Bandièra01 1180x150: Comuna de Tolosa

Opinion

Facebook es pas en occitan e es melhor aital

Lo Quentin

Lo Quentin

Apassionat de lengas, ai començat a recuperar la lenga en 2011 e dempuèi ensagi d’obrar per l’occitan coma pòdi.

Mai d’informacions
Creèt Mark Zuckerberg lo site Internet Facebook en 2004 quand èra estudiant a Harward. Son idèa èra d’aver un site ont òm podiá votar per las estudiantas mai polidas sonque amb lor fotografia de l’annuari de l’universitat. Es amb aquela basa que se creèt lo malhum social que coneissètz segurament.
 
Unes considèran qu’ara es pas mai un malhum social mas un espaci de publicitats cibladas. Los vendeires de reclamas pòdon ciblar lor difusion segon un fum de criteris – sèxe, atge, lòc, religion, sexualitat, l’etnicitat, tipe d’ostal, salari, ... - per aténher lor public.
 
Seriá nèci de pensar que vendon lor espaci publicitari pas qu’als mercadièrs. Los partits politics e govèrns utilizan Facebook per comunicar.
 
Lo documentari The Great Hack o explica ben, cossí l’entrepresa Cambridge Analytica creèt una basa de donadas de perfils psicologics per influenciar lo compòrtament dels cuitadans nomenats “indecisses”. Cambridge Analytica aspira las donadas Facebook de los utilizaires, çò que li permet de declarar que ten mai de 5 000 ponches de donadas tocant cada elector estatunitenc.
 
Facebook venguèt lo laboratòri de psicologia mai grand del monde. Menèt una experiéncia en mostrant pas que de contengut trist a unes utilizaires e remarquèron que lors publicacions venguèron tristas en seguida. Perque o sabètz ben, l’afichatge del contengut del flux es pas cronologic mas elaborat per un algortime que pas qu’eles sabon çò que fabrica. Ara imaginatz çò que pòt demandar un governament o un grop de pression (lobby en anglés sembla mai acceptable, non?).
 
Son public e sas donadas son lo tresaur a Facebook, e per lo gardar utiliza las tecnicas per far venir son audiéncia dependenta. La cadena ARTE publiquèt unas vidèos al subjècte de la dopamina, aquí lo subjècte de la dopamina e Facebook.
 

 
Facebook vos ocupa lo cap amb de contengut previst per contrarotlar vòstre compòrtament.
 
Ara la lenga occitan.
 
Aquela entrepresa estatunitenca que realiza d’optimizacion fiscala, polit eufonisme del lengatge dels politicaires, prepausa son interfàcia en mantunas lengas. L’objectiu es d’espandir l’audiéncia e de garniar sas basas de donadas. Recòrd que Facebook vos crèa un perfil dich fantauma s’avètz pas de compte, tot aquò amb l’ajuda dels botons Facebook qu’òm tròba pertot sul Web e que permeton lo seguiment d’un vesitaire e doncas la determinacion de sos gostes e tendéncias.
 
Per traduire l’interfàcia de Facebook cal montar una pichona còla de traductors benevòls e amb un sistèma de revision las cadenas de tèxtes acaban a l’ecran dels utilizaires pistats. Lo monde realiza la traduccion gratuitament per Facebook mentre qu’acabèt l’annada 2018 amb un chifra d’afar de 55,8 milions de dolar estatunitenc. O tòrni dire, una entrepresa que paga pas plenament sos impòstes amai.
 
Las traduccions son pas liuras e pòdon pas servir a d’autres logicials o aplicacions. Facebook o pòt decidir de tot, coma levar la lenga traducha sens cap de justificacion.
 
Per totas aquelas rasons, vòli pas participar a la traduccion de Facebook. I a d’autres malhums socials liures que son en occitan: diaspora*, Mastodon, Pleroma.
 
Me fa plaser traduire de logicials libres perque sabi que mas traduccions pòdon servir a d’autres causas, coma la creacion de Memòria de Traduccion o simplament èsser archivadas pel futur.
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

jp la rapieta
4.

#2

Me songe que lu bilhet dich mai de chausas que « fau pas utilisar ».
Eu parla de la libertat de la donada, dau trabalh de far mas qu’eu pòt pas estre usar per los autres, de la monada facha per l’entrepresa dau temps que d’autres son apres trabalhar per res…

  • 1
  • 0
Joan Francés Blanc Estrasborg
3.

#2 facebook es pas la modernitat. Es pas mai de mòda, es pels vièlhs, dirián mos enfants (entre 16 e 21 ans). Se nos manca l'interfàcia en occitan, podèm far servir lo catalan, es la meteissa lenga ;)

  • 3
  • 1
Monsur
2.

Donc, au nom de grandas conviccions qu'avètz, pensatz qu'es pas necessari ni mai intelligent de far intrar l'occitan dins la modernitat? L'òm pòu pas aimar Facebook. Pasmens, fau reconéisser qu'es un otís practic e qu'es impossible de far sensa aquò au jorn d'uèi... mai bon... coma totjorn l'occitanista prefèra jogar a l'idealista. Sabem ben que leis autres malhum dont parlatz son pas coneguts a ajudaràn de degun biais la lenga a tocar una pus granda audiéncia.

  • 0
  • 2
jp la rapieta
1.

Nonmà per 'queu bocin de teiste : Lo monde realiza la traduccion gratuitament per Facebook mentre qu’acabèt l’annada 2018 amb un chifra d’afar de 55,8 milions de dolar estatunitenc. O tòrni dire, una entrepresa que paga pas plenament sos impòstes amai.

Marces per lu bilhet.

JPB

  • 8
  • 0

Escriu un comentari sus aqueste article