Dimècres, 6.4.2022 03h00
Avètz segurament ja jogat amb las poliças d’escritura de l’ordenador per embelir vòstres tèxtes. Benlèu ignoratz qu’òm pòt installar de poliças novèlas, o benlèu que sabètz pas que d’unas poliças perseguisson d’objectius coma ofrir una melhora lisibilitat fàcia a la dislexia o ajudar los desvolopaires informatics. En fin d’article vos indicarai las etapas per adobar vòstre repertòri de poliças.
OpenDyslexic
La tòca d’aquesta poliça, font en anglés venant de la matèria fonta/fonda, es d’ajudar los dislexics a legir los tèxtes
La podètz telecargar aquí: https://opendyslexic.org/, podètz indicar que volètz donar 0€ per l’aver a gratís. Me cal apondre que d’unes estudis explican que lo sol fach d’ajustar l’interletratge e interlinhatge ajuda ja fòrça a donar mai de lisibilitat.
Luciole
Aquesta poliças foguèt pensada per ajudar los malvesents, pren en compte un dotzenat de critèris coma l’espaçament, l’estructura de las letras e notadament a las chifras e signes matematicas. Luciole permet d’escriure gaireben totas las lengas europèas. Es un trabalh de 2 ans entre lo centre tecnic regional de la deficiéncia visuala e un estudio tipografic via una borsa de la fondacion suïssa Ceres e lo sisten de l’universitat Lumière Lyon 2. Es jos licéncias Creative Commons Attribution, la podètz utilizar e difusar gratuitament, tanben pels usatges comercials.
De retrobar aquí: https://www.luciole-vision.com/
Fira
Aquesta poliça se destria per sas ligaturas que permeton als desvolopaires de legir lor còdi mai facilament. Una ligatura es una combinason de caractèrs per ne formar un autre. En informatica dins una condicion, per verificar la valor d’una variabla utilizem “=“, e al contrari “!=“. Vos meti en exemple lo meteis escript dins una poliça tradicionala e amb la poliça Fira. Vejatz aquí per mai d’exemple de caractèrs de remplaçament: https://github.com/tonsky/FiraCode
Es licenciada jos los tèrmes de la licéncia SIL Open Font License.
Garamond
Garamond es un grop de poliças creadas pel gravaire parisenc Claude Garamond vèrs 1530. Foguèt especialament creadas per l’impression literària. Malgrat que sián plan agradablas, son pas de bon utilizar a l’ecran. Legir aquí.
Estalviador de tinta
Un darrièr tipe de poliça, las qu’estalvian la tinta o lo toner. L’idèa es de traucar las letras per utilizar mens de tinta. Sens ligam amb lo fromatge, es una entrepresa neerlandesa que prepausa la poliça Ecofonts. Vos convidi a legir una analisa sul sicut aquí: https://mdpi-res.com/d_attachment/sustainability/sustainability-13-04070/article_deploy/sustainability-13-04070-v2.pdf
L’illustracion ven d’aqueste article.
Installacion
Un còp la poliça de vòstra causida telecargada per l’installar dependrà de vòstre sistèma operatiu.
— Amb Windows: vos cal plaçar los fichièrs dins lo dossièr situat a C:WindowsFonts
— Amb un Mac: plaçar los fichièrs dins BibliotècaFont
Per los dos, vos cal reaviar per que lo cambiament siá pres en compte.
— Amb un sistèma Linux, doble clic sul fichièr, la visualizador de poliça se dobrirà, vos cal sonque clicar “Installar”. Cap de reaviada pas necessària.
Comentaris
18 de mai 20.08h
Segons lo Diccionari Ortografic e gramatical de Josiana Ubaud:
*poliça > polícia (fòrças de l'òrdre) | polissa (de caràcters; d'assegurança)
Valora aquest comentari:
1
0
18 de mai 19.41h
*gratís > gratis
'signes matematiCs"
Valora aquest comentari:
1
0
11 de mai 10.50h
Non polissa amb doas S es pels contractes
Valora aquest comentari:
0
0
11 de mai 10.33h
S'escriu polissa amb doas èssas.
Valora aquest comentari:
0
0
11 d'abril 13.35h
@3 es variable.
Òm pòt inclure de poliças personalas dins un PDF per exemple.
Per un site web, via lo fuèlh d'estil òm pòt indicar al navigador ont telecargar la poliça.
Per un texte que demòra dins un format de tractament de tèxte, òc foncionarà pas se lo legeire a pas la poliça.
Valora aquest comentari:
0
0
9 d'abril 20.54h
Se me remembri plan, la polica causida serà pas visible pel legeire se es pas tanben installada sus son ordinator.
Valora aquest comentari:
0
0
6 d'abril 21.24h
Mercés plan per aquelas entressenhas. Utilizi tanben la poliça Andika per facilitar la lectura dels mai joves.
Se pòt descargar aquí : https://www.dafont.com/fr/andika-basic.font
Valora aquest comentari:
6
0
6 d'abril 17.23h
Aquí aprenèm d'informacions ben utilas per chausir lei polissas en foncion dei legeires. Grandmercé.
Valora aquest comentari:
6
0
1
Comenta
Lo comentari es estat mandat corrèctament
8 comentaris
En cargament
8 comentaris
Mandar
