l'autor

Las mai...

Mai d'articles

Archius




D'autres articles


Jornalet, gaseta occitana d'informacions