Bandièra01 1180x150: Comuna de Tolosa

Opinion

… e pendent aquel temps…

Lo mond —Euròpa al mens— es destimborlat pel Brexit (Britain exit: sortida de Gran Bretanha de la Comunitat europèa) e aquò nos permet de validar l’idèa que totes los òmes —aicí los Estats— son egals mas que n’i a que son mai egals que non pas d’autres! Basta de veire las reaccions de nòstres “elèits” que son encara mai estomagats per una tala decision britanica. Imaginatz una pauc: “An gausat!”
 
Podèm estar segurs d’una causa: los Britanics —nacion de “botiguièrs” per Napoleon— an pas per costuma de se daissar impausar qué que siá quand s’agís de lors interèsses.
 
Lo pòble britanic a votat per copar los ligams constrenhents amb Euròpa mas compta plan servar los avantatges “menuts” que ne tirava! E se pòt fisar a sos dirigents novèls per aquò far.
 
E coma un malaür arriba pas jamai solet, los Lusitanians an panat la finala de l’Euro 2016 que deviá veire los Franceses venjar l’escòrna facha a lors predecessors e subretot permetre a nòstres responsables, adèptes de la man dins l’esquina e del menton bellicós, d’affichar un sorrire de satisfaccion, mai blanc que blanc…
 
Ailàs! l’extasi es pas estada al rendètz-vos. Los que creson als auguris i an vist un signe premonitòri per l’an que ven; per astre, nòstres dirigents son de personas racionalas que se fisan pas qu’a de causas racionalas coma las corbas e a las chifras e escotan pas la vox populi que, coma cadun o sap, es incapabla de racionalitat!
 
Pendent tot aquel temps, los Estatsunidencs practican los westerns, live! Lo descompte dels mòrts, lo fan los mèdia cada jorn.
 
Autres còps, las causas èran simplas: los cowboys (soldats, policièrs…) tiravan e los Indians, puèi los Negres — excusats los Afroestatsunidencs tombavan devant l’”òrdre establit”.
 
Apasimadas pendent qualques annadas, semblariá que las causas aguèsson pejorat dins lo periòde recent per n’arribar a una situacion critica amb l’assassinat, a Dallas, Texas, de cinc policièrs qu’èran en servici amb lors collègas per velhar una manifestacion.
 
Lo president Obama a pas jamai doblidat qu’èra l’elegit de tota una nacion e, cap a la pujada dels dangièrs, decidiguèt al darrièr moment de cambiar son emplec del temps europèu e d’anar pagar sos respèctes a las victimas d’aquesta violéncia freja e determinada.
 
E lo discors que prononcièt en aquesta escasença demorarà un modèl d’una simplicitat e d’una auçada intellectula formidabla.
 
Nòstres dirigents, quitament a l’escasença dels eveniments òrres que visquèrem en 2015 —Charlie-Hebdo, lo Bataclan— an mes en avant lo fach que França se daissariá pas destrúger per de terroristas mas an pas jamai sabut trobar de mots aital pertocant al còrs dels òmes e de las femnas d’un país nhafrat e destimborlat…

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gèli Grande Lairac en agenés
4.

#3
"empacharàs pas que los Occitans sián contents que França ganhe..."
Los occitans encloscats Òc-ben, mas los autres los que o son pas, sèm pas tenguts de seguir lo tropèl menat al masèl.
Cada còp que França es batuda soi content. O soi encara mai quand dins la còla de França i a d'occitans o quand coma al rugbi de XV o de XIII la còla de França es una còla d'Occitània que ditz pas lo seu nom.
Soi anti imperialista quand la còla de l'estat francés que nos coloniza se prend una rosta o una rostassa consideri qu'es una victòria per nosaus.

  • 0
  • 2
lo repotegaire
3.

rai de l'ondada
empacharàs pas que los Occitans sián contents que França ganhe...
Çò que cal combatre es lo nacionalisme pèc...

  • 3
  • 1
Joan Marc
2.

Soi Portugal.

  • 2
  • 0
Gèli Grande Lairac en agenés
1.

Devèm grandmercejar los portugueses. Gracias a-n-eles, avèm escapat in extremis a una èrsa (vague) d'ultrà nacionalisme francés amb fòrta participacion occitana.

  • 7
  • 2

Escriu un comentari sus aqueste article