CAPÇALERA: WORDLE
CAPÇALERA2: mot amagat

Jornalet, gaseta occitana d'informacions

Dissabte, 13 d'agost

Maime Caillon

Divendres, 14.11.2014 07h00

L’òme e la natura


Comentaris 5 comentaris    
Dolent Fluix Bo Molt bo Fabulós (8 vòtes)
carregant En cargament


Quand me carculei sus lo tema de mon article dau mes de novembre, me dissei que me lo faudriá far sus lo drama de Sivens e çò que nos ditz de l’afrontament que sem a viure dempuei la chasuda dau mur de Berlin e la fin de la guerra freja. Lo sos-comandant Marcos, famós rebelle dau Chiapas, parla de quatresma guerra mondiala. Lo capitalisme triomfant s’es trobat fàcia a una novela oposicion que ne’n fan partida los ecologistas, los altermondialistas e çò que podem apelar la gaucha paisana. L’oposicion de dos projectes de societat, que ne’n faguei mon prumier article de ma cronica sus Jornalet. Un afrontament que mena de la violéncia daus dos costats, un afrontament fòra democracia, contra los simbò s de l’Estat e dau capitalisme, coma las bancas, d’un costat, contra los “extremistas” de l’autre. Chascun, dins son camp, acceptant mai o mens sa violéncia propria, de las degradacions de bens publics aus blessats e mai aus mòrts chas l’adversari.
 
Mas finalament, Sèrgi Viaule me balhet una autra idea, que trobei finalament mai constructiva e pedagogica. En comentari d’un article sus la polemica a prepaus dau noveu palaiç presidenciau turc, nos explica que los “ecologistas integristas” de totas las epòcas, an degut bramar contra tots projectes beus, de las piramides au canau de las doas mars, en tut passar per lo pont dau Gard. E que finalament demòra totjorn quelas construccions maugrat tots quilhs bramadís. Puei me mandet un comunicat de premsa dau Clusèl que ditz que “mercés a sa talha, lo pichon barratge de Sivens a pas d’impacte negatiu màger sul mitan ecologic del parçan”. Quò necessita una explicacion sus l’impacte de l’umanitat sus la natura, perque l’enjuec de la biodiversitat me sembla pas comprengut.
 
Òc-plan, las activitats umanas an totjorn agut un impacte sus l’environament. L’òme a totjorn transformat la natura. La diferéncia essenciala entre auei e l’Antiquitat o l’Atge Mejan qu’es l’estenduda de la transformacion e sa vistessa. Davant l’era industriala, los impactes daus umans eran limitats geograficament e lents. Un equilibri noveu aviá lo temps de se far. D’efiech, la majoritat daus mitans naturaus d’Euròpa son estats artificializats sens destruccion de la biodiversitat. Un exemple dau brave es Camarga. Mas dempuei l’era industriala, avem mai artificializat, mai destrusit que pendent tota l’existéncia de l’umanitat. La natura pòt pas segre lo ritme, pòt pas tornar trobar un equilibri e dispareis. Auei l’artificializacion d’un mitan mena a la destruccion irreversibla de la biodiversitat. Lo barratge de Sivens, emb sas compensacions insufisentas segon lo Conselh Nacionau de la Proteccion de la Natura, i participa.
 
L’òme oblida qu’eu es nonmàs una partida de l’ecosistema terrestre. Podem pas viure dins un monde fora natura, totalament artificializat. Manca de voler realizar la cachavielha dau filme Soylent Green.



publicitat
BANER3: Ràdio Occitània



Comentaris

15 de novembre 13.48h

Pensi a una varietat de milhòc OGM, creada recentament, e qui d'après los industriaus responsables seré capabla de resistir au sequèir, a la manca d'aiga, a una tèrra prauba etc... E son fièrs e auturós d'aver creat lo milhòc, originau. Se confirma que lo subermilhòc aqueste existiva dejà, naturalament. Es l'ajòu de tota espècia de milhòc suu planeta. (Be fau estar pèc egau).
Gabrièu no'n poiré parlar hèra melhor que non pas jo.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

15 de novembre 03.23h

Dins las darrièras manifestacions dels agricultors se podiá legir d'eslogans contra l'aparament de la biodiversitat que seriá per eles pas qu'un dictat tecnocratic de mai. Aquò pròva qu'an pas comprés çò qu'es, nimai sas consequéncias. Sembla tanben qu'aquela nocion siá pas totjorn clara per d'ecologistas que i a.
Aquí un pichòt expausat (en francés) que me sembla pro didactic :
http://www.universcience.tv/video-pierre-henri-gouyon-et-la-biodiversite-6602.html
e aquí :
http:/ /www... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 de novembre 12.16h

Mercés Maime per aquel article.

Sei fòrça d'acòrd. Aura, los umans ocupan tota la Terra, o quitament, e transforman l'environament coma jamai, ad una vistessa de pas creire. Nòstras contradas son daus deserts de biodiversitat e voudrián d'enguera redusir mai aquela biodiversitat. Au nom dau produrre totjorn mai, faudriá sacrifiar çò que resta de natura (emai si es desjà transformada) per chas nos. Ieu comprene pas aqueu monde ente los umans agissen tot coma si eram possessors de la n... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

14 de novembre 09.16h

Urosament qu'as precisat "L’òme oblida qu’eu es nonmàs una partida de l’ecosistema terrestre". Mès aquò's benlèu pas sufisent. Cresi que l'òme diuré shanjar son sistèma de pensada e s'esforçar de se comparar objectivament aus auts animaus.
- L'òme samia blat = artificiau // Lo gai samia aglands = naturau
- L'òme bastis barratges = artificiau // Lo castòr bastis barratges = naturau
- L'òme eishartiga = artificiau // Lo moton brosta l'èrba = naturau
etc.
Es qu'aquera vision e... Legir la seguida


Valora aquest comentari:   votar positiu 6   votar negatiu 2
Respondre comentari replica Comentari inadequat   Formulari d'abús de comentari

14 de novembre 08.44h

Precision diabolica per provar la malfasença de l'entrepresa que consistís a produsir totjorn mai, destruccion de la biodiversitat obliga. Benlèu s'i anava ben lo "volet" uman s'avesinant del "volet" environamental.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Maime Caillon

Maime Caillon logo rss

Engenhaire de formacion, militet dins mai d'una associacion ecologista dempuei sos 19 ans.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions