Bandièra01 1180x150: Comuna de Tolosa

Opinion

L'espasa de Damòcles

Maime Caillon

Maime Caillon

Engenhaire de formacion, militet dins mai d'una associacion ecologista dempuei sos 19 ans.

Mai d’informacions
La tragedia de Fukushima nos aprenguet quauquaren de plan important: los país modernes emb una tecnologia de las developadas pòden coneisser daus accidents nuclears daus greus. En França, ont l’industria de l’atòme es mai qu’importanta, sem preparar a un tal eveniment?
 
Quò es pas l’avís de Jean-Claude Delalonde, president de l’ANCCLI - Associacion nacionala daus comitats e comissions localas d’informacion - un grop de ciutadans mobilizats per la seguretat nucleara  a l’entorn de de las centralas. “Sus lo papier, tot sembla ben. Dins los fachs, ne sem plan loenh.” En feurier 2014, un Plan Nacionau fuguet establit mas auei es totjorn pas mes en applicacion dins los Plans Particulars d’Intervencion gerit per los prefectes.
 
L’ANCCLI comandet una enquesta basada sus los criteris d’analisi internacionaus daus plans d’urgéncia. Revela que França es pas bona dins queu domeni. Aitau, lo dimensionament daus territòris concernits son tròp feble. 5 km per l’evacuacion e 10 per la proteccion quand las preconizacions van de 80 a 100 km. L’obstacle per las autoritats es lo nombre de gens: un milion a 30 km de Fessenheim e 1,2 a l’entorn de Bugey. E puei p’una simulacion son estadas fachas, coma se pòt far dins d’autres país. Sens parlar de las tres centralas frontalieras (Fessenheim rasís Alemanha, Chooz rasís Belgica e Kettenuewen - Cattenom en francés - rasís Luxemborg) que necessitariàn una cooperacion interestatala qu’avem pas.
 
Adonc, nos fau esperar que François Hollande mancarà pas per un còp de paraula. “Anam barrar Fessenheim”, çò disset dijòus. “Quò es a partir de 2019, e serà a EDF, apres l’Autoritat de seguretat nucleara de nos dire qualas son las centralas de barrar.” Lo govern deu balhar sa fuelha de rota sus lo nuclear davant lo 1er de julhet, per realizar l’objectiu de la lei sus la transicion energetica dau mes d’aost passat. Prevei 50% de nuclear en 2025 contra 75% auei. Çò que seriá una avançada importanta. Serà pertant pas sufisenta per qu’aiam pus quela espasa de Damòcles nucleara au dessus de nòstras testas.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Domergue Sumien Ais de Provença
1.

Dins l'estat francés i a una vielha cultura d'impunitat e d'arrogància dau lobby nuclear, que se crei autorizat a far çò que vòu. Dins lo cas present, lo lobby nuclear —amb l'estat francés— se creson autorizats a negligir lei nòrmas internacionalas de seguretat. L'aparicion de l'Autoritat de Seguretat Nucleara (ASN) dempuei 2006 bota un pauc de pression sus lo lobby nuclear, mai aquò sembla pas pron encara. Lei grops d'ecologistas vigilants son indispensables per avançar vèrs mai de seguretat.

  • 7
  • 1

Escriu un comentari sus aqueste article