CAPCALERA: PAIS INVISIBLE
CAPÇALERA2: AMICS DE JORNALET

Jornalet, gaseta occitana d'informacions

Diluns, 6 de febrièr

Lo repotegaire

Dimècres, 14.9.2016 03h00

Seriá pas gente per elas?


Comentaris Un comentari    
Dolent Fluix Bo Molt bo Fabulós (4 vòtes)
carregant En cargament


Lo president de las Filipinas m’agrada! Per un còp, avèm aquí un òme politic que ditz çò que pensa e que o fa.
 
Pendent la campanha electorala, la sola causa qu’a prometuda es de tuar o far tuar totes los jornalistas corromputs, los vendeires de dròga, las prostituïdas e totes los sacamands qu’empachan lo paure pòble de viure en patz.
 
En mai d’aquò, que possedís totas las qualitats qu’una femna aima de trobar en cò d’un òme: la virilitat e los mots per la far valer.
 
Son actitud cap a las femnas es exemplara e se priva pas de far conéisser son opinion. Las que son violadas l’an plan cercat; s’èran estadas vestidas d’una faiçon convenenta, seriá pas arribat! per aquelas que gausan portar lo pet, i a totjorn un jutge per las condamnar a còps de foet en public o quicòm mai.
 
Dins aquel domeni, pòt comptar sus l’ajuda frairala d’un país vesin, Indonesia, de majoritat musulmana el, ont las autoritats escolaras —pas totas ça que la— an plan comprés lo messatge a propaus dels devers de las femnas. La setmana passada, una joventa foguèt renviada de son escòla fàcia a totes los estudiants —a la ceremònia del drapèl— per n’aver ternit l’imatge e la reputacion. Son crimi: d’èsser estada presa per un gang e violada pendent tota una setmana!
 
Seriá temps que las femnas joves o vièlhas se vestiguèsson e se comportèsson d’una manièra digna al luòc de provocar los òmes aital, qué!
 
I a un domeni que mestreja benlèu pas tròp: es lo del vocabulari.
 
Qualque temps a, del temps qu’èra encara lo conse de la capitala, diguèt que lo papa èra un “filh de puta” per çò que sa venguda en las Filipinas provacava d’encombraments dins la capitala. Puèi foguèt lo torn de l’ambassador estatsunidenc. Recentament, acusèt B. Obama d’èsser un “filh de puta” Un pauc repetitiu, non?
 
Deuriá demandar a sos conselhièrs benlèu de li prepausar una autra invectiva o empruntar a las lengas estrangèras: anglés, espanhòl e perque pas… l’occitan.
 
Coneissèm nosautres las variantas: hilh de p…, filh de p…,’fant de p… e degun se’n sap pas mal mentre que, en espanhòl o en anglés, hijo de p…  o son of a b… son pas de causas de dire.
 
Un amic me contèt que, qualques ans a, l’evesque d’Agen (Òut e Garona), Mgr Saint-Gaudens a l’epòca, un occitanista de tria, respondèt a un parroquian que se plangiá de la tenguda d’un concors de juraments en occitan del costat de Vilanuèva d’Òut per li dire naturalament qu’aviá tòrt de sostenir l’occitan: “Mon filh, deuriatz saber que l’occitan es la sola lenga benlèu dins la quala un òme pòt dire «Hilh de puta» dabans sa maire sens qu’aquela siá escandalizada.”
 
Coma o ditz e o torna dire un umorista exagonal que s’ignòra, En Z…: “França manca d’òmes vertadièrs”. Per astre, los Filipins n’an trobat un!



publicitat
BANNER1 - OPLO erasmus



Comentaris

14 de setembre 13.50h

De cronicas d'èime aital, ne vòli cada jorn!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OC Brigada

Perfil

Categorias

Mai d'articles

Archius




D'autres articles


Jornalet, gaseta occitana d'informacions