Bandièra01 1180x150: Comuna de Tolosa

Opinion

Cronicas d’un Sens-Emplec (I) - Battle Royale

Maël Capolino

Maël Capolino

Provençau exilat en Auvèrnhe qu'escriu e parla l'auvernhat. Sens emplec, mas membre de l'IEO63 e dau Partit Occitan

Mai d’informacions
Imaginatz un monde ente per èsser autorizat de manjar, beure, se lojar, contribuar a la societat, e tota quo sens sofrir, viure, vos fau postulat a un concors d’escritura e d’orau en competicion embei d’autre monde que vòlon la mèsma chausa que vos, e tota quo per èsser autorizat de benliau faire quicòm de benliau utile (per le mens pièi) e benliau que fòt la societat dins la merda, paiat una misèria la majoritat dau temps. Si pèrdes au juòc, te fau tornar començar (en esperant trobar quicòm de pas mau) e esperar sobreviure en espeitant. Si ganhas, quo vòl dire qu’un polhon d’autres perdèton e pòdon benliau pas viure de biais.
 
Trobatz quo pas morau? E portant quo-es coma quo que marcha le merchat dau trabalh (per çò qu’evidament, sètz pas un uman, sètz una merchandiá, o au mens una ressorça umana).
 
 
36 personas, 1 emplec. Quau vai ganhar?
 
En junh 2022, postulèi per le promèir còp per un emplec. Quo-èra quicòm dins le monde associatiu, sens necessitat de formacion. z-Ère un pauc confiant, per çò que coneisse ben le monde associatiu clarmontés, z-ai de l’experiença dins le domèni, dau fait de mon implicacion, e de mon servici civic. Bon. Avora fau espeitar. De çò qu’es marcat sobre l’òfra, n-i a un “orau” après.
 
1 mes. Pas de respònsa. Sòne l’associacion. “Desolat, avèm pas enquèra ‘chabar”. Bon... 2 mes. Pas totjorn de respònsa. “Desolat, avèm pas ‘chabat”...

Après 2 mes d’espeitança, un mèl tot solet: Desolat, mas avètz pas l’experiença, bona chança per vòstra cherchada!
 
OK.
 
Pas d’orau, pas d’explicacions, pas ren. Mas “desolat, quo-es pas possible per vos de viure de biais”, après 2 mes d’espeitança.
 
 
Avètz pas l’experiença
 
Adòre ‘questa frasa, per çò que vòl pas ren dire. Quo-es un pauc una excusa per pas dire la veritat qu’es “z-aviá 36 personas que postulèton, fau chausir d’un biais un pauc arbitrare, desolat, perdetètz la lotariá”
 
Per çò que la veritat quo-es que per avèr de l’experiença, fau trabalhar, e per trabalhar, fau avèr de l’experiença. Quo-es pas un juòc de bon ganhar. Quo-es sobretot una istòria de chança, de si arribas d’escriure de bon biais una letra (mèsma si ton trabalh aurà pas gis de rappòrt embei quo), si ton nom e ta fotò z-agradan le DRH... etc.

E puèi de que sabon si as l’experiença? n-I a pas quicòm per verifiar que le monde disàn la veritat sobre lhur CV! E puèi per tot dire, aviái l’experiença per ‘quel emplec. Postulèi pas per quo sens saber, sèi pas completament simple! E pense que quo-es parelh per le monde que postulèton coma iu.
 
 
La benvenguda dins la vida! Bon astre, los juòcs son faits!
 
(Vòle absoludament una parodia d’aquela chançon d’Alidé Sans per le monde dau trabalh)
 
‘Queste article z-es mas una introduction per l’istòria (pas ‘chabada, si avètz quicòm de me prepausar, vòle ben) de mon chamin dins l’òrre, le pas-uman merchat dau trabalh. E aquela istòria, quo-es l’istòria d’un polhon de monde, e benliau e suradament de tu, que me legissa. Ne’n sèi mas le contaire, quo-es contat de mon biais, mas ne’n sèi pas le personatge principau. E tota quo, en occitan evidament, la linga que maitot, tròba pas de trabalh!
 
A l’article que ven, si z-ai pas mai de trabalh, que siáge pas mens!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maël Clarmont
2.

#1 Domatge qu'exista pas de las formacions en respècte. Pense que quo-es mai utile que ne'n pensèm.

  • 4
  • 0
Gaigai
1.

Qu'existeishen formacions en redaccion si voletz, e tanben cors de lenga, s'avetz drin de vagar, profieitatz-ne!

  • 3
  • 8

Escriu un comentari sus aqueste article