Dimenge, 21.8.2016 03h00
Calriá tornar a nòstres amics estatsunidencs mas n’auriam per escriure un libre cada jorn amb las fantasiás tragicas del milionari candidat e benlèu tot autant, mas dins un autre domeni, amb la qu’espèra venir la primièra femna presidenta del país.
Fins al mes de novembre, solide qu’aurem l’escasença de i tornar…
Se ne cresèm los especialistas, las nacions desvolopadas, e tanben las qu’apelavan, i a gaire de temps encara, lo tèrç monde e lo quart monde arriban en fin de ceucle.
De segur, i a los adèptes del complòt que cridan a la desinformacion e que dison que —dins lo desòrdre— lo rescalfament climatic, la corrupcion endemica a totes los nivèus, lo dopatge aquí-ne-vòs-aquí-n’as, lo comèrci de las armas, los enfants-sordats, etc. son pas qu’una faiçon de descoratjar la liure entrepresa e la concurréncia liura, ela tanben, e non faussada…
E avançan, aqueles, l’argument màger del progrès qu’o a tot resolgut fins ara e qu’o resolverà tot dins lo futur pròche e luenhenc…
En cò nòstre, l’eleccion presidenciala es un pauc mai tard mas, tre ara, los òmes providencials se fan conéisser e… qualques femnas!
Auretz remarcat que las femnas son pas nombrosas e que, fins ara, aquestas que, amb rason, vòlon jogar un ròtle màger dins la conducha del país, se compòrtan tròp sovent coma los “mascles”. Supausi que pòdon pas far autrament, lo principi de realitat devent primar suls autres normalament.
Curiós que, après totas las decebudas qu’an conegut dempuèi l’an pèbre, totes, de la drecha a l’esquèrra, espèren la persona providenciala coma lo messia.
Curiós que los mai racionalistas demest los ciutadans i cregan encara al progrès — pres dins lo sens del sègle XIX.
N’i a pas un que prenga la risca d’explicar que seriá bon benlèu de sortir d’aquela carrièra bòrnha.
Sembla n’èsser aital per totes los problèmas del mai ninòi al mai grèu. Nòstres politicians nos assadolan amb de banalitats e sèm pregats de los prene per d’engènis!
Vertat es que lo bruch de la caissa enregistraira a remplaçat la melodia de l’epopèa…
Comentaris
21 d'agost 07.21h
"Nòstres politicians nos assadolan amb de banalitats e sèm pregats de los prene per d’engènis! "
Senti lo mesme e banalitats beleu de cops nosiblas
Valora aquest comentari:
1
0
1
Comenta
Lo comentari es estat mandat corrèctament
Un comentari
(4 vòtes)
En cargament
Un comentari
Mandar
