CAPÇALERA: CURSOS CAOC

Jornalet, gaseta occitana d'informacions

Dijòus, 1 d'octòbre

Maime Caillon

Dimenge, 19.2.2017 03h00

Dilema electorau


Comentaris 2 comentaris    
Dolent Fluix Bo Molt bo Fabulós (5 vòtes)
carregant En cargament


Los participants de la primària de l’ecologia venen de decidir que lor candidat, Yannick Jadot, deu discutir emb los dos autres principaus a mança, lo socialista Benoît Hamon e lo republican Jean-Luc Mélenchon. L’idea es bona perque quilhs tres òmes politics presentan daus programas qu’an fòrça punts comuns e de las convergéncias possiblas. Mas la question quò es de saubre coma se pausicionar fàcia au sociauliberalisme que regetan tots tres.
 
D’efiech, Hamon es estat chausit per sa linha socialista en rompedura emb l’accion daus governs de François Hollande. Se confrontava a Manuel Valls, l’ancian primier ministre, portaire dau bilanç de la presidéncia. Sus la mesma linha sociauliberala, trobam Emmanuel Macron, son ancian ministre de l’economia, que se presentet tanben a l’eleccion. Aitau, l’ideologia mai presenta dins lo PS es representada per un candidat que ne’n es en defòra. Lo dilema, per los responsables e los militans, es de sosténer Hamon, que pòrta un programa que son contra, o laissar la maison comuna dau partit per lo candidat que defend lors ideas. Sembla que l’ora es a l’achampament. Achampament daus contraris jos la ròsa.
 
Mas coma reüssir l’empeut de la ròsa meitat socialista, meitat sociauliberala, sus lo virasolelh ecologista? Coma amassar daus partesans dau CETA coma sos ferotges opausants? Si los liberaus assumen auei quela aliança, quala serà lor actitud un còp elegits?
 
De l’autre caire, avem Mélenchon e son movement sociaurepublican La France Insoumise (La França Insomesa). S’i desvelopa una ideologia socialista mai conservatritz que la d’Hamon o daus ecologistas (per exemple per çò dau revengut universau) e tanben mai sobeiranista. Queu darrier punt es la dificultat mai importanta per una union entre los candidats. La França Insomesa vòu tornar negociar los tractats europeus per lor balhar un contengut mai sociau e ecologista. Mas bota en davant la surtida de l’UE coma solucion en cas d’insuccès. E fòrça insomés son directament per un Frexit. Una preposicion que correspond pas a çò que beucòp d’ecologistas vòlen: la preservacion de quela estructura internacionala. Una estrategia per chamnhar Euròpa es de butir la confrontacion lo mai luenh possible en far de la deobedéncia (concretament en aplicar pus de las partidas daus tractats) en tot demorar dedins.
 
Si l’objectiu finau sembla partejat, l’estrategia, ela, es diferenta: los ecologistas mai d’autres progressistas vòlen pas prener la risca de veire desaparéisser l’Union Europea, çò que laissariá nòstre continent a las politicas nacionalistas e reacionàrias.
 
Veiquí lo dilema electorau dins loquau se tròba la mança francesa. Pòt gardar las estructuras partidàrias actualas e los conflictes internes que produsen. O las despassar en se recompausar a l’entorn de las tres grandas tendéncias: sociauliberala, antiliberala sobeiranista o alternativa.
 
 


abonar los amics de Jornalet
 



publicitat
BANNER1: IEO Arièja



Comentaris

20 de febrièr 08.23h

Sèm plan ací en fàcia deu problèma : se posicionar per rapòrt a un programa, lavetz que caleré votar per cada question una après l'auta. Seré atau la Democracia e pas aqueste sembla-democracia que balha un chèc en blanc a un tipe que, de tot biaish, va pas hèr çò qu'a dit.
La Democracia es dirècta o es pas.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

19 de febrièr 07.03h

La granda arnaca de la politica francesa se passet en 1973 quand Pompidou faguet passar una lei qu'interdisia a l'estat frances d'empruntar de l'argent a sa banca centrala; emprunt que se fasia sens interest. Dempuei l'estat frances emprunta a las bancas privadas emben belcòp d'interest.

La seconda arnaca quò es l'endetament. Las bancas an butit lo monde a empruntat e empruntat au-dessus de lors moiens. Aitau la banca massava daus interests. La mesma politica se fasia emben los pais sos dep... Legir la seguida


Valora aquest comentari:   votar positiu 1   votar negatiu 3
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Maime Caillon

Maime Caillon logo rss

Engenhaire de formacion, militet dins mai d'una associacion ecologista dempuei sos 19 ans.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions