CAPÇALERA: WORDLE
CAPÇALERA2: mot amagat

Jornalet, gaseta occitana d'informacions

Diluns, 8 d'agost

Maime Caillon

Dijòus, 7.8.2014 03h00

Quala transicion energetica? (I)


Comentaris 2 comentaris    
Dolent Fluix Bo Molt bo Fabulós (10 vòtes)
carregant En cargament


Lo 30 de julhet passat, Ségolène Royal, la quatrena ministra de l’ecologia dau govern francés dempuei dos ans, presentet en conselh daus ministres son projecte de lei sus la transicion energetica. Quela tematica fasiá partida de la fuelha de rota que se balhet lo govern fin 2012. Qu’es un projecte que se vòu ambiciós perque nos vòu far chaminar “vers un noveu model de societat”. Pertant, nonmàs lo nom me pause problema: “la transicion energetica per la creissença verda”. Lo terme “creissenca” demòra liat a l’aumentacion dau PIB, qu’es pas l’indicator economic lo mai ecologic que siá, e tanben a l’idea faussa de la possibilitat de produsir de mai en mai de richessa sus una planeta pertant finida. Adonc, quau projecte de societat vòu Ségolène Royal? La debuta de sa communicacion au conselh daus ministres zo nos ditz:
 

— luchar contra la desreglament climatic: qu’es’na bona chausa de segur, mai que mai perque París recaubrà la conferéncia sus lo clima en 2015
 
— redusir la factura energetica de França per la transformacion de son model energetic: adonc, nos fau veire comacombatre lo chaumatge per la creissença verda, valorizar de las novelas tecnologias e conquerir daus marchats noveus dins lo domeni de las energias renovelablas, dau transpòrt pròpre, dau bastiment duradís e de l’efficacitat energetica: si “creissença” vòu dire “creissença de l’emplec”, serai de segur d’acòrd; e mai, quò pòt èsser interessant de veire se desvelopar un sector d’activitat dins lo domeni energetic
 
— melhorar la competitivitat de las entrepresas: vese pas talament la diferéncia emb lo punt precedent; veiquí un pauc de marketing politic que vòu ren dire manca que sem totjorn dins la competicion mondializada, sens implicacion environamentala
 
— protegir mielhs la santat publica, melhorar la qualitat de vita e balhar aus francés dau poder de’chaptar mercés a las economias d’energias dins lo bastiment e los transpòrts: si sei d’acòrd emb los dos prumiers objectius, lo darrier me plai pas; lo poder de’chaptar deuriá pas èsser un objectiu dins un projecte de lei sus l’ecologia.
 
Avant de veire los objectius mai concrets, mai tecnics, me voliá’restar sus çò que nos disen quilhs objectius dau futur model de societat. Volem una autra societat mas sens ne’n chamjar. Volem una transicion energetica mas sens metre de caire lo productivisme, la societat de consomacion e dos de sos conceptes claus: la creissença e lo poder de’chaptar, qu’es a dire produsir de mai en mai per’mor que la gent’chapten de mai en mai. Çò qu’es d’en prumier fisicament impossible dins un monde finit e que necessitarà mai en mai d’energia. E mai si reussissem a produsir emb mens d’energia, coma produsirem mai, e de mai en mai, la quantitat d’energia necessària contunharà d’aumentar. Qu’es l’efiech “rebomb”.
 
Nos fau veire, totparier, çò que conten quela refòrma. Quitament si l’enjuec de civilizacion es pas comprengut, çò que m’estona pas, las mesuras pòden pausar de las basas per una societat de la sobrietat.



publicitat
BANNER1 - comuna tolosa



Comentaris

7 d'agost 15.58h

Fin d'acòrd coma te Maime, de segur. Un bon biais de mainatjar l'energia e l'aiga, qu'es de minjar vegeta*rian, quò fai dins los 1000l per jorn de mainatjar per exemple contra benleu 100l au maximum en far nonmàs 'tencion de plan barrar l'aiga a la maison.

http://www.vegplanete.com/
http://www.calculateurcarbone.org/index.php?type_page=questionnaire&page=viande_poisson_laitage


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

7 d'agost 15.35h

Article senat, coma tostemps! Òsca!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Maime Caillon

Maime Caillon logo rss

Engenhaire de formacion, militet dins mai d'una associacion ecologista dempuei sos 19 ans.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions