Queste mes, contunhe dins ma dralha dau renovelament politic perque ne sente l’urgéncia e que l’actualitat ne balhet recentament daus elements noveus. Non, vòle pas parlar dau remanejament ministeriau e de la’ribada de tres ecologistas au govern francés. Çò que ne pòde dire, qu’es que comprene pas l’interest de l’i’nar, per un an, una annada de precampanha electorala, mai que mai emb un primier ministre coma lo Valls. Que podràn far de concret, de tangible quilhs ministres?
La sola chausa positiva qu’i vese es lo biais de far de la Sylvia Pinel: es estada elegida a las regionalas e laissa son pòst de ministre per se consacrar a son mandat. Çò que me sembla oneste per sos electors.
Vos vòle parlar de çò que ven de crear Yanis Varoufakis, l’ancian ministre grec de l’economia dau govern Tsipras: DiEM 25 o lo Movement per la Democracia en Euròpa en 2025. Quò pòt semblar curiós perque mon darrier article parlava dau movement ciutadan. Mas, s’agís ben d’un, a l’eschala europea. Efectivament, s’agís de mobilizar la gent que vòlen una organizacion vertadierament democratica d’Euròpa en la transformar en dietz ans en passar per quatre etapas:
1) la transparéncia imediata dins totas las reunions de l’Union Europea
2) una ofensiva dins l’annada contra la crisi economica
3) l’eleccion sus de las listas transfrontalieras dins los dos ans d’una assemblada constituenta qu’escrirà una constitucion que remplaçarà los tractats negociats entre Estats
4) la mesa en plaça de las decisions de quela assemblada d’acianta 2025.
Perque lo movement ciutadan, qu’aviá definit mai que mai per lo país, a mestier d’Euròpa? Perque, d’en primier, avem la chausida entre quela viá o de laissar ganhar los imperii: laissar l’emperi mondializat de la finança regnar – e per exemple crear dau protectorat banquier coma en Grècia -
o nos replejar sus los Estats-nacions, sus nòstres vielhs imperii. Puei, avem mestier d’estructuras democraticas a un niveu quasi mondiau per poder enfaciar daus problemas globaus. La crisi daus migrants, dau terrorisme, de la Siria e de l’Iraq, qu’es una sola crisi, pòt pas se tractar au niveu nacionau. La crisi environamentala necessita, per exemple sus la question dau chamjament climatic, de las responsas globalas.
Los ciutadans d’Euròpa, los pòples d’Euròpa, se pòden unir per decidir. Qu’es lo sens de l’apel de Varoufakis. E m’i associe perque, coma ecologista e ciutadan, vòle notadament “una Euròpa democratica ente l’autoritat politica ven daus pòples sobeirans”, “una Euròpa pluralista de las regions, de las etnias, de las confessions, de las nacions, de las lengas e de las culturas”, “una Euròpa durabla que viu dins lo limit daus mejans de la planeta”, “una Euròpa ecologica engatjada dins una vertadiera transicion verda”. E tot quò qu’es los mots dau manifeste de DiEM25.
Per çò que son interessats per far frotjar queu movement, sufís de signar l’apel sus diem25.org puei de júnher lo grop de discussion en occitan que cree sus Facebook: DiEM25 Occitània.
Avem mestier d’una Euròpa mai democratica, còp-sec. E l’anem querre.
#1 L'Euròpa se romparà efectivament si n'i a pas mai de democracia. E la democracia sus lo continent entier fai mestier, pas nonmàs dins los Estats-Nacions. Avem mestier d'Euròpa per enfaciar daus problemas coma lo chamnhament climatic o la crisi liada a Daesh (terrorisme, migrants). Si n'i a pas de democracia en Euròpa n'i aurà pas tanpauc de democracia en França. Mas de segur ne'n fau en Euròpa e en França.
#2 Facebook es nonmàs un otís. Coma lo demai daus malhums sociaus. Perque ... Legir la seguida
Coma un « grop » pòt bastir o farjar ‘na perpausici’ democratica « autra » desempuei un site de merchand que per i entrar fau balhar son arma a la NSA ?
De segur, en França auriam mestier de democracia. Perque anar querre dins un estat europene, un noveu estat continent, la democracia que podam pas far respectar en França?
Culturalament e economicament, l'Euròpa se cassera en dos. D'un costat l'Euròpa dau nòrd que viesa vers Berlin, Varsovia e de l'autre l'Euròpa dau sud, l'Euròpa daus pais miejaterrans que viesan vers l'Asia e China segond l'anciena rota de la seja.
La batalha es plan entre l'Euròpe dau nòrd e los pais de l'autre co... Legir la seguida
3 comentaris
En cargament
3 comentaris
Mandar
